ბოსფორის სანაპიროზე მდებარე თურქეთის ულამაზეს ქალაქ სტამბულში ახალი სრუტე და კუნძული შეიქმნება, რომელიც ნიუ-იორკის ისტორიული ცენტრის, მანჰეტენის მსგავსი იქნება.

15-მილიონიანი ქალაქის ევროპულ ნაწილში არხი გაიჭრება, რომელიც „ოქროს რქის“ ნავმისადგომს ბოსფორის სრუტესთან შეაერთებს. ხელოვნური არხის სიგანე 100 მეტრამდე იქნება, სიგრძე - 20 კილომეტრი და ის ქალაქის ცენტრში გაივლის.

ხელოვნურ კუნძულზე აღმოჩნდებიან სტამბულის ცნობილი უბნები: ბეიოღლუ, ბეშიქთაში, შიშლი და სარიერი.

პროექტის განხორციელება 20 მილიარდამდე ევრო დაჯდება. თურქული პრესა წერს, რომ ერდოღანს მოსწონს სტამბულის ცენტრში ახალი პროექტის განხორციელების იდეა, თუმცა საჯაროდ ამის შესახებ ჯერ არ უსაუბრია.

სტამბულის მანჰეტენის შექმნის იდეის ავტორი, თურქი არქიტექტორი სინან გენიმი, დარწმუნებულია, რომ ახალი პროექტის განხორციელება ხელს შეუწყობს ქალაქის განტვირთვას და ალტერნატიულ მარშრუტებს შექმნის. ამასთან, ახალი სრუტე საერთაშორისო საზღვაო მიმოსვლისთვის დახურული იქნება. სტამბულის მანჰეტენის ამბიციური პროექტი, შესაძლოა, ორ წელიწადში განხორციელდეს.