უძრავი ქონების სექტორის წარმომადგენლების ნაწილი ელის, რომ წელს დაგეგმილზე ნაკლები ახალი მშენებლობა დაიწყება. ამის მიზეზი ისაა, რომ უძრავი ქონების რეალიზაცია შემცირებულია. მყიდველები პასიურობენ და მოლოდინის რეჟიმში არიან, რასაც ადასტურებენ ბროკერებიც.
აქედან გამომდინარე, დეველოპერებიც აღარ აქტიურობენ, მით უმეტეს, რომ მათდამი უკვე ბანკებიც სიფრთხილეს იჩენენ და კრედიტებს ხელგაშლილად აღარ გასცემენ. როგორც „არსის“ გენერალურმა დირექტორმა განაცხადა, ქვეყანაში არსებული არაპროგნოზირებადი გარემოს ფონზე, შესაძლოა, კომპანიების ნაწილმა პროექტები დროში გადაავადოს. ახალი პროექტების გადავადებაზე გავლენა ექნება იმ გარემოებას, რომ ბანკებმა ბოლო პერიოდში ახალი დეველოპერული პროექტების დაფინანსება შეზღუდეს.
„მაინც არაპროგნოზირებად გარემოში ვართ, წელსაც არის არჩევნები, ქვეყანაში პოლიტიკური კრიზისი კვლავ რჩება. იმის ფონზე, რომ ბანკებმა გარკვეულწილად შეამცირეს, შეზღუდეს პროექტების დაკრედიტება, შესაძლოა, მიწოდების შემცირება გვქონდეს. გამომდინარე იქიდან, რომ ვიღაცას შესაძლოა, ახალი პროექტის დაწყება უნდოდეს, მაგრამ საბანკო კრედიტის გარეშე ვერ დაიწყოს. ვიღაცამ შეიძლება ამ არასტაბილურ გარემოში ახალი პროექტების დაწყება ვერ გარისკოს.
ეს იმას ნიშნავს, რომ მიმდინარე წელს უფრო ნაკლები პროექტები შეიძლება დაიწყოს, ვიდრე ეს დაგეგმილი იყო, რადგან როგორც ვიცით, გასულ წლებში საკმაოდ მაღალი იყო გაცემული სამშენებლო ნებართვების რაოდენობა“, - განაცხადა ბესო ორთოიძემ.
რასაკვირველია, მხოლოდ საბანკო დაკრედიტება არ არის პრობლემის წყარო. საქმე ისაა, რომ ბინების რეალიზაცია საგრძნობლად შემცირდა, რაც მშენებლებს სიფრთხილისკენ უბიძგებს. უძრავი ქონების ბაქარზე არსებული ვითარების შესახებ საუბრობს საბროკერო კომპანია „კიბეს“ წარმომადგენელი ნელი გოგუაძე, რომელიც ადასტურებს, რომ როგორც გაყიდვის, ისე გაქირავების მიმართულება სტაგნაციას განიცდის. გაზაფხულმა ის აქტივობა ჯერჯერობით ვერ მოიტანა, რისი მოლოდინიც ჰქონდათ.
„მართალია, უკვე გაზაფხულია და დაინტერესება მაღალი უნდა იყოს, მაგრამ ის აქტივობა ნამდვილად არ გვაქვს, რა მოლოდინიც წინასწარ იყო. მოგეხსენებათ, დედაქალაქში ქირაზე მოთხოვნა მუდმივად მზარდია, მაგრამ ყველაზე მეტად გვიკავშირდებიან მომხმარებლები, რომლებიც ე.წ. „ბიუჯეტური“ ბინებით არიან დაინტერესებული. ასეთი ქირა კი ყოველთვის ცოტაა. ფაქტობრივად, თუკი სადმე გამოჩნდება ბინა დაბალ ფასში, მალევე ქირავდება. ეს ზოგად მდგომარეობაზე არ აისახება, რადგან ბაზარი, ძირითადად, გაჯერებულია მაღალი დონის ბინებით, სადაც დამქირავებლისთვის ყველანაირი კომფორტი არსებობს. სამწუხაროდ, ასეთი ბინის დაქირავება მეპატრონეებს დაბალ ფასად არ უღირთ. ამიტომაც, ვერ ქირავდებდა და ამ კატეგორიის ბინები ბევრია, მომხმარებელი კი - ცოტა.
საქართველოს მოქალაქე ცდილობს, რაც შეიძლება მეტი შეღავათი გაეწიოს, დაბალ ფასად დაიქირაოს და ფართის მდგომარეობას, ხშირ შემთხვევაში, უკანა პლანზე აყენებს. ცხადია, მათ სჭირდებათ დაქირავება, მაგრამ უჭირთ მაღალი ფასის გადახდა.
გაზაფხულია, ვფიქრობდი, ბაზარი უფრო გააქტიურდებოდა, მაგრამ ჯერჯერობით კვლავ იგივე სურათი გვაქვს. მიწოდება ჭარბია, მოთხოვნა - ნაკლები. ასეთ დროს ფასები ზოგადად იკლებს ხოლმე, მაგრამ სიმართლე გითხრათ, ამ ეტაპზე ასე არაა. მიმდინარე წლის დასაწყისში ცვლილება თითქმის არ ყოფილა და არც მომავალში ვფიქრობ, რომ დაქირავება გაიაფდეს. თუ მოთხოვნა კიდევ შემცირდა, ასეთ შემთხვევაში შეიძლება ფასები კლებისკენ წავიდეს.
პრობლემებია გაყიდვის მხრივაც და რთული ვითარებაა დაგირავების კუთხითაც. გირა საკმაოდ ძვირია, მომხმარებელი კი - ცოტა. ცალსახად შემიძლია გითხრათ, რომ პრობლემა ყველა მიმართულებით არის. უძრავი ქონების სფეროში ვითარება კვლავ რთულია. გვიძნელდება ბროკერებს მუშაობა. თუ ეკონომიკური ვითარება არ გაუმჯობესდა, ვფიქრობ, უახლოეს მომავალში მუშაობა ძალიან გაგვიჭირდება“, - განაცხადა ნელი გოგუაძემ.
ცნობისთვის, ბოლო პერიოდის განმავლობაში დეველოპერულ კომპანიებში აცხადებდნენ, რომ ქვეყანაში შექმნილი არაპროგნოზირებადი გარემოს ფონზე, კომერციულმა ბანკებმა ახალი დეველოპერული პროექტების დაფინანსება შეანელეს. ეს კი უძრავი ქონების ბაზარზე ახალ რეალობას შექმნის, რომელიც მინიმუმ 1 წელი ან უფრო დიდხანს გაგრძლედება.
