ოპოზიციურ ფლანზე კიდევ ერთი, ახალი გაერთიანება ვიხილეთ და შეიძლება ითქვას, რომ ახალ-ახალი კონფიგურაციების შექმნა საარჩევნოდ ბრძოლის მთავარ იარაღად იქცა. ეს ოპოზიციური პარტიების ერთგვარი ტაქტიკაა, რომ ერთი მხრივ საპარლამენტო არჩევნებზე 5%-იანი ბარიერი გადალახონ, მეორე მხრივ კი, „ქართულ ოცნებას“ ხმები წაართვან. ამის ფონზე, ექსპერტთა და პოლიტიკოსთან ნაწილი პროგნოზირებს, რომ მმართველი პოლიტიკური გუნდი უკვე ზღვარზეა - „ქართულმა ოცნებამ“ შესაძლოა საკონსტიტუციო უმრავლესობა ვეღარ მოიპოვოს, შედეგად კი, კოალიციური მთავრობა მივიღოთ.

როგორც ცნობილია, ელენე ხოშტარიას „დროა“ და ზურაბ ჯაფარიძის „გირჩი - მეტი თავისუფლებისთვის“ წინასაარჩევნოდ მელია-გვარამიას „ახალს“ შეუერთდნენ. ნიკა გვარამიას თქმით, „მცირე განსხვავებების“ გამო, „ლელოსთან“ შეთანხმება ამ დრომდე ვერ მოხერხდა, თუმცა „ამით პროცესი არ იკეტება“. ამასთან, უნდა აღინიშნოს, 8 ივლისს „ერთიანმა ნაციონალურმა მოძრაობამ“ და „სტრატეგია აღმაშენებელმა“ ახალი პოლიტიკური პლატფორმა „ერთიანობა საქართველოს გადარჩენისთვის“ წარადგინეს, რაც თავის მხრივ, ოპოზიციური პარტიების აზრით, არჩევნებში 5%-იანი ბარიერის გადალახვის შანსებს ზრდის.

ანალიტიკოს ვახტანგ ძაბირაძის შეფასებით, სტრატეგია, რაც ოპოზიციური პარტიების გაერთიანებას გულისხმობს, დადებითად იმოქმედებს თავად ოპოზიციაზე და „ქართული ოცნებისთვის“ საკანონმდებლო ორგანოში, 76 მანდატის მოპოვების შესაძლებლობას შეამცირებს. თუმცა, აქვე აღნიშნავს, რომ თუკი „ლელო“ და „გახარია - საქართველოსთვის“ გაერთიანდება, ამ ახალ ჯგუფს, ოპოზიციურ ფლანზე, ყველაზე მეტი ამომრჩეველი ეყოლება.

„ნაციონალური მოძრაობის“ ფრთაზე ახლა არის ორ პოლუსი: ერთი თავად „ნაციონალური მოძრაობა“ და მეორე არის „ახალი“. ვისურვებდი, რომ ამ ორი პოლუსიდან რომელიმესთან თავისი ადგილი მოძებნოს „ევროპულმა საქართველომ“ - მას ჰყავს მხარდამჭერები, მაგრამ არ მგონია, რომ 5%-იანი ბარიერის დაძლევა შეძლოს. ეს საბოლოოდ იმას ნიშნავს, რომ „ნაციონალური“ ელექტორატი არა მხოლოდ მივა არჩევნებზე, არამედ სრულად გადანაწილდება ამ ორ პოლუსზე, რის შედეგადაც მათ 5%-იანი ბარიერის დაძლევის პრობლემა არ ექნებათ.

ახლა მთავარი არის მესამე ელექტორალური ბაზა, რომელსაც „შუაშისტურ ელექტორატს“ უწოდებენ - რომელსაც არც "ქართული ოცნება“ მოსწონს და არც „ნაციონალური მოძრაობა“. მნიშვნელოვანია თუ როგორ დალაგდება „ლელოსა“ და გახარიას პოლუსებზე ეს ხალხი. ყველაზე კარგი ვარიანტი იქნება, თუკი შეიქმნება ერთპოლუსიანი ჯგუფი - გახარია და „ლელო“ მოძებნიან შეთანხმების საფუძველს, ამასთან, მათ თუ დაემატებათ ელისაშვილი და დოლიძე. თუ ეს მოხდება, ეს იქნება ყველაზე ძლიერი გაერთიანება ამ ოპოზიციურ ფლანზე“, - განაცხადა ვახტანგ ძაბირაძემ.

როგორც ანალიტიკოსმა აღნიშნა, მსგავსი კონფიგურაციის შექმნის შედეგად, დიდი შანსი არსებობს, რომ „ქართულმა ოცნებამ“ 35%-ზე მეტი ხმა ვერ აიღოს.

„ეს კონფიგურაცია ნიშნავს იმას, რომ „ქართული ოცნება“ არა მხოლოდ უმრავლესობას ვერ აიღებს, მისი მხარდაჭერა დარჩება დაახლოებით 35%-ის ფარგლებში. შესაბამისად, კოალიციური მთავრობა იქნება გარანტირებული. „ქართული ოცნება“ ახალს ვერაფერს შეიძენს - მას შეუძლია 76 მანდატის მოპოვება მხოლოდ იმ შემთხვევაში თუ ხმების ძალიან მნიშვნელოვანი ნაწილი გადაუნაწილებელი დარჩება და მხოლოდ სამი სუბიექტი გადალახავს 5%-იან ბარიერს. ამ შემთხვევაში, „ქართული ოცნება“ შეინარჩუნებს უმრავლესობას“, - დასძინა ვახტანგ ძაბირაძემ.

ამ ეტაპზე უცნობია საით წავა „ლელო“ და დარჩება თუ არა იმავე აზრზე ყოფილი პრემიერ-მინისტრის, გიორგი გახარიას „საქართველოსთვის“. უნდა აღინიშნოს ისიც, ამ დრომდე გახარიას ჯგუფი აცხადებს, რომ ოქტომბრის არჩევნებზე მარტო გადის. თუმცა, არჩევნებამდე 3 თვეზე მეტია დარჩენილი და ექსპერტთა ნაწილი მიიჩნევს, რომ ჯერ კიდევ არის დრო და არსებობს შანსიც, ამ კონკრეტულმა ოპოზიციურმა პარტიებმა რაიმე კონსენსუსს მიაღწიონ და არჩევნებისთვის გაერთიანდნენ.