ჩემპიონთა ლიგის ჯგუფური ეტაპის ბოლო ტურში „ლივერპული“ „მილანს“ შეხვდება. ამ მატჩს მერსისაიდელთა ლიდერები, ვირჯილ ვან დეიკი და ჯორდან ჰენდერსონი გამოტოვებენ - წერს Liverpool Echo.
წყაროს ინფორმაციით, ისინი მილანში არ ჩასულან, რადგან წინა დღეს წითლების დამრიგებელმა, იურგენ კლოპმა თქვა, გადატვირთული გრაფიკის გამო შემადგენლობის საგრძნობ როტაციას მივმართავო.
„ლივერპულს“ B ჯგუფში ხუთივე მატჩი მოგებული აქვს და 15 ქულით ერთპიროვნული ლიდერია. ოთხქულიანი „მილანი“ კი მესამე ადგილზეა.
„მილანი“ – „ლივერპულის“ შეხვედრა დღეს, 7დეკემბერს გაიმართება „სან სიროს“ სტადიონზე და თბილისის დროით ღამის 12 საათზე დაიწყება.
