თორნიკე შენგელიას „ვირტუს ბოლონიამ“ ევროლიგაზე ასპარეზობა დაასრულა. სერჯო სკარიოლოს გუნდი ბოლო ტურში იტალიურ დერბიში „ოლიმპია მილანოს“ დაუპირისპირდა, რომელიც 89:84 დაამარცხა.
ბოლონიელები პირველი ტაიმის შემდეგ 8 ქულით აგებდნენ, მაგრამ მეორე ნახევარში გაცილებით მაღალ დონეზე ითამაშეს და საბოლოო გამარჯვებაც მოიპოვეს.
შენგელია ერთ-ერთი საუკეთესო იყო. ქართველმა კალათბურთელმა 27 წუთში 15 ქულა, 2 მოხსნა, 7 პასი, 2 ჩაჭრა და 1 დაფარება მიითვალა. თორნიკემ 7-დან 4 ორქულიანი, 2-დან 1 სამქულიანი და 5-დან 4 საჯარიმო ჩააგდო, მისი მარგი ქმედების კოეფიციენტი კი 23-ს გაუტოლდა, რითაც მხოლოდ დანიელ ჰაკეტს ჩამორჩა, რომელმაც 25 ქულა და 10 პასი დააგროვა.
„ვირტუს ბოლონიამ“ ევროლიგის რეგულარული სეზონი 14 მოგებით და 20 წაგებით დაასრულა, რაც პლეი-ოფისთვის საკმარისი არ გამოდგა. იტალიურმა გუნდმა მე-14 ადგილი დაიკავა.
