კატალონიის „ბარსელონა“ შვეიცარიული „ბაზელის“ თავდამსხმელის, არტურ კაბრალის შეძენას აპირებს. Goal-ის ცნობით, „ბლაუგრანაში“ გადაწყვიტეს, რომ შემადგენლობა 23 წლის ფეხბურთელით გააძლიერონ.
„ბაზელი“ 15 მილიონ ევროს ითხოვს, რაზეც თავიდან „ბარსამ“ უარი თქვა, მაგრამ ბრაზილიელით „ვესტ ჰემიც“ არის დაინტერესებული, რის გამოც კატალონელებმა გადაწყვიტეს, რომ შვეიცარიელთა მოთხოვნილი ფასი გადაიხადონ. თუმცა, ჯერჯერობით, უცნობია, ტრანსფერის ფორმულა. „ბაზელი“ 15 მილიონს დაუყოვნებლივ ითხოვს, ესპანელებს კი უნდათ, რომ ეს თანხა სამ წელიწადზე გადანაწილდეს და სამი წლის განმავლობაში 5-5 მილიონი ევრო გადაიხადონ.
წყაროს თანახმად, „ბარსელონას“ ტრანსფერში დეკო ეხმარება, რომელიც ორი კვირის წინ პორტუგალიაში კაბრალის აგენტ პაულო პიტომბეირას შეხვდა და კატალონელები იმედოვნებენ, რომ სწორედ აგენტი დაარწმუნებს „ბაზელის“ ხელმძღვანელობას ტრანსფერის წარმატებით დახურვაში.
არტურ კაბრალი „ბაზელში“ 2019 წელს გადავიდა და მას შემდეგ 95 მატჩში 60 გოლი აქვს გატანილი, მიმდინარე სეზონში კი, შესანიშნავად თამაშობს და ყველა ტურნირზე 20 თამაშში თავი 22-ჯერ გამოიჩინა.
