"გირჩი" ხვალ ახალ სამოქმედო სტრატეგიას გაასაჯაროებს. პარტიის წარმომადგენლები აცხადებენ, რომ მათ აქვთ კონკრეტული ინიციატივა და ამ წინადადების მიხედვით, აპირებენ სადისკუსიო თემის შეცვლას.

"გირჩში" მიიჩნევენ, რომ მათი შეთავაზება, პოლიტიკურ კრიზისს დაასრულებს.

"დავაკვირდებით დღეს როგორ განვითარდება მოვლენები, რადგან ვიცით, რომ დიპლომატიურ ფრონტზე ძალიან აქტიურად მიდის მუშაობა ორივე მხარის მხრიდან და სავსებით შესაძლებელია, ცვლილებები მოხდეს. მაგრამ, თუ დავინახეთ, რომ დიპლომატებიც ვერ დაგვეხმარნენ, მაშინ ეს გეგმა ამოქმედდება. ამ გეგმის მიზანი არის, რომ იმ პოლიტიკურ ჭაობში, სადაც ვიმყოფებით, რამენაირად პოლიტიკური ცხოვრება დავაბრუნოთ და, ამავდროულად, არ დავიკავოთ არც "ქართული ოცნების" და არც "ნაციონალური მოძრაობის" მხარე, რომ არ დავამძიმოთ ეს დაპირისპირება,"-აცხადებს "გირჩის" წევრი ალექსანდრე რაქვიაშვილი.