აჭარის მთავრობის თავმჯდომარის თანამდებობას თბილისის პოლიციის დეპარტამენტის ყოფილი დირექტორი, სულხან თამაზაშვილი დაიკავებს. 7-წლიანი მმართველობის შემდეგ კი თორნიკე რიჟვაძემ საზოგადოებას სოციალური ქსელის საშუალებით აცნობა, რომ თანამდებობას ტოვებს და რჩება გუნდში რიგით ჯარისკაცად. დარჩება თუ არა რიგით ჯარისკაცად გრიგოლ ლილუაშვილი, უცნობია. ამ ეტაპზე ცნობილია მხოლოდ ის, რომ სუს-ის ყოფილი უფროსი სახლში წავიდა.

როგორც ცნობილია, მთავრობის მეთაურმა დააანონსა, რომ საქართველოს რეგიონული განვითარების სამინისტრო დამოუკიდებელ სამინისტროდ ჩამოყალიბდებოდა და მინისტრის თანამდებობას გრიგოლ ლილუაშვილი დაიკავებდა. თუმცა, გუშინ ირაკლი კობახიძემ თქვა, რომ ლილუაშვილი რეგიონული განვითარების მინისტრი აღარ იქნებოდა და მის ნაცვლად კახაბერ გულედანი დაინიშნება.

აღსანიშნავია, რომ სუს-ის ყოფილი უფროსი ერთ-ერთია რომელიც „ქართული ოცნების“ საპატიო თავმჯდომარის მაღალი ნდობით სარგებლობს და რაც ასევე მნიშვნელოვანია, ლილუაშვილი ის ადამიანია, რომელსაც ამერიკული და ბრიტანული სანქციები არ შეხებია. აქვს მჭიდრო კავშირები აშშ-ის ხელისუფლებასთან. For.ge სხვადასხვა წყაროსგან მოწოდებული ინფორაციაზე დაყრდნობით წერდა, რომ საპარლამენტო არჩევნებამდე რამდენიმე კვირით ადრე გრიგოლ ლილუაშვილი აშშ-ში იმყოფებოდა. სწორედ ამ ვიზიტის შემდეგ შეიცვალა ამერიკის საელჩოს რიტორიკაც.

მეტიც, რობინ დანიგანიმ განაცხადა, რომ „ქართული ოცნება“ დემოკრატიულად არჩეული მთავრობაა და შეიძლება მომდევნო არჩევნებზეც ასე იყოს. როგორც აშშ-ის ელჩმა მაშინ თქვა, ამერიკა არ ირჩევს, ვინ მოიგებს ან ვინ წააგებს, ამას ქართველი ხალხი წყვეტს. ამერიკელმა დიპლომატმა საქართველოს მთავრობასთან ღია და კონსტრუქციული კომუნიკაციის მნიშვნელობაზე ისაუბრა და აღნიშნა, რომ აშშ-ს სურს, ნებისმიერ დემოკრატიულად არჩეულ მთავრობასთან მუშაობა.

აშკარაა, რომ რიტორიკა შეიცვალა და აშშ უკვე ძველებურად აგრესიული არ არის. ეს კი, ლოგიკურად რაღაცაზე მიუთითებს. როგორც ჩვენი წყარო ამბობს, არჩევნებამდე ერთი თვით ადრე ლილუაშვილი იყო აშშ-ში, სადაც შეხვდა გადაწყვეტილების მიმღებ ხალხს, თავის კოლეგებსაც და სახელმწიფო დეპარტამენტის წარმომადგენლებს, რომლებსაც აუხსნა რეალური სიტუაცია. საქართველოს უშიშროებამ ამერიკელებს წარუდგინა რეალური სურათი, რომ მათ არანაირი შანსი არ აქვთ გადატრიალების მოწყობის. ამ ვიზიტის შედეგად კონკრეტული განცხადებები მაშინ არ გაკეთებულა, მაგრამ, როგორც ჩანს, ეს სურათი გააანალიზეს, დარწმუნდნენ, რომ ქვეყანაში ხელისუფლების შეცვლის შანსი არ აქვთ.

ჩნდება კითხვა - რა გახდა მიზეზი იმისა, რომ ერთ-ერთი ყველაზე წარმატებული ფიგურა ვადაზა ადრე მიდის თანამდებობიდან და მეტიც, ჯერ არ დანიშნული უწყების ხელმძღვანელობაზე ამბობს უარს? მთავრობის მეთაურის განცხადებით, ლილუაშვილთან კონსულტაციების შედეგად გაირკვა, რომ არსებობდა განსხვავებული მიდგომები სამინისტროს საქმიანობის პრინციპებთან, მათ შორის სამინისტროში გასატარებელ საკადრო პოლიტიკასთან დაკავშირებით. აქიდან გამომდინარე, ირაკლი კობახიძის განცხადებით, მიღებული იქნა გადაწყვეტილება, რომ გრიგოლ ლილუაშვილი აღარ დაიკავებს რეგიონული განვითარების მინისტრის თანამდებობას.

„რამდენიმე თემა იყო. ყველაზე მნიშვნელოვანი, ალბათ, იყო მინისტრის მოადგილეების საკითხი. როგორც მოგეხსენებათ, კანონის თანახმად, პრემიერ-მინისტრის მიერ ინიშნება მინისტრის წარდგინებით მინისტრის მოადგილეები. აქ იყო განსხვავებული შეხედულებები, აქ საქმე არ ეხებოდა მხოლოდ პერსონებს, იყო განსხვავებული შეხედულებები, რომელიც არსებითად დაკავშირებული იყო კონკრეტული კადრების მიერ სამინისტროს ფუნქციების ამა თუ იმ ფორმით შესრულებასთან. დანარჩენი, შიდა სამზარეულოა. სხვადასხვა საკითხი იყო, მათ შორის მოადგილეების თემა, რაზეც განსხვავებული შეხედულებები გვქონდა. გვქონდა ჯანსაღი დიალოგი ამ თემაზე, ერთობლივად მივედით ამ გადაწყვეტილებამდე“, - აღნიშნა ირაკლი კობახიძემ.

რა არის შიდა სამზარეულო, რომელის შესახებ კობახიძემ არ ისაუბრა? - ეს ყველაზე მნიშვნელოვანი დეტალია. სანამ თავად ლილუაშვილი გააკეთებს განცხადებებს, ვრცელდება სხვადასხვა შინაარსის ინფორმაცია. ერთ-ერთი ვერსიით ლილუაშვილს „ქართული ოცნების“ საპატიო თავმჯდომარესთან ურთიერთობა მას შემდეგ დაეძაბა, რაც ქვეყანა დატოვა გიორგი ბაჩიაშვილმა. მეორე ვერსიით გუნდი ლილუაშვილს თბილისის მეორობის კანდიდატად წარადგენს. ეს ყველაფერი ამ ეტაპაზე არის მხოლოდ ვერსიები.

ექსპერტი უსაფრთხოების საკითხებში დავით კუხალაშვილი აცხადებს, რომ რეალურად გამოიცვალა პოლიტიკური ფიგურა, აქედან გამომდინარე, ვერ ხედავს საფრთხეს იმასა, რომ ამან შეიძლება შეარყიოს ქვეყნის უსაფრთხოება.

„რაც უფრო სწრაფად გამოიცვლებიან ძალოვანი მინისტრები, ეს არის კარგი. მთავარია, რომ შენარჩუნდეს ის მნიშვნელოვანი ბირთვი, რომელიც იმ კომპეტენციის შესაბამისად იღებს გადაწყვეტილებას, რომელიც უკავშივრება ოპერატიულ-აგენტურულ და ტექნიკურ საქმიანობას. ასე რომ, განსაკუთრებულ პრობლემას ვერ ვხედავ თუ, რა თქმა უნდა, შიდა რაღაცა კონფლიქტური სიტუაცია არ დაიწყება, როდესაც ახალი ხელმძღვანელი მივა და ახალი გადალაგება დაიწყება. ზოგადად, ჩვენ ამ კუთხით მოწყვლადი სახელმწიფო ვართ. როდესაც გარკვეული ცვალებადობა ხორციელდება, მათ შორის ხდება არა მხოლოდ პოლიტიკური, არამედ შიდა გადაადგილებები. ვნახოთ, დაველოდოთ მოვლენათა განვითარებას, რომელიც გვიჩვენებს რამდენად სწორი იყო ეს გადაწყვეტილებები“, - აცხადებს for.ge-სთან საუბრისას დავით კუხალაშვილი.