„დონალდ ტრამპის ადმინისტრაციაში მიაჩნიათ, უახლოეს რამდენიმე თვეში უკრაინაში ცეცხლის შეწყვეტის მიღწევა ნაკლებად სავარაუდოა“, - ამის შესახებ ინფორმაციას სააგენტო Reuters-ი ინფორმირებულ წყაროებზე დაყრდნობით ავრცელებს.

წყაროების ინფორმაციით, აშშ-ის ადმინისტრაციაში ამუშავებენ რუსეთსა და უკრაინაზე ზეწოლის ახალ გეგმებს.

ამერიკელი ოფიციალური პირები რამდენიმე კვირის განმავლობაში პირად საუბრებში ჩიოდნენ სასარგებლო წიაღისეულის შესახებ შეთანხმებასა და სამშვიდობო მოლაპარაკებების წინსვლაში უკრაინული წინააღმდეგობის გამო, თუმცა ბოლო დღეებში სულ უფრო მეტად იმედგაცრუებულნი არიან მოსკოვით.

ერთ-ერთი წყაროს თქმით, საუბარია რუსეთის წინააღმდეგ ახალი ტარიფებისა და სანქციების დაწესების შესაძლებლობაზე.

თეთრი სახლის პრესმდივანმა, კაროლინ ლევიტმა განაცხადა, რომ აშშ-ის პრეზიდენტი, დონალდ ტრამპი იმედგაცრუებულია როგორც ვოლოდიმირ ზელენსკით, ასევე ვლადიმირ პუტინით.

„შემიძლია გავიმეორო ის, რაც პრეზიდენტმა გუშინ საღამოს თქვა. ის იმედგაცრუებულია ამ კონფლიქტის ორივე ლიდერით. მას სურს, რომ ეს ომი დასრულდეს. ხალხი ორივე მხარეს იღუპება და ეს ძალიან დიდხანს გრძელდება“, - აღნიშნა თეთრი სახლის პრესმდივანმა.

აშშ-ის პრეზიდენტის სპეციალური წარმომადგენელი უკრაინისა და რუსეთის საკითხებში, კიტ კელოგი კი უფრო ოპტიმისტურად არის განწყობილი. მან განაცხადა, რომ უკრაინა და რუსეთი ახლა ახლოს არიან ცეცხლის სრულად შეწყვეტის მიღწევასთან.

„ჩვენ გვინდა მივაღწიოთ ყოვლისმომცველ 30-დღიან ცეცხლის შეწყვეტას. როგორც კი ამას მივაღწევთ, ომის განახლება ძალიან რთული იქნება. ეს არის ის, რისიც მე მჯერა“, - აღნიშნა კიტ კელოგმა.

კელოგი მიიჩნევს, რომ ახლა აუცილებელია სახელშეკრულებო პირობების ჩამოყალიბება, რომლებშიც მკაფიოდ იქნება მითითებული უკრაინისა და რუსეთის მოთხოვნები ომის დასასრულებლად.

„მე ნამდვილად მჯერა, რომ ცეცხლის შეწყვეტის ზღვარზე ვდგავართ, მაგრამ ორივე მხარეს კომპრომისზე წასვლა მოუწევს. არც ერთი მხარე არ მიიღებს ყველაფერს, რაც სურს. რაღაცის დათმობა მოუწევთ, რომ გამოსავალს მიაღწიონ. მაგრამ პრეზიდენტ ტრამპს ამის გაკეთება შეუძლია“, - დასძინა მან.

ვოლოდიმირ ზელენსკიმ განაცხადა, რომ ცეცხლის შეწყვეტის მიღწევის საკითხი რუსებზე ზეწოლაზეა დამოკიდებული და ამის გაკეთება უახლოეს კვირებში ან თვეებშია შესაძლებელი.

„ცეცხლის შეწყვეტა ნამდვილად ომის დასრულების ყველაზე დიდი გზაა. მაგრამ ეს არ არის ომის დასასრული. იმიტომ, რომ, სამწუხაროდ, ჩვენ საქმე გვაქვს მათთან, ვისთანაც გვაქვს საქმე - რუსებთან. და ცეცხლის სრულად შეწყვეტა შესაძლებლობას იძლევა, დროს იძლევა, რომ უკრაინას ჰქონდეს უსაფრთხოების ის გარანტიები, რომლებიც უზრუნველყოფენ ომის ცხელ ფაზაში ხელახლა დაბრუნების თავიდან აცილებას. ანუ, ის გზას უხსნის რეალურ დიპლომატიას“, - აღნიშნა ვოლოდიმირ ზელენსკიმ, რომელიც მოლაპარაკების პროცესში ასევე, უკრაინისთვის წითელ ხაზებს ასახელებს.

„უკრაინისთვის მოლაპარაკებების დროს პრიორიტეტი ძლიერი არმიაა. ეს წითელი ხაზია - ჩვენი არმიის შემცირება დაუშვებელია. გულწრფელად რომ ვთქვათ, ჩვენ ყველაფერს გავაკეთებთ იმისთვის, რომ არმია იმ რაოდენობით დავტოვოთ, რაც დღეს არის. დიდი არმია, რომელიც სამჯერ აღემატება ომის დასაწყისში არსებულს. არმია, რომლის მხოლოდ მოდერნიზებაა შესაძლებელი. აი, რა ცვლილებები შეიძლება მოხდეს ომის დასრულების შემდეგ“, - აღნიშნა ვოლოდიმირ ზელენსკიმ.

უკრაინის პრეზიდენტმა ხაზგასმით აღნიშნა, რომ კიდევ ერთი წითელი ხაზი ოკუპირებული ტერიტორიების რუსეთის ტერიტორიებად აღიარებაა.

„ყოველ შემთხვევაში, ეს დროებით ოკუპირებული ტერიტორიებია. სამართლიანი მშვიდობა მაშინ იქნება, როდესაც ყველა ტერიტორია დაბრუნდება. მაგრამ თუ შესაძლებელია კომპრომისის პოვნა, რომ ამ ტერიტორიების დაბრუნება დროთა განმავლობაში დიპლომატიური გზით მოხდეს - ვფიქრობ, რომ, ალბათ. რაც შეეხება ზოგიერთ ტერიტორიას, ეს ერთადერთი გზა იქნება. ჩვენ ყველაფერს გავაკეთებთ იმისთვის, რომ უკრაინის ტერიტორიული მთლიანობის აღდგენა მოხდეს, ჩვენთვის ეს მნიშვნელოვანი საკითხებია“, - დასძინა მან.

ბრიტანეთის საგარეო საქმეთა მინისტრის, დევიდ ლამის თანახმად, პუტინს დრო გაჰყავს: „მას შეეძლო ცეცხლის შეწყვეტაზე ახლავე დათანხმებულიყო, მაგრამ ის აგრძელებს უკრაინის, მისი მშვიდობიანი მოსახლეობის, მისი ენერგეტიკული რეზერვების დაბომბვას“.

გერმანიის საგარეო საქმეთა მინისტრი ანალენა ბერბოკი კი მიიჩნევს, რომ პუტინის საუბარი მოლაპარაკებებზე „სხვა არაფერია, თუ არა ცარიელი დაპირებები“.

ანალიტიკოსი პეტრე მამრაძე მიიჩნევს, რომ უკრაინა - რუსეთ- ამერიკის მოლაპარაკებები ჩიხშია შესული და ეს მოსალოდნელიც იყო. მამრაძე for.ge-თან მიიჩნევს, რომ დიპლომატიური მოლაპარაკებებით ამ ომის შეჩერება შეუძლებელია და სიტუაცია რთულია.

„რასაც ადრე ვამბობდი, ამ შემთხვევაში გამართლდა. ვამბობდი, რა უნდა შესთავაზონ პუტინს ისეთი, რომ ის ომის დასრულებას დასთანხმდეს? მისი არც ერთი მოქმედება და საუბარი არ მიუთითებს იმაზე, რომ ის ამისთვის მზად არის. პუტინი თამაშობს, დროს წელავს და ამით ფრონტის ხაზზე უპირატესობის მოპოვებას ცდილობს. კრემლში და რუსეთის ელიტაშიც ასეთი განწყობაა, რომ ცოტაც მივაწვეთ და ბოლოში გავდივართ. მოგეხსენებათ, რა მოთხოვნებიც პუტინს აქვს. ის არაფრით არ დათმობს ლუგანსკს, დონეცკს, ზაპოროჟიეს და ხერსონს. მას ის ტერიტორიებიც კი უნდა ამ რეგიონში, რომელშიც ჯერ არ შესულა. ყირიმზე ხომ საუბარი აღარ არის უკვე. აქეთ ამერიკელებისგან ითხოვს ყირიმის აღიარებას და ამაზე ინფორმაციამაც გამოჟონა დასავლურ მედიაში. არ არის გამორიცხული, პუტინი ახლა ოდესას უმიზნებდეს და იქ შეიყვანოს ჯარი. ამ შემთხვევაში, უკრაინისთვის კატასტროფა იქნება, რადგან ის ზღვის გარეშე დარჩება. ზღვაში ჯერჯერობით უკრაინელები დომინირებენ იმ რაკეტებით, რითაც რუსული გემები ჩაძირეს და იძულებულები გახდნენ ოჩამჩირეში გადმოსულიყვნენ. უკრაინა ვაჭრობს ზღვაში ყველანაირი შეფერხების გარეშე. შავ ზღვაში ცეცხლის შეწყვეტა უფრო რუსეთს აწყობდა და ამიტომ პუტინი სულაც არ ფიქრობს, რომ ახლა ცეცხლის შეწყვეტის დროა. თუ მისცემენ იმას, რასაც ითხოვს, რატომაც არა, მაგრამ ვინ წავა ამაზე? უკრაინა არა და ამას ვერც ამერიკა იზამს. მაშ, რა არის ის წერტილი, რაზეც უნდა შეთანხმდნენ? მე ამ წერტილს ჯერ ვერ ვხედავ“, - ამბობს მამრაძე.

მისივე თქმით, პუტინი ითხოვს ასევე უკრაინამ ნატოზე საერთოდ უარი თქვას, ხოლო უკრაინის ჯარი, რომელიც ძალიან დიდი გამოცდილების და შეიარაღების მქონეა უკვე, უნდა დაიშალოს და მისი განიარაღება მოხდეს, რაზეც უკრაინა, გამორიცხულია, დათანხმდეს და არც ევროპა იქნება ამაზე თანახმა.

„პუტინი ერთ მოთხოვნასაც კი არ ცვლის, უკან არ იხევს. ტრამპმა უკვე გამოხატა გაბრაზება და თქვა, რომ უკმაყოფილოა პუტინით. თუმცა პუტინი ამის გამო უკან არ დაიხევს. რუსეთში რუსი ფინანსისტები ამბობენ, რომ უახლოვდებიან კოლაფს და აქტივების გაყიდვას ცდილობენ, მაგრამ ვერ ახერხებენ. თუმცა პუტინის ელიტა ამ ომის ფონზე კოლოსალურად გამდიდრდა.

ყველა სამხედრო შეკვეთების შესრულებაზე გადავიდა, ამიტომ მათი ქონება ძალიან მალე იზრდება. სიტუაცია ძალიან რთულადაა, გამოსავალი არ ჩანს. რა უნდა გააკეთოს ტრამპმა? უკრაინას მისცეს რაკეტები რომ მოსკოვს მისწვდეს? ასეთი რამ არ მოხდება და ტრამპი ამას არ იზამს. მისი გარემოცვა ამბობს, უკვე, რომ ტრამპმა მსოფლიო მესამე ომისგან იხსნა და ეს უკვე დიდი წარმატებაო. ბაიდენმა არ მისცა ამის საშუალება უკრაინას, რომ ბოლომდე მისწოლოდა რუსეთს და ნაწილ-ნაწილ უზოგა, როგორც ფულადი, ასევე სამხედრო დახმარება. პუტინის მხრიდან ბირთვული იარაღის გამოყენების ისე შეეშინდათ, რომ უკრაინელებს კონტრშეტევა შეაჩერებინეს. ამიტომ მე ვერ ვხედავ ცეცხლის შეწყვეტის პერსპექტივას“,-ამბობს მამრაძე.