„ბარსელონას“ ახალი მწვრთნელი ჩავი ერნანდესი იქნება. კატარის „ალ-სადის“ ხელმძღვანელის, თურკი ალ-ალის განცხადებით, „ბარსელონამ“ ჩავი ერნანდესის კონტრაქტში მითითებული გამოსასყიდი თანხა გადაიხადა.
მისივე თქმით, „ალ-სადი“ და „ბარსელონა“ თანამშრომლობაზე შეთანხმდნენ.
„რამდენიმე დღის წინ ჩავიმ შეგვატყობინა, რომ „ბარსელონაში“ დაბრუნება სურს, ვინაიდან მისი მშობლიური კლუბი ახლა სირთულეებს განიცდის. ჩვენ გვესმის ჩავის მოტივების და არ გვსურს, ხელი შევუშალოთ მას. ჩავი „ალ-სადის“ ისტორიის მნიშვნელოვანი ნაწილია და ჩვენ ას წარმატებებს ვუსურვებთ“, - განაცხადა თურქი ალ-ალიმ.
„ბარსელონა“ მწვრთნელის გარეშე 28 ოქტომბერს დარჩა. კატალონიური კლუბის ხელმძღვანელობამ ნიდერლანდელი სპეციალისტი რონალდ კუმანი მთავარი მწვრთნელის თანამდებობიდან გუნდის არადამაკმაყოფილებელი შედეგების გამო დაითხოვა.
