საქართველოში უძრავი ქონება იმდენად გაძვირებულია, რომ ქირის ღირებულებამ იპოთეკის გადასახადს გადაასწრო. აღნიშნული საქმიანობა მოსახლეობისთვის არა მხოლოდ იპოთეკის გადაფარვის, არამედ შემოსავლის წყაროდ იქცა, რაც აქამდე არასდროს არ დაფიქსირებულა.

ასეთი ვითარება უკრაინაში ომის დაწყების შემდეგ შეიქმნა. მიგრანტების ორმა ნაკადმა საქართველოში უძრავ ქონებაზე ჭარბი მოთხოვნა გააჩინა და ბინებიც წარმოუდგენლად გააძვირა. ახლა, ბაზარზე განსაკუთრებულად მზარდი მოთხოვნა აღარ შეინიშნება, თუმცა პიკური გადასახადი დღემდე შენარჩუნებულია. მეტიც, სხვადასხვა კვლევითი ორგანიზაციების წინასწარი პროგნოზით, წლის განმავლობაში ბინების ფასი, შესაძლოა, კიდევ 18%-ით, ხოლო დაქირავების 28%-ით გაიზარდოს.

დედაქალაქის შემდეგ მოთხოვნა იზრდება ზღვისპირა რეგიონებზე. სპეციალისტების გათვლით, ტურისტულ ზონებში, დედაქალაქთან შედარებით, უძრავი ქონება ჯერ კიდევ იაფია, თუმცა სეზონის მიხედვით დაქირავების ფასი მზარდია. ამ მხრივ, გამორჩეულია გურია, რომელიც როგორც მთის, ისე ზღვის მოყვარული ადამიანებისთვის ყოველთვის მიმზიდველი იყო, თუმცა, ბოლო წლების განმავლობაში რეგიონის პოპულარობა კურორტ შეკვეთილის ფაქტორმა კიდევ უფრო გაზარდა.

უძრავ ქონებაზე ემიგრანტების მხრიდანაც დიდი დაინტერესება იკვეთება. როგორც წესი, უცხო ქვეყანაში მყოფ საქართველოს მოქალაქეებს ბინის შეძენა და უძრავი ქონების შემოსავლის წყაროდ ქცევა ჩამოსვლამდე ურჩევნიათ. განსაკუთრებით იმ პირობებში, როდესაც შესაძლებელია ბინის შეძენა დისტანციურად, სესხით ან შიდა განვადებით, მათზე მორგებული პირობებითა და რაც მთავარია, ადგილზე გაქირავების სერვისით.

მზარდი მოთხოვნაა ზამთრის კურორტებზე, სადაც დამსვენებლების უმეტესობა უცხოელია. გაზრდილმა მოთხოვნამ უძრავი ქონება სამთო-სათხილამურო ზონებშიც გააძვირა.

უძრავი ქონების ბაზარზე დღეს ფასები 15-20%-ითაა გაზრდილი. სამშენებლო დეველოპერული კომპანია „დომუს ჯგუფის“ მმართველი პარტნიორი ადასტურებს, რომ მიგრანტების ნაკადმა საკმაოდ დიდი მოთხოვნა გააჩინა და მოსალოდნელია, რომ ეს ტენდენცია შენარჩუნდება.

„გამკაცრდა რეგულაციები, კოეფიციენტები. ცენტრალურ უბნებში გართულდა ახალი პროექტების აღება. აქედან გამომდინარე, სექტორი ახლა ფიქრობს და იძულებულია, რომ ახალი შესაძლებლობები იპოვოს, განვითარდეს უფრო ქალაქგარეთ, უბნების კონცეფციები შექმნას.

ჩვენც აქტიურად ვმუშაობთ უბნების კონცეფციებზე, თუმცა, ჩვენი კომპანია რადგანაც მაღალ სეგმენტშია წარმოდგენილი, ჯერ კიდევ აქვს დარჩენილი პროექტები, რომელსაც, ვფიქრობთ, რომ განვახორციელებთ.

მომავალში, მოსალოდნელია, რომ ეს ტენდენცია შენარჩუნდება, რადგან ძალიან დიდი ნაკადი შემოვიდა პოსტსაბჭოთა ქვეყნებიდან.

ასევე, ძალიან ბევრი ემიგრანტი დაბრუნდა, რომელმაც ინვესტიციები განახორციელა. განვითარებადი ქვეყანა ვართ და, რა თქმა უნდა, მიმზიდველია დასავლეთის ქვეყნებისთვის ინვესტიციების განხორციელება საქართველოს უძრავ ქონებაში.

დღეს რომ შევადაროთ და საშუალო სეგმენტი ავიღოთ საბურთალოს რაიონში, ფასები გაზრდილია 20-30 პროცენტით. ტენდენცია გვაჩვენებს, რომ მზარდი მოთხოვნიდან გამომდინარე მინიმუმ, შენარჩუნდება ფასი, მაგრამ შეიძლება, 10-15%-ით კიდევ ველოდოთ ზრდას.

არ არის პროგნოზირებადი, რადგან, მაგალითად, ვაკის რაიონში, როდესაც 2000 დოლარი იყო, დღეს 3000 – 3500 დოლარზეა ფასი“, - აცხადებს განაცხადა კომპანიის მმართველმა პარტნიორმა გიორგი გიორგაძემ.

სამშენებლო სფეროს სამართლის სპეციალისტი უჩა ზაქაშვილი გაზრდილი ფასების შემცირების ტენდენციას ვერ ხედავს.

„რამდენადაც ვეცნობი სხვადასხვა კვლევებს, მოთხოვნა-მიწოდება ჯერ კიდევ პრობლემურია. შეიძლება სხვები არ შემოდიან ქვეყანაში, მაგრამ თუ ძველი მოიჯარეები აქ დარჩებიან, მაშინ, ეს მოცემულობა ბაზარს ვერ გააიაფებს. იმ შემთხვევაში, თუ ძალიან ბევრი ბინა დაიცლება, ეს იქნება იმის წინაპირობა, რომ ღირებულება შემცირდეს.

ფაქტორები გასაგებია, მაგრამ დღეს არსებული ფასები რომ რეალობას არ შეესაბამება და გაბერილია, ამის თქმა ცალსახად შეგვიძლია, მაგრამ შეუძლებელია იმის კონტროლი და ანალიზი, თუ რა განაპირობებს 200%-იან ზრდას და არა 50%-იანს“, - განაცხადა ზაქაშვილმა.