მე მხოლოდ ერთი დასკვნა მაქვს და უკვე ვერავინ ვერ შემაცვლევინებს ამ აზრს. დასავლეთის ელჩები და დიპლომატები თანაბრად კორუმპირებულები არიან და ბიძინასგან იღებენ მაყუთს - ძირითადად ბიტკოინებით, - ამის შესახებ ეკონომიკის ყოფილი მინისტრი გიორგი არველაძე Facebook-ზე წერს.

„ამის საშუალებას მათ აძლევს საქართველოს დეაქტუალიზაცია საერთაშორისო არენაზე - ბიძინას მთავარი პირობა და მიზანი (ერთადერთი, რაც ზედმიწევნით კარგად შეასრულა). ვის აინტერესებს რაღაც „პატარა სოფელი“ საქართველო... მისი ხსენება არ არის არსად, რუსეთის გავლენის სფეროა, აქტუალობით და საერთაშორისო ყურადღებით თურქმენეთის დონეზეა. შავი ხვრელია. ზის ამ შავ ხვრელში ვიღაც მდიდარი ტიპი, რომელიც არიგებს და არიგებს ბიტკოინებს სიჩუმისა და იგნორირებისათვის. აღარც რუსეთთან ჭიდაობაა საჭირო, აღარც ნატოს კარს ამტვრევს არავინ, საერთოდ არანაირი ყურადღება ამ ხვრელის მიმართ აღარ არსებობს. მიდი, ქაფე ჩუმად ბიტკოინები, ვერავინ გაიგებს, არავინ მოიკითხავს.

აი, ეს არის დღეს საქართველოს ადგილი. დასავლელი დიპლომატები ბედნიერები არიან. მათ ისტორიამ მოულოდნელად სამმაგი საჩუქარი უძღვნა და როგორ არ გამოიყენონ ეს შესაძლებლობა: ერთი მხრივ, არსებობს ახალი ჯადოსნური ვალუტა, რომელიც არსად არ აღირიცხება და კორუფციული გარიგების „გაბაზრების“ საფრთხეს გამორიცხავს. მეორე მხრივ, არის ვიღაც დაჩრდილულ ფუღუროში მჯდომი კაცი, რომელიც თავის ფუღუროდან არ გამოდის, სამაგიეროდ, ამ ვალუტას გულუხვად არიგებს, და მესამე მხრივ, არის ქვეყანა, რომელიც არავის აინტერესებს, რომელზეც არცერთი სტატია აღარ იწერება, რომელიც აგდია სადღაც, საერთაშორისო ურთიერთობათა ფსკერის ბნელ ღრმულში, სადაც სინათლის არცერთი სხივი აღარ ატანს. ქვეყანა, სადაც სიჩუმე ფულია, თვალის დახუჭვა სიმდიდრე, გვერდზე გახედვა - ფუფუნება“, - წერს გიორგი არველაძე.