პრემიერ-მინისტრსა და აშშ-ის, დიდი ბრიტანეთის და ევროკავშირის ელჩებთან შეხვედრის მთავარი თემა იყო „უცხოური გავლენის გამჭვირვალობის შესახებ“ კანონპროექტი. მთავრობის ადმინისტრაციაში გამართულ შეხვედრაზე ირაკლი კობახიძემ დიპლომატებს განუცხადა, რომ კანონი სრულად შეესაბამება ყველა ძირითად სამართლებრივ პრინციპს და ის ემსახურება ერთადერთ მიზანს - არასამთავრობო ორგანიზაციებისა და შესაბამისი მედიასაშუალებების ფინანსების ყოველწლიურ გასაჯაროებას.

შეხვედრაზე ირაკლი კობახიძემ აღნიშნა, რომ მაშინ, როდესაც ხელისუფლება თავად აჩვენებს გამჭვირვალობის მაგალითს და ქვეყნდება მთავრობის ყველა გადაწყვეტილება თუ სამართლებრივი აქტი, გაუგებარია, რატომ არის მიუღებელი არასამთავრობო ორგანიზაციებისთვის გამჭვირვალობის მინიმალური სტანდარტის დაკმაყოფილება. მთავრობის მეთაურმა კიდევ ერთხელ დაადასტურა ხელისუფლების სრული მზადყოფნა კანონთან დაკავშირებით ღია დისკუსიისთვის. დიპლომატებმა მთავრობის ადმინისტრაცია უკომენტაროდ დატოვეს.

როგორც ცნობილია, ირაკლი კობახიძემ აშშ-ის, ევროკავშირისა და ევროკავშირის წევრი ქვეყნების ელჩებს შესთავაზა გაიმართოს საჯარო დისკუსია „უცხოური გავლენის გამჭვირვალობის შესახებ“ კანონპროექტზე. როგორც კობახიძე აცხადებს, დარწმუნებულია, რომ „ხელისუფლების ლიდერებსა და ელჩებს შორის საგნობრივი დისკუსიის პირდაპირ ეთერში გადაცემის პირობებში, ქართული საზოგადოება შეიქმნის ბევრად უფრო ნათელ წარმოდგენას კანონპროექტის არსისა და სახელმწიფო სუვერენიტეტის დაცვისთვის მისი მიღების აუცილებლობის შესახებ.

„ჩვენ ვაფასებთ მოქმედი ელჩების ყველა მხარდამჭერ ნაბიჯსა და განცხადებას, რომელიც საქართველოს საერთაშორისო პოზიციების გამყარებისკენ არის მიმართული. შესაბამისად, მათ ყველა საფუძვლიან რჩევასა და რეკომენდაციას მომავალშიც განსაკუთრებული გულისხმიერებით მოვეკიდებით. საქართველოში უკანასკნელ წლებში დანერგილი პრაქტიკის შესაბამისად, უცხოელი დიპლომატები კვლავაც აქტიურად მონაწილეობენ ქვეყანაში მიმდინარე პოლიტიკურ დებატებში.

ისინი განსაკუთრებით ინტენსიურად ცდილობენ, შეითავსონ კანონმდებლის ფუნქცია, აქტიური მონაწილეობა მიიღონ კანონშემოქმედებით პროცესში და წარმომადგენლობითი დემოკრატიის უმთავრეს ორგანოს - ქართველი ხალხის მიერ არჩეულ პარლამენტს უკარნახონ, რომელი კანონი მიიღოს და რომელი - არა.

მიუხედავად იმისა, რომ პოლიტიკური ოპოზიციის ჩანაცვლების ეს პრაქტიკა დიპლომატიის სტანდარტებს არ შეესაბამება, ოპოზიციის პოლიტიკური და ინტელექტუალური რესურსების სიმწირის გათვალისწინებით, ჩვენ მას გარკვეულწილად გაგებით შეგვიძლია მოვეკიდოთ“, - აღნიშნულია ირაკლი კობახიძის განცხადებაში.

პარლამენტის თავმჯდომარე გამოხატავს მზაობას, ჩაერთოს პრემიერ-მინისტრის მიერ შეთავაზებულ საჯარო დისკუსიაში, რათა კიდევ ერთხელ საზოგადოებას ამომწურავი პასუხი გაეცეს ნებისმიერ კითხვაზე, რომელიც ამ კანონპროექტის გარშემო არსებობს. შალვა პაპუაშვილი იმედოვნებს, რომ ამ შემთხვევაში დიპლომატები საქართველოს საუკეთესო ინტერესებიდან გამომდინარე იმოქმედებენ.

„საჯაროობა დემოკრატიის საფუძველია. დიპლომატიური საქმიანობისთვის უცნაური მოვლენაა, როდესაც უცხოელი დიპლომატები საქართველოში მიმდინარე პოლიტიკური დებატების უშუალო მონაწილედ მიიჩნევენ თავს. როგორც წესი, ასეთ დროს გარე მონაწილეებისთვის შეუძლებელია ხოლმე ცხარე პოლიტიკურ კამათში ობიექტური შეფასებების შენარჩუნება, რაც აჩენს რეპუტაციული ზიანის რისკებს. ჩვენ ყოველთვის დიდი პასუხისმგებლობით ვეკიდებოდით მსგავს საკითხებს და მაქსიმალურად ვცდილობდით სამუშაო ფორმატებში აზრთა ურთიერთგაცვლას. ჩვენ გვჯერა, რომ ჩვენი ქვეყნის მეგობრები საქართველოს საუკეთესო ინტერესებიდან გამომდინარე იმოქმედებენ და პასუხისმგებლობით მოეკიდებიან ქვეყნის უსაფრთხოების და სუვერენიტეტის საკითხებს“, - წერს შალვა პაპუაშვილი.

მმართველ გუნდს აქვს მოლოდინი, რომ დიპლომატიური კორპუსი პრემიერის შეთავაზებას მიიღებს. როგორც „ქართული ოცნების“ დეპუტატი ბექა დავითულიანი აცხადებს, „ქართული ოცნება“ ხშირად სცოდავდა, როცა ელჩებს გამშველებლის როლში იწვევდნენ. მისი თქმით, შიგნით რა ცვლილება აქვს, არც ერთი ელჩის საქმე არ არის, რადგან, როგორც დეპუტატი აცხადებს, პარტნიორებს ჰგონიათ, რომ აღნიშნული კანონპროექტი არასამთავრობო სექტორის პრობლემებს შეუქმნის, იმიტომ, რომ მათ ქვეყნებში NGO-ები ისე არ იქცევიან, როგორც საქართველოში.

„არც ერთი უცხოური ქვეყნის ოფიციალური წარმომადგენლის საქმეში, შიდა პოლიტიკაში ჩარევა არ ღირს. ამას მე ვამბობ ცალსახად. ამ მხრივ „ქართული ოცნებაც“ ხშირად სცოდავდა, როცა მათ რაღაცნაირ გამშველებლის როლში ვიწვევდით ხოლმე. ეს არ შეიძლება რომ იყოს დაშვებული. ელჩის საქმე არის მის სახელმწიფოსა და ქართულ სახელმწიფოს შორის კონტაქტების დამყარება, მეტი არაფერი.

შიგნით მე რა მაქვს ცვლილება, არც ერთი ელჩის საქმე არ არის და ამაზე ზეგავლენის მოხდენის უფლება არავის აქვს, მაგრამ ვინაიდან შექმნილია ეს სიტუაცია და რაღაცნაირად მიჩვეულია ჩვენი დიპლომატიური კორპუსი, ჩვენი საზოგადოებაც რომ ეს ესე ხდება და ელჩები პრაქტიკულად, ჩვენს შიდა პოლიტიკაში მონაწილეობენ, ირაკლი კობახიძემ შესთავაზა დისკუსია. ევროკავშირის ქვეყნებს პოლიტიკოსების წარმომადგენლები ვერ ხვდებიან NGO სექტორი თუ შეიძლება რეალურად მართლა იყოს გამოყენებული იმ მიზნებით, რითიც საქართველოში გამოყენება, იმიტომ, რომ იქ, როგორც წესი, ასე არ ხდება,“ - განაცხადა ბექა დავითულიანმა.

ასე არ ფიქრობს რადიკალური ოპოზიცია. „ლელოს“ წევრის დავით უსუფაშვილის განცხადებით, როცა ელჩებს რაიმე საქმე აქვთ, ისინი საგარეო საქმეთა მინისტრს ხვდებიან, პრემიერთან შეხვედრა კი ნიშნავს უმაღლეს დონეზე აწეულ პროტესტს, რომ საერთაშორისო საზოგადოება კობახიძის გამოხტომებს, ჭკუა ასწავლოს ელჩებს, არ შეეპუება.

„ირაკლი კობახიძემ აშკარად სახელისუფლებო თრობის ახალ მწვერვალებს მიაღწია და ამ ძილბურანიდან ადგენს ახალ მსოფლიო წესრიგს, მიმართავს ელჩებს და უცხო ქვეყნის მთავრობებს, რომ ის მზადაა მათ ჭკუა ასწავლოს, განუმარტოს, რა არის შავი და თეთრი. ის მზადაა, ევროპელ ლიდერებს განუმარტოს ევროპული ღირებულებები, კანონმდებლობა და ის, თუ რატომ არ შეესაბამება თუ შეესაბამება იმ ღირებულებებს ჩვენი კანონმდებლობა.

ძალიან სამწუხაროა, საქართველოზე შესაძლოა ვინმეს ასეთი შთაბეჭდილება დარჩეს, მაგრამ კარგია, რომ უცხოეთი საქართველოში იცნობს არამხოლოდ ასეთ უმწიფარ პოლიტიკოსებს, რომელსაც ქვეყნის მართვა კი არა, ორი ადამიანი არ შეიძლება ენდოს და იციან, რომ ამ ყველაფერზე ქართველ ხალხს სხვა წარმოდგენა აქვს. როდესაც შედიხარ კავშირში, იქით გაქვს შესასრულებელი გარკვეული პირობები, რომ იმ კავშირში მიგიღონ და იმ კავშირს, მთელ სახელმწიფოებს ეუბნები, რომ მზად ვარ მოვიცალო, ჭკუა დაგარიგოთ და გასწავლოთო, მოდით და გეტყვითო, რაში ჯდება ყველამ კარგად ვიცით. როცა ელჩები უშუალოდ პრემიერ-მინისტრთან მიდიან შეხვედრაზე, ეს არის საგანგებო მდგომარეობა“,- განაცხადა დავით უსუფაშვილმა.

პოლიტოლოგ რამაზ საყვარელიძის განცხადებით, რა თქმა უნდა, ასეთი ხისტობა, რომელიც კობახიძემ გამოიჩინა, არ არის ტიპური და არც ახსენდება ანალოგიური რამ, რადგან კობახიძის ინიციატივა, ფაქტობრივად, არ არის კონკრეტული დიპლომატების დებატებში გამოწვევა, არამედ ეს არის ამ ქვეყნების დებატებში გამოწვევა.

„ვიცით, რომ ელჩი წარმოადგენს თავისი ქვეყნის პოლიტიკას, ასე რომ, ეს უფრო რთული ტიპის ნაბიჯია. არ ვიცი, ამ ტიპის სიხისტეზე რომ წავიდა კობახიძე, რამე პრეცედენტი ჰქონდა თუ არა, მაგრამ მეორე მხრივ დავუშვათ, რომ უპეცედენტო ინიციატივა წარმოაგინა ქართულმა მხარემ. ვნხოთ, რა ნიბიჯი მოჰყვება. იმიტომ, რომ უარის თქმა ამ ქვეყნების ელჩებს გაუჭირდებათ.

ჩვენი და ჩვენნაირი პატარა სახელმწიფოების როლი ასეთია, რომ ჩვენ სხვების ხელის ქნევა თითის ქნევად უნდა მივიღოთ და ჩვენ თვითონ მორიდებულად ვიქცეოდეთ. მაგ შაბლონის დარღვევა უნდა ახლა კობახიძეს. იმიტომ, რომ ეს ელჩებთან დებატები არ არის, ეს ქვეყნებთან დებატებია და ელჩმა თავისი ქვეყნის პოზიცია უნდა დადოს ამ საკითხთან დაკავშირებით. ანუ, კობახიძე აიძულებს ელჩებს, რომ ოფიციალურად დადონ თავიანთი პოზიცია კანონთან დაკავშირებით, თან იმ ანგარიშით, რომ კობახიძესაც რჩება პასუხის გაცემის საშუალება. კობახიძე კი ადვილი მეტოქე არ არის“, - აცხადებს for.ge-სთან საუბრისას რამაზ საყვარელიძე.

მისივე თქმით, თუკი სახელმწიფო შენ გსაყვედურობს, რომ არასწორი გზით მიდიხარ, ამ სახელმწიფოს იწვევ დებატებში, რაც ნორმალური მოვლენაა. როგორც პოლიტოლოგი აცხადებს, ეს დისკუსია შედგა გერმანიის კანცლერსა და პრემიერ-მინისტრს შორის, სადაც იქაც კობახიძემ მკვეთრად დააფიქსირა თავისი პოზიცია და არ გაუწია ანგარიში შოლცის პოზიციას.

„არ მოეპათხალიმა შოლცს და ხაზი გაუსვა, რომ საქართველო აპირებს და მიიღებს კიდეც ამ კანონოსო. ყველა პოლიტიკას შეიძლება დაეთანხმო, ან შეეწინააღმდეგო. აგერ, რუსეთის პოლიტიკა მიუღებელია და დიპლომატიური ურთიერთობაც კი გვაქვს გაწყვეტილი. თუკი სხვა ქვეყნის პოლიტიკა არ მოგწონს, არ შეიძლება შეკამეთება და თქვა, რომ მიუღებელია მისი პოლიტიკა?! საბჭოთა კავშირის შემადგენლობაში რომ ვიყავით, მაშინ იყო ასეთი პოზიცია, რომ მოსკოვი თუ რამეს იტყოდა, ეს განაჩენი იყო. ხომ არ ვაგრძელებთ იგივე დამოკიდებულებას ოღონდ უკვე ევროპის მიმართ?

როგორც ჩანს, ეს ჭია ზის ჯერ კიდევ და კიდევ დიდ ხანს იჯდება ჩვენში. ალბათ, მეტი ნაბიჯები უნდა გადადგას საქართველომ დამოუკიდებელი პოლიტიკის გატარებისკენ, რომ ქართველებმა იწამონ, რომ ისინი არ არიან მოწაფეები. გავიხსენოთ, ბორელმა გვითხრა კიდეც, რომ ჩვენ მასწავლებლები ვართ და თქვენ მოწაფეებიო. ჩვენში ამ დამოკიდებულებამ დიდი პროტესტი არ გამოიწვია.

ძალაუნებურად, ჯერჯერობით, მოწაფის როლიდან მთლად არ ვართ გამოსული და ამიტომ გაჩნდა ეს დამოკიდებულება, რომ მოწაფეებად გვთვლის ევროპა. ალბათ, ისტორიული მოვლენები უნდა მოხდეს საიმისოდ, რომ ასეთი დამოკიდებულება გადავიდეს დღის წესრიგიდან და თვითონ ქართველების ცნობიერებაში დაიკავოს ქართულმა პოლიტიკამ უფრო დიდი ადგილი და ქართული პოლიტიკური ხაზი არ აღიქმებოდეს როგორც მოსწავლის კაპრიზი“, - აცხადებს for.ge-სთან საუბრისას რამაზ საყვარელიძე.