პარტია „ქართული ოცნების“ აღმასრულებელი მდივანი, ფრაქცია „ქართული ოცნების“ თავმჯდომარე მამუკა მდინარაძე ოპოზიციური არხების ჟურნალისტებს მიმართავს ჩამოყალიბდნენ იმაზე, პრემიერ-მინისტრ ირაკლი ღარიბაშვილის მამა ტარიელ ღარიბაშვილი პენსიონერია, რომელიც მხოლოდ პენსიაზეა ფინანსურად დამოკიდებული, თუ სხვადასხვა ბიზნესს ფლობს.
„რაც შეეხება ამ [თბილისი-მიუნხენის ჩარტერულ რეისში გადახდილ] თანხებს, როცა გჭირდებათ ირაკლი ღარიბაშვილის მამა ტარიელ ღარიბაშვილი არის ღატაკი, ღარიბი და პენსიის გარდა არანაირი შემოსავალი არ აქვს და თუ „საჭირო გახდება“, ღვინის ქარხნები, ბიზნესები აქვს. რანაირად არის ეს ამბავი, ამაზეც ჩამოვყალიბდეთ. კულისებიდან რომ ავრცელებთ ხოლმე ინფორმაციებს, აქვს ღვინის ქარხანა, ან სოფლის მეურნეობასთან დაკავშირებული ბიზნესები, თუ არა?! ჩამოვყალიბდეთ ამ კაცს რაღაც ბიზნესი გააჩნია, თუ არ გააჩნია. პირადად პრემიერ-მინისტრისთვის არასდროს დამისვამს კითხვა მამის ბიზნესებთან დაკავშირებით, თუმცა მსმენია, რომ მას რაღაც ბიზნესები აქვს, ჰქონდა თანხა და გადაიხადა შვილიშვილის გამგზავრებაში. ასეთი ინფორმაცია ვრცელდება და ჩემთვის სარწმუნოა. დაელოდეთ, დეკლარაციაში ჩაიწერება ყველაფერი. მიმდინარეობს შეტევა ირაკლი ღარიბაშვილზე, რომ სააკაშვილს ჩამორეცხონ ათეულობით და ასეულობით [სახელმწიფო ბიუჯეტიდან გახარჯული] მილიონი, მაგრამ არ გამოდის“, - განაცხადა მდინარაძემ.
