ყოფილი პრეზიდენტის, მიხეილ სააკაშვილის საქართველოში ჩამოსვლამ ბევრი კითხვის ნიშანი გააჩინა. გასათვალისწინებელია ის ფაქტიც, რომ ექსპრეზიდენტი ქვეყანაში ადგილობრივი თვითმმართველობის არჩევნების პირველი ტურის წინა დღეს შემოვიდა. ანალიტიკურ და პოლიტიკურ წრეებში აქტიურად საუბრობენ იმის შესახებ, რომ ამით გადაუწყვეტელი ამომრჩევლის მობილიზება მოხდა, რამაც „ქართული ოცნების“ სასარგებლოდ იმოქმედა.

მიხეილ სააკაშვილის საქართველოში დაბრუნების ფაქტმა რამდენიმე მოსაზრება გააჩინა, თუ რისთვის ჩამოვიდა ის სწორედ ახლა? ერთ-ერთი ვერსიის თანახმად, ყოფილ პრეზიდენტს რევანშისტული მიზნები ამოძრავებდა, მას ქვეყნის გადატრიალების გეგმა ჰქონდა, დაბრუნდა იმისთვის, რომ მორიგი რევოლუცია მოეწყო საქართველოში.

თუმცა, მეორე ნაწილი ამ ვერსიას არ იზიარებს და სრულიად სხვა მოსაზრებას ავითარებს, კერძოდ: ექსპრეზიდენტის ჩამოსვლა სწორედ არჩევნების წინა დღეს „ქართულ ოცნებასთან“ იყო შეთანხმებული, რომ ხელისუფლებას მეტი ხმა მიეღო. ეს ნაწილი აცხადებს ასევე იმას, რომ მმართველი პოლიტიკური ძალა ვერ გადასცდებოდა 43%-ს, რომელიც ერთ დროს ევროპული საბჭოს პრეზიდენტის, შარლ მიშელის 19 აპრილის შეთანხმებით იყო გათვალისწინებული. შესაბამისად, სააკაშვილის საქართველში ჩამოსვლით, იმ ამომრჩევლის მობილიზება მოხდა, ვინც „ქართულ ოცნებას“ აღარ უჭერდა მხარს, თუმცა, ეშინოდა „ერთიანი ნაციონალური მოძრაობისა“ და მიხეილ სააკაშვილის ხელისფულებაში დაბრუნების.

ამ ეტაპზე, ჯერ კიდევ გაურკვეველია რეალური მიზნები და კითხვის ნიშნების ჩამონათვალი, რომელიც სწორედ სააკაშვილის ქვეყანაში დაბრუნებამ გამოიწვია, უფრო მეტად იზრდება. თუ როგორ მოხდება ყოფილი პრეზიდენტის გათავისუფლება საპატიმროდან, რაზეც ოპოზიციური სპექტრი აქტიურად საუბრობს და არჩევნების მეორე ტურის შემდეგ, უფრო მეტად გააქტიურდება, უცნობია.

ერთ-ერთი ვერსიის თანახმად, სააკაშვილი, როგორ პატიმარი შესაძლოა, უკრაინას გადაეცეს. ნაწილი, რომელიც იზიარებს იმ მოსაზრებას, რომ ყოფილი პრეზიდენტის ჩამოსვლა ხელისუფლებასთან იყო შეთანხმებული, ასევე აცხადებს, რომ სწორედ ამ შეთანხმების თანახმადვე, სააკაშვილი არჩევნების მეორე ტურის შემდეგ უკრაინას უნდა გადაეცეს.

თუმცა, არსებობის უფლება აქვს კიდევ ერთ მოსაზრებას: სააკაშვილის გათავისუფლების მოთხოვნით შესაძლოა დაიწყოს აქციები, რაც ოპოზიციამ უკვე დააანონსა და ის მიიღებს პერმანენტულ და მასშტაბურ ხასიათს. საბოლოოდ კი, სააკაშვილი შესაძლოა, უკვე ციხის გარეთ, თავის პარტიასთან ვიხილოთ.

ანალიტიკოსი რამაზ საყვარელიძე არ იზიარებს იმ მოსაზრებას, რომ სააკაშვილის საქართველოში დაბრუნება ხელისუფლებასთან იყო შეთანხმებული. მისთვის სრულიად გაურკვევლია, რისთვის ჩამოვიდა ის.

„თუკი ხელისუფლებასთან იყო შეთანხმებული, ეს აჩენს კითხვას: დავუშვათ ხელისუფლებას აწყობდა მისი ჩამოსვლა, სააკაშვილს რაში აწყობდა? ალბათ, აქ უფრო რევოლუციურ მიზნებზე შეიძლება ლაპარაკი, მით უმეტეს ამასთან დაკავშირებით განცხადებებს აკეთებდა, თუმცა ბოლო მომენტში იკვეთება, რომ არც ეს არის. ამბობს, რომ აუცილებლად წადით არჩევნებზეო.

როდესაც მკაფიო მოტივი არ იკითხება, იქ შეიძლება ბევრი სხვა რამ იგულისხმო. გამოკლევა უნდა, მისმა ჩამოსვლამ გავლენა მოახდინა თუ არა ამომრჩეველზე, ჯამში აღებულ ციფრს თუ დავუკვირდებით, სააკაშვილის ჩამოსვლამდე იყო კვლევა, რამდენი ადამიანი უჭერდა მხარს მელიას და სააკაშვილის ჩამოსვლის მერე, რამდენმა დაუჭირა. არ არის დიდი განსხვავება საიმისოდ, რომ ვთქვათ, სააკაშვილმა მოახდინა დიდი გავლენა“, - განაცხადა რამაზ საყვარელიძემ For.ge-სთან.

საქართველოს პრემიერ-მინისტრი ირაკლი ღარიბაშვილი საზოგადოებაში გაჩენილი მოსაზრებების შესახებ ვრელ განცხადებას ავრცელებს, სადაც ყოფილი პრეზიდენტის საქართველოში ჩამოსვლის შესაძლო მიზეზს და მიზანს განიხილავს.

ღარიბაშვილს აბსურდულად მიაჩნია ვერსია, რომ სააკაშვილი შეგნებულად ჩაჯდა ციხეში და ის წინასწარ ჰქონდა დაგეგმილი: „ეს რომ ნდომოდა, მაშინ არა ქურდულად და კანონის დარღვევით, არამედ ვაჟკაცურად (რამდენად არარელევანტურადაც არ უნდა ჟღერდეს სააკაშვილთან მიმართებით) შემოვიდოდა და ჩაჯდებოდა ციხეში. ამგვარი ნაბიჯით ის გაამძაფრებდა მისსავე გზავნილს საქმეების შეკერვისა და პოლიტპატიმრობის შესახებ.

ახლა კი, როდესაც ის საქართველოში ახალი დანაშაულის ჩადენის გზით შემოვიდა, მან ამ გზავნილს ფორმალური საფუძველიც კი გამოაცალა... ყველაზე ლოგიკურად მაინც ის ვერსია შეიძლება მივიჩნიოთ, რომ სააკაშვილი საქართველოში არა ციხეში შესვლის გათვლით, არამედ ხელისუფლების გადატრიალების მყარი იმედით ჩამოვიდა“.