„როგორც კი ისინი იწყებენ დესტრუქციულ ქმედებებს, ხდება საქართველოს ბორდერიზაცია - ნაციონალები და კრემლი ერთად ცდილობენ საქართველოს ჩამოქცევას“

„როგორც კი ისინი იწყებენ დესტრუქციულ ქმედებებს, ხდება საქართველოს ბორდერიზაცია - ნაციონალები და კრემლი ერთად ცდილობენ საქართველოს ჩამოქცევას“

„ნაციონალური მოძრაობის“ თავმჯდომარის, ნიკა მელიას დაკავების შემდეგ, რადიკალური ოპოზიცია დესტრუქციულ ქმედებებზე გადავიდა. იმავე დღეს კანცელარიასთან და პარლამენტის წინ საპროტესტო აქციები გამართეს და არც მალავენ, რომ სანამ ნიკა მელიას არ გაათავისუფლებენ, უფრო რადიკალურ ზომებზე გადავლენ.

ანალიტიკოსი გია აბაშიძე for.ge-თან საუბარში აცხადებს, რომ სწორედ, ადრე თუ გვიან, ამ პოლიტიკოსების მოღვაწეობა დასრულდება და პოლიტიკური ველიდან გაქრებიან.

ნიკა მელიას დაკავების შემდეგ, ოპოზიცია რადიკალურ ქმედებებზე გადავიდა. ისინი დასავლეთის მხრიდან სანქციებზეც საუბრობენ. როგორ ფიქრობთ, მათ სურთ, რომ რევოლუციური სცენარით წავიდნენ და 2003 წლის სურათი გააცოცხლონ?

- დავიწყოთ იქიდან, რომ 2003 წელი არაა და ის მოცემულობა არ გვაქვს - ესაა განსხვავება. მაშინ საერთო სახალხო პროტესტი იყო, რომელიც დამთავრდა ისე, როგორც დამთავრდა - „ვარდების რევოლუციით“. ახლა ვერ ვხედავთ სახალხო პროტესტს და ქუჩაში „ნაციონალური მოძრაობის“ ამომრჩეველიც კი არ გამოდის. იმ 27%-ის თუნდაც 5% რომ გამოვიდეს, მაშინ გამოჩნდება, რომ ეს არის მასობრივი პროტესტი, მაგრამ ახლა რასაც ვხედავთ, ეს არის დაქირავებული აქტივისტების მიერ ჩატარებული მარშები, მიტინგები, ე.წ აჯანყებები. ამიტომ, ვერ ვხედავ, რომ „ნაციონალურმა მოძრაობამ“ შეძლოს ქვეყანაში პოლიტიკური გადატრიალება - წარმოუდგენელია.

ისინი ხომ რადიკალური ქმედებებით იმუქრებიან. ვიდრე ნიკა მელიას დააკავებდნენ, როგორც კი სასამართლო გადაწყვეტილება ცნობილი გახდა, გიგი უგულავა იმუქრებოდა, რომ ის სამ0ართალდამცველებს წინააღმდეგობას ხელ-კეტებით გაუწევდა...

- ჩვენ ვნახეთ გიგი უგულავას მუქარა, რომ სამართალდამცველებს დაუპირისპირდებოდა, მაგრამ „ნაციონალური მოძრაობის“ ოფისში როდესაც მელია დააკავეს, რეალობაში არაფერი მომხდარა.. შესაბამისად, მათი მუქარები არის მხოლოდ ვირტუალური და ტელევიზიური. რეალობაში მათ ეს არ შეუძლიათ.

ანუ, თქვენი აზრით, რადიკალური ოპოზიციის ლიდერებს ეშინიათ და მარტო მუქარით შემოიფარგლებიან და სამართალდამცველებთან უბრალო ხალხს უშვებენ?

- არაერთი სიტუაცია იყო, როდესაც არაკანონიერი მიტინგების, პარლამენტში შეჭრის თუ სხვა პროტესტების დროს აქტივისტები წინა რიგებში იდგნენ, ლიდერები კი გაქცეულები ან დამალულები იყვნენ. ასე რომ, „ნაციონალური მოძრაობა“ თავისი არსით მხოლოდ მუქარებით შემოიფარგლება და ეს მუქარები წლებია გვესმის. რეალურად, მათ ქვეყნის მშენებლობის გეგმა არ გააჩნიათ, მხოლოდ დესტრუქცია და რევოლუცია აქვთ და ესეც ზეპირსიტყვიერებაშია გადატანილი.

ბატონო გია, ჩვენთან ინტერვიუში „ნაციონალური მოძრაობის“ წევრს, ზაალ უდუმაშვილს დაავიწყდა 2007 წლის მოვლენები და შტურმით აღებული ტელევიზია. მას ნიკა მელიას დაკავების ასეთი ფორმა გაუკვირდა. თქვენი აზრით, შეიძლება ითქვას, რომ ისინი წარსულს ივიწყებენ, მაგრამ დღეს წარსულის გამოცდილებით მოქმედებენ?

- დიახ, „ნაციონალური მოძრაობა“ თავისი რჩეული სტილით მოქმედებს. თუმცა, წინა წლებისგან განსხვავებით, როდესაც ისინი ხელისუფლებაში იყვნენ, მაშინ ფიზიკურ ტერორს ახორციელებდნენ. ახლა კი ახორციელებენ პროპაგანდისტულ ტერორს. ასევე, „ნაციონალურ მოძრაობას“ ახასიათებს ის, რომ თავისი წარსული დანაშაულებები გააუბრალოოს, თითქოს ციხის კარები, ციხის ბუნტის სისხლიანი ჩახშობა არ მომხდარა, ასევე არც ციხეში წამება, არც ტელეკომპანიებების დარბევა არ ყოფილა, არც ბიზნესების ღამით წართმევა არ ყოფილა. მათ კი უნდათ ამის დავიწყება, მაგრამ ხალხს არ დაავიწყდება. მით უმეტეს, ახლა ციფრული სამყაროა და ყველაფრის გახსენება ვიდეო და ფოტო მასალებით არის შესაძლებელი. ამის შედეგი კი არის ის, რომ მოსახლეობა გარეთ არ გამოდის.

ბატონო გია, მათ ისიც კი დაავიწყდათ, რომ პოლიტიკოსებს იჭერდნენ და ამბობენ, რომ მათ დროს პოლიტპატიმრები არ იყვნენ...

- „ნაციონალურ მოძრაობას“ ჰყავს ისეთი პოლიტიკოსები, რომლებიც საერთოდ ურეიტინგოები არიან, იმის გამო, რომ რასაც ისინი ლაპარაკობენ - ტყუილებს, დეზინფორმაციას, ეს არის მათი მახასიათებელი.

ფაქტია, რომ უკრაინაში მყოფი ექს-პრეზიდენტი მიხეილ სააკაშვილი აქ მყოფ რადიკალურ ოპოზიციას კარნახობს რა გააკეთონ. თქვენი აზრით, ახლა მისი გეგმები რა იქნება, როდესაც ნიკა მელია დაკავებულია?

- 2012 წლიდან მოყოლებული 7 არჩევნები ჩატარდა და „ნაციონალურმა მოძრაობამ“ ვერც ერთ შტოში ვერ მოიპოვა ადგილები, მმართველი პოზიციები. ასე რომ, ოპოზიცია ცდილობს სააკაშვილის დაკრულზე, დესტრუქციულობით ქვეყანაში ააყირაოს სიტუაცია. ამავე დროს რომ დააკვირდეთ, როგორც კი ისინი იწყებენ დესტრუქციულ ქმედებებს, ქუჩის აქციებს, მყისიერად ხდება საქართველოს ბორდერიზაცია და რუსი ოკუპანტების აქტივიზმი. მე ვხედავ, რომ „ნაციონალური მოძრაობა“ და კრემლი ერთად ცდილობენ საქართველოს დესტრუქციულობას და ჩამოქცევას. ისინი ცდილობენ ამას, მაგრამ არ გამოუვათ.

დღეს მიხეილ სააკაშვილის გვერდით ისეთი ადამიანები დგანან, რომლებსაც მიხეილ სააკაშვილის მთავრობა სისხლით გაუსწორდა. ნუთუ მათ ის სისხლიანი დღეები დაავიწყდათ?

- პარადოქსული მოცემულობაა. როდესაც ტელეკომპანია „იბერიას“ თანამფლობელი ნატო ჩხეიძე მის გვერდითაა, ასევე პრორუსი პოლიტიკოსი ნინო ბურჯანაძე და სააკაშვილის დროს თავის დროზე დევნილი მის გვერდითაა. ასევე მის გვერდით არიან უპრინციპო ბერძენიშვილები და გუბაზ სანიკიძე - სამწუხარო მოცემულობაა, მაგრამ ეს არის ჩვენი პოლიტიკური სახადი - ნაციონალები, ადრე თუ გვიან, პოლიტიკური ველიდან გაქრებიან.

თქვენ ახსენეთ პრორუსული პოლიტიკოსი ნინო ბურჯანაძე. ყველამ კარგად იცის მისი დამოკიდებულება ჩვენს მეზობელ ქვეყნისადმი. თქვენი აზრით, ნინო ბურჯანაძე და მიხეილ სააკაშვილი კრემლისთვის ერთად მუშაობენ?

- ისინი საქართველოში ან ირიბად, ან პირდაპირ კრემლის საქმეს აკეთებენ, ან კრემლის სასარგებლო იდიოტები არიან. ასე ჰქვია პოლიტიკაში იმას, რაც გააკეთა სააკაშვილის ხელისუფლებამ, როცა ომის შემდეგ, რუსეთს მთელი სტრატეგიული ობიექტები მიჰყიდა. ბურჯანაძე კი პუტინს ხვდებოდა და ახლა ისინი პროდასავლურობაზე თავს დებენ, სასაცილო კი არა, ტრაგიკულია. ასეთი პოლიტიკოსების არსებობა უნდა დასრულდეს და დამთავრდება კიდეც.

თქვენ ამბობთ, რომ მათი მოღვაწეობა უნდა დასრულდეს. ახალი პრემიერ-მინისტრი ირაკლი ღარიბაშვილიც „ნაციონალური მოძრაობის“ დასრულების მომხრეა და მათი დასრულებისთვის ხელისუფლება რას მოიმოქმედებს?

- დესტრუქციულ ქმედებებს კანონით უნდა გაეცეს პასუხი. თორემ გამოხატვის თავისუფლება ყველას აქვს, რამდენი ხანიც უნდათ, ქუჩაში იყვნენ, ილანძღონ და აკრიტიკონ ხელისუფლება. როგორც კი დესტრუქციულ ქმედებაზე გადავლენ, შეჭრებზე, პოლიციელებზე თავდასხმებზე, მათ კანონიერი პასუხი გაეცემათ. ღარიბაშვილმა ეს პრემიერობის მეორე დღიდანვე აჩვენა, რომ კანონი კანონობს.

ამის მიუხედავად ვხედავთ, რომ დესტრუქციულ ქმედებებს არ ერიდებიან და თქვენ როგორ ფიქრობთ, შესაძლოა ნიკა მელიას ბედი სხვა ოპოზიციონერმაც გაიზიაროს?

- საქმეებია აღძრული როგორც ნიკა გვარამიას წინააღმდეგ, ასევე მამუკა ხაზარაძის წინააღმდეგ. ოღონდ, ეს არ არის პოლიტიკური ნიშნით აღძრული საქმეები. პოლიტიკოსი თუ დანაშაულს ჩაიდენს, არ ნიშნავს იმას, რომ ის ავტომატურად პოლიტპატიმარი გახდება. პოლიტპატიმარი ხდება მაშინ, როდესაც ის საკუთარი მოსაზრებების გამო არის დაჭერილი, როგორც მაგალითად - ნავალნი. მაგრამ ესენი ნავალნები ვერასდროს გახდებიან. მათ კრიმინალური საქმეები აქვთ ჩადენილი. ასე რომ, გამორიცხული არაა არაერთი პოლიტიკოსი ვიხილოთ ციხეში, რომელიც კანონს არღვევს. კანონის დამრღვევი უნდა იჯდეს ციხეში.

ნავალნი ახსენეთ და ოპოზიცია ნიკა მელიას სწორედ ნავალნის ადარებს და დასავლელი პარტნიორების იმედად არიან - დასავლელი პარტნიორების მხრიდან, ხელისუფლების მიმართ სანქციების დაწესებას ელოდებიან. თქვენი აზრით, ჩვენი დასავლელი პარტნიორები რა პოზიციას დაიკავებენ, მძაფრი კრიტიკა უკვე წამოვიდა?

- ჩვენი დასავლელი პარტნიორები არასოდეს ახსენებენ და პარალელს არ ავლებენ ნავალნსა და მელიას შორის. ნავალნის არ ჰქონია რუსეთის სათათბირო შენობაში შევარდნის მცდელობა. ის მხოლოდ თავის საპროტესტო აზრს გამოხატავდა, ხოლო მელიამ პარლამენტზე მიიტანა შტურმი. უყურეთ, კაპიტოლიუმზე შტურმში მონაწილე 250 ადამიანი უნდა გასამართლდეს, მათ შორის არის სენატის წევრიც. ეს ამერიკაში შიდა ტერორიზმად ითვლება. თუ ამერიკაში ეს ტერორიზმად ითვლება, საქართველოში ეს პოლიტიკური დევნა რატომ არის?! ასე რომ, მე ვფიქრობ, ჩვენი პარტნიორები მოგვიწოდებენ, რათა ქვეყანაში მშვიდობა იყოს.