უძრავი ქონების ფასი კორექტირებას განიცდის. ჯერ გაქირავების მიმართულებით შეინიშნება მცირედი შემცირება, რომელსაც შემდეგ ბინების სარეალიზაციო ღირებულებაც მიჰყვება. ფასთა კლების მთავარი მიზეზი არის ის, რომ ბაზარზე მოთხოვნამ შესამჩნევად იკლო, მესაკუთრებმა კი ფასი ისევ მაღალ ნიშნულზე დატოვეს, რაც რეალობას არანაირად არ შეესაბამება. ამიტომ დროთა განმავლობაში მათ ბაზრის კანონების გათვალისწინება მოუწევთ.

2023 წლის აპრილში თბილისში საცხოვრებელი ბინების ტრანზაქციების რაოდენობამ 2537 ერთეული შეადგინა და წინა წლის აპრილთან შედარებით 27%-იანი კლება დაფიქსირდა. ბაზრის ზომა კი 22%-ით, 141 მილიონ აშშ დოლარამდე შემცირდა.

„ქოლიერს ჯორჯიას“ უძრავი ქონების ვებ-გვერდზე განახლებული ინფორმაციით, 2023 წლის აპრილში თბილისში ახალ პროექტებში ტრანზაქციების 31%-იანი კლება ფიქსირდება, გასული წლის აპრილთან შედარებით. ძველ პროექტებში კი, მაჩვენებელი 18%-ით არის შემცირებული.

ამასთან, თბილისში, გასული წლის ანალოგიურ პერიოდთან შედარებით, ახალაშენებულ ეკონომ სეგმენტის ბინებზე მოთხოვნა 42%-ით შემცირდა, მედიუმ და პრემიუმ სეგმენტში კი მაჩვენებლის 9% და 2%-იანი კლება დაფიქსირდა.

დედაქალაქში ახალაშენებული ბინების საშუალო შეწონილი გასაყიდი ფასი, გასული წლის ანალოგიურ პერიოდთან შედარებით, 10%-ით გაიზარდა გარეუბნებსა და ფართო ცენტრში, ქალაქის ცენტრში კი - 1%-იანი ზრდა დაფიქსირდა, ხოლო ძველი ბინების საშუალო შეწონილი გასაყიდი ფასი 5%-ით გაიზარდა გარეუბნებში, ფართო ცენტრში 2%-იანი ზრდა დაფიქსირდა, ქალაქის ცენტრში კი მაჩვენებელი 1%-ით შემცირდა.

როგორც „რემაქს კაპიტალის“ ხელმძღვანელი მარიამ ასათიანი აცხადებს, შარშან რუსეთის და ბელარუსის მოქალაქეების შემოდინების დროს გასაქირავებელ ბინებზე ფასები მკვეთრად გაიზარდა, თუმცა ახლა ცოტა დაკორექტირდა და ფასების ზრდა შენელდა. თუ ადრე ბინები სწრაფად ქირავდებოდა, ახლა არის ფართები, რომლებიც კვირების განმავლობაში გაუქირავებელია.

„თუ მესაკუთრეებს სურთ, რომ მათი ბინა სწრაფად გაქირავდეს, მაშინ ფასი უნდა დააკლონ. ისეთი მოთხოვნა აღარ არის, როგორც შარშან იყო. ღირებულება დარჩა უფრო მაღალი, ვიდრე რეალობაა ბაზარზე. ამიტომ, სავარაუდოდ, შეიძლება კიდევ ცოტათი დაიკლოს ფასმა, ეს ეხება ცენტრში მდებარე შედარებით პატარა ბინებს.

პანდემიის ორწლიან პერიოდში გასაქირავებელ ბინაზე ღირებულებამ დაიწია, შემდეგ არაბუნებრივად გაზრდილმა მოთხოვნამ ფასი გაზარდა და ახლა პანდემიამდელ პერიოდზე მაღალია. ბოლო 5 წლის განმავლობაში გასაქირავებელი ბინის ფასი ძალიან დიდია, თუმცა შარშანდელთან შედარებით, კლება შეინიშნება“, - განაცხადა „კომერსანტთან“ მარიამ ასათიანმა და დასძინა, რომ ძირითადი მოთხოვნა ცენტრალურ უბნებზეა, შესაბამისად ცენტრში ბინების დაქირავება უფრო ძვირია.

როდესაც საქართველოში რუსეთისა და ბელარუსის მოქალაქეები ჭარბად იყვნენ შემოსულები და ცენტრში გასაქირავებელი ბინები აღარ იყო, მოთხოვნამ პერიფერიებშიც მოიმატა და იქ ფასის სწრაფი ზრდა დაფიქსირდა, თუმცა დღეს გარეუბნებში ღირებულება კიდევ უფრო დაკორექტირდა, ვიდრე ცენტრალურ უბნებში.

უძრავი ქონების ბაზარზე მოთხოვნის და ფასების ოდნავ შემცირება მართლაც შეინიშნება, თუმცა „ემქეი დეველოპმენტ გრუპის“ დამფუძნებელი მალხაზ კუნელაურის ინფორმაციით, ომის ფაქტორიდან გამომდინარე, შემოსული მიგრანტებისგან მოთხოვნა ისევ არსებობს.

„ომის ფაქტორი და არსებული მიგრაცია მაშინაც იყო და ახლაცაა. ზუსტი ციფრების დასახელება არ შემიძლია, მაგრამ რომ ვთქვა თითქოს ამ კონტიგენტის მხრიდან მოთხოვნა ძალიან შემცირდა, არ იქნება მართალი. ომის ფაქტორიდან გამომდინარე, ქვეყანაში შემოსული მიგრანტებისგან მოთხოვნა ისევ არსებობს.

ყოველდღიურად თუ არა, ხშირი პერიოდულობით იმატებს სამშენებლო მასალების ფასი. ეს დაკავშირებულია არა მხოლოდ რეგიონში შექმნილ საომარ მოქმედებასთან, არამედ თურქეთში (ერთ-ერთი ძირითადი მომწოდებელი) მომხდარ მიწისძვრასთანაც. არის სერიოზული კრიზისი, მეზობელი ქვეყნიდან მოწოდება შემცირდა და რიგ შემთხვევებში გაიზარდა ფასი. ბევრი ასეთი ფაქტორი სამშენებლო მასალების შემოტანაზე და ფასზე ახდენს გავლენას, რაც საბოლოო აისახება ბინების ღირებულბაზე“, - განაცხადა კუნელაურმა.

სავარაუდოა, რომ შემოდგომიდან, როდესაც ტურისტული სეზონი და ახალი სასწავლო წლის პროცესიც დასრულდება, უძრავი ქონების ბაზარზე ცვლილებები უფრო თვალშისაცემი იქნება.