მართალია, ნინას მუქარებით უკვე დიდი ხანია დავიღალეთ, მაგრამ ამჯერად რიყეზე მშენებარე უცნაური თეატრის დაცვაზე გადაერთო. მართალია, დასაცავი ჯერ კიდევ ბევრი ჰყავს, იმას თუ გავითვალისწინებთ, რა ტემპითაც ახალი ხელისუფლება ძველ ჩინოვნიკებს დაერია, მაგრამ მაინც...

რამდენიმე დღის წინ სოფო ნიჟარაძის "ფეისბუქის" გვერდზე (ნინას და სოფოს გვერდები რამ გაყო), მომღერლების საერთო მეგობარმა ნინას ახალი ფოტო გამოაქვეყნა. ხელებგაშლილი მომღერლის უკან საოცარი ფონი ჩანს, შუშის ხიდი, ახალი თეატრი და პრეზიდენტის ჩაბნელებული რეზიდენცია. ფოტოზე ასახულ ახალ პოლიტიკურ რეალობას, სადაც შუშის რეზიდენცია ჩაბნელებულია, ხიდი და თეატრი კი ისევ დგას, სერიოზული დისკუსია მოჰყვა, რომელი უფრო ლამაზია, ხედი, ხიდი, თეატრი თუ ნინა. დავას წერტილი ისევ მომღერალმა დაუსვა.

"ოღონდაც თეატრი არ დაანგრიონ და ნინას ვინ დაეძებს, მე ბულდოზერს ვუდგები წინ", - დაიმუქრა მომღერალი.

საინტერესოა როგორ განვითარდება ახალი თეატრისა და უკვე დაძველებული შუშის ხიდის ბედი, ფაქტია, რომ რომელიმეს გადატანის და დემონტაჟის შემთხვევაში, წინ დიდი სანახაობა გველის. ნინა ბულდოზერთან, სოფო "ფეისბუქზე", საღამოს კი ორივე ერთად ფიტნესკლუბში, გასახდომად და ტანის დასაყენებლად...