საქართველოს პრეზიდენტი მართლმადიდებლურ ეკლესიასაც გადასწვდა. ამჯერად სალომე ზურაბიშვილის სამინიზნე პატრიარქი გახდა. ლონდონში, საერთაშორისო საქმეთა სამეფო ინსტიტუტში სტუმრობისას, მან ისაუბრა პრორუსული ჯგუფების და ანტიდასავლური პროპაგანდის მხარდასაჭერ დაფინანსებაზე და აღნიშნა, რომ დარწმუნებულია, ქართული ეკლესია მოახერხებს პროქართული და პროევროპული პატრიარქის არჩევას და არა პრორუსის.

ზურაბიშვილი ამბობს, რომ ეკლესიაში კომპლექსური ვითარებაა, რისი მიზეზიც დღეს პატრიარქის სისუსტეა, რომელმაც აქამდე ძალიან მტკიცედ შეინარჩუნა ეკლესიის ძველი მეთოდები. ზურაბიშვილი აცხადებს, რომ საქართველოს ეკლესია რუსეთის რბილ ძალას წარმოადგენს. თუმცა, რას ეფუძნება მისი ეს ბრალდება, ამ თემაზე არ უსაუბრია.

„ვფიქრობ, მართლმადიდებლური ეკლესია, ისევე როგორც ნებისმიერ სხვა მართლმადიდებლურ ქვეყანაში, ძალიან ახლოს არის ძალასთან და მიდრეკილია აჰყვეს თანამედროვე მიდგომას, მე ვიტყოდი, მიდრეკილია ნიუანსების ცვლილებისკენ. ასე რომ, იმედი მაქვს, რომ ეკლესია, ამ შემთხვევაშიც, პროდასავლურ რიტორიკას მიჰყვება და რადგან მე ვარ ოპტიმისტი და დარწმუნებული ვარ საქართველოს გამძლეობაში, ქართული ეკლესია მოახერხებს პროქართული და პროევროპული პატრიარქის არჩევას და არა პრორუსის“, - აღნიშნა სალომე ზურაბიშვილმა.

ლონდონში გაკეთებენ ხმაურიან განცხადებას უპასუხეს თბილისში. საპატრიარქოს საზოგადოებასთან ურთიერთობის სამსახურის ხელმძღვანელის მამა ანდრია ჯაღმაიძის განცხადებით, პრეზიდენტისთვის, რომელსაც თავი ეკლესიის მრევლად მიაჩნია, ეთიკას მოკლებულია მოქმედი პატრიარქის სისუსტეზე და პატრიარქის ცვლილებაზე საუბარი, სხვა საკითხია, რომ ეს ეკლესიის საქმეებში უხეში ჩარევაა.

„ბევრ კითხვებს ბადებს ქალბატონ პრეზიდენტის ბოლო კომენტარი ეკლესიასთან მიმართებაში. გაუგებარია რას გულისხმობდა ქალბატონი პრეზიდენტი „ეკლესიის ძველ მეთოდებზე“, ისევე, როგორც ეკლესიის მხრიდან „პროდასავლური რიტორიკის მიყოლის“ შესახებ საუბრისას. რას ნიშნავს ეკლესია „ახლოსაა ძალასთან“? სამწუხაროა ასეთი ზედაპირული და შაბლონური დამოკიდებულების მოსმენა პრეზიდენტის სიმაღლიდან და ქართულ ეკლესიაში პროქართულ, პროევროპულ თუ პრორუსულ არჩევანზე საუბარი ჩრდილს აყენებს და აკნინებს, არა იმდენად ეკლესიას, რამდენადაც თავად კომენტარის ავტორს“, - წერს მამა ანდრია ჯაღმაიძე.

ზურაბიშვილმა, რომელმაც დაარღვია ეთიკა, როდესაც მოქმედი პატრიარქის სისუსტეზე და პატრიარქის ცვლილებაზე ისაუბრა, დამატებითი განმარტებები არ გაუკეთებია. თუმცა, ცხადია, რომ საქართველოში დაბრუნების შემდეგ მოუწევს კითხვებზე პასუხის გაცემა რას გულისხმობდა გამონათქვამში: „ქართული ეკლესია მოახერხებს პროქართული და პროევროპული პატრიარქის არჩევას და არა პრორუსის“.

პრემიერ-მინისტრის განცხადებით, კომენტარის გაკეთებაც კი არ შეიძლება განცხადებაზე, რომელიც ზურაბიშვილმა საპატრიარქოსთან დაკავშირებით გააკეთა.

„ასეთი განცხადებები გამაოგნებელია. ყველაფერს რომ თავი დავანებოთ, ასეთი განცხადებებით საკუთარ იმიჯს აზიანებს. ამ თემაზე მეტი კომენტარის გაკეთება არ მინდა“, - აღნიშნა ირაკლი კობახიძემ.

მმართველ გუნში აცხადებენ, რომ ეს არის პრეზიდენტის მხრიდან პირდაპირი ჩარევა ეკლესიის საქმეებში. პარლამენტის საგარეო ურთიერთობათა კომიტეტის თავმჯდომარის, ნიკოლოზ სამხარაძის განცხადებით, პატრიარქი იმის მიხედვით კი არ უნდა ავირჩიოთ, როგორი პოლიტიკური გემოვნება აქვს, არამედ როგორი მღვდელმთავარი და როგორი სულიერი წინამძღოლი იქნება.

„პრეზიდენტი ამ საკითხში როცა ერევა, თავისთავად, ეს სახელმწიფოსა და ეკლესიას შორის გამიჯვნის წინააღმდეგ გადადგმული ნაბიჯია. მისი განცხადებით მართლა გაკვირვებული და გაოცებული ვარ. ჩვენ გვყავს მოქმედი პატრიარქი, შესაბამისად, ეს ადამიანი არის ჩვენი ერის სულიერი წინამძღოლი. ჰიპოთეტურ საკითხებზე საუბარი და შემდეგ იმის გარკვევა, როგორი პოლიტიკური გემოვნება ექნება ამა თუ იმ მღვდელმთავარს, პრეზიდენტის საქმე არ არის. ეს განცხადება არაფერში წერია“, - განაცხადა ნიკოლოზ სამხარაძემ.

ზურაბიშვილის მიერ ლონდონში, საერთაშორისო საქმეთა სამეფო ინსტიტუტში გაკეთებულ განცხადებას იზიარებს ოპოზიცია. „ლელოს“ წევრი სალომე სამადაშვილი ამბობს, რომ ზურაბიშვილმა გამოხატა სურვილი, რომ საქართველოს ეკლესია იქნება ქართველი ხალხის გვერდით.

„პრეზიდენტმა ზურაბიშვილმა გამოხატა იმედი და სურვილი, რომ საქართველოს ეკლესია იქნება ქართველი ხალხის გვერდით იმ მთავარი ამოცანის შესასრულებლად, მთავარი ეროვნული მიზნის განხორციელებაში, რომელიც ჩვენ ავირჩიეთ - ჩვენი ქართველი ხალხის მომავალი არის ევროკავშირში“, - განაცხადა სალომე სამადაშვილმა.

ანალიტიკოს ზაალ ანჯაფარიძის შეფასებით, ძალიან გულუბრყვილო და შეუგნებელი უნდა იყოს მავანი, რომ ვერ ჩაწვდეს პროცესების განვითარების ლოგიკას. მისი თქმით, გასაგებია, რომ საპატრიარქო ჯერ იმაზე მეტს ვერ იტყვის, რაც თქვა, მაგრამ ლოგიკური კითხვა ჩნდება - სად არის ქართული საზოგადოება, სად არის მართლმადიდებლური მრევლი?

„ვატარებთ ამ ერთ პროვოკაციას, რომელიც შეიძლება უფრო მასშტაბურ პროვოკაციაში გადაიზარდოს? დაფიქრდით მეგობრებო! როგორც მართლმადიდებელ მრევლს, მიმაჩნია, რომ საპატრიარქომ რეაგირება უნდა მოახდინოს პრეზიდენტად წოდებულის ამ მორიგ მავნებლურ განცხადებაზე. ეს არის როგორც მინიმუმ, შიდა საეკლესიო საქმეებში უხეშად ჩარევა და პირდაპირი დარღვევა სახელმწიფოსა და მართლმადიდებელი ეკლესიას შორის დადებული კონკორდანტის“, - აცხადებს ზაალ ანჯაფარიძე.

ანალიტიკოსი, „ხალხის ძალის“ წევრი დავით ქართველიშვილი ამბობს, რომ ზურაბიშვილმა ყველა წითელი ხაზი გადაკვეთა, რომელმაც ჯერ ცოცხალი პატრიარქი უკვე დაასაფლავა და მისი შემცვლელის არჩევნებში იღებს მონაწილეობას. როგორც ქართველიშვილი ამბობს, პრეზიდენტს რეალურად ემუქრება ისტორიული სასახლიდან გათრევა.

„ამ უსამშობლო, ურწმუნო არსებამ პრორუსი არ მინდაო - ან პროევროპელი, ან ჯანდაბას პროქართველი იყოსო. რა „ეკლესიის ძველი მეთოდები“ შეინარჩუნა? ან რა ენაზე გველაპარაკება ეს ქართველთმოძულე ანტიმართლმადიდებელი? რა „მეთოდებს“ უწუნებს 2-ათასწლიანი ისტორიის მქონე ჩვენს ეკლესიას ეს ყველანაირ ზღვარს გადასული „ნეიტრალური გენდერი“? რა „ნიუანსების ცვლილებისკენ“ არის მიდრეკილი ჩვენი სარწმუნოების ბურჯი? მთვრალია თუ შეპყრობილი? ამას ვინმე გააჩერებს? რა „პროდასავლური რიტორიკა“? სად? საკურთხეველში თუ ამბიონიდან? ამას მართლა გამოათრევენ ჩვენი ისტორიული სასახლიდან“, - აღნიშნა დავით ქართველიშვილმა.