რუსეთის პრეზიდენტის პრესმდივანი დიმიტრი პესკოვი “ყირიმის პლატფორმის” სამიტს ეხმაურება და მას ანტირუსულ და უკიდურესად არამეგობრულ ღონისძიებას უწოდებს.

„ჩვენ მიგვაჩნია, რომ აღნიშნული ღონისძიება ჩვენი ქვეყნისადმი უკიდურესად არამეგობრულია და ჩვენთვის კატეგორიულად მიუღებელია მსგავსი განცხადებები რუსული რეგიონის, ყირიმის მიმართ. ამ მხრივ, ჩვენი დამოკიდებულება აბსოლუტურად ცალსახაა, როგორც ანტირუსული ღონისძიებისადმი“, - განაცხადა პესკოვმა.

შეგახსენებთ, კიევში ყირიმის “პლატფორმის სამიტი” გაიმართა, სადაც მონაწილეობას 46 ქვეყნისა და საერთაშორისო ორგანიზაციის წარმომადგენელი იღებდა. სამიტის მონაწილეები უკრაინის ტერიტორიულ მთლიანობას სრულ მხარდაჭერას უცხადებენ და მიიჩნევენ, რომ ყირიმის ნახევარკუნძულის დროებითი ოკუპაციის დასასრულებლად რუსეთის ფედერაციაზე ზეწოლის შენარჩუნება აუცილებელია.