საქართველოში ამერიკის შეერთებული შტატების საელჩო ძიუდოისტ ლაშა ბექაურს ოლიმპიადაზე ოქროს მედლის მოპოვებას ულოცავს.
„ვულოცავთ ლაშა ბექაურს ტოკიოს ოლიმპიურ თამაშებზე საქართველოსთვის მოპოვებულ პირველ ოქროს მედალს“ - წერს აშშ-ის საელჩო სოციალურ ქსელში.
ტოკიოს ოლიმპიადაზე ძიუდოისტმა ლაშა ბექაურმა საქართველოს ნაკრებს პირველი ოქროს მედალი მოუტანა. ოლიმპიურ თამაშებზე სპორტის 11 სახეობაში საქართველო 35 სპორტსმენითაა წარმოდგენილი. ოლიმპიადა 2021 წლის 23 ივლისიდან 8 აგვისტომდე იმართება.
საქართველოს პრემიერ-მინისტრის, ირაკლი ღარიბაშვილის განცხადებით, სპორტსმენი, რომელიც ოლიმპიური ჩემპიონის ტიტულს მოიპოვებს, ერთ მილიონ ლარს მიიღებს.
