დონალდ ტრამპის თქმით, არჩევნებში წარუმატებლობის შემთხვევაში, ის დამარცხებას აღიარებს. ტრამპმა დემოკრატი მეტოქე ჯოზეფ ბაიდენი პანდემიის დროს იზოლაციაში ყოფნის გამო გააკრიტიკა და აღნიშნა, ქვეყნისთვის ძალიან სამწუხარო იქნება, თუკი სახელმწიფოს მეთაურად ყოფილ ვიცე-პრეზიდენტს აირჩევენ.

პარალელურად, ბაიდენი ტრამპს სამხედრო გადატრიალებით დაემუქრა იმ შემთხვევაში, თუკი ტრამპი არჩევნებს წააგებს და დამარცხებას არ აღიარებს.

აფროამერიკელი ჯორჯ ფლოიდის გარდაცვალების გამო, ამერიკას დაძაბულობის ტალღამ გადაუარა, რაც რასისტულ გამონათქვამებში გადაიზარდა და ჩერჩილის ძეგლის დაზიანებით დაგვირგვინდა იმ მოტივით, რომ ჩერჩილიც თურმე რასისტი იყო. გამორიცხული არ არის, ეს დაძაბულობა ამერიკაში ნოემბერში დაგეგმილ არჩევნებზეც აისახოს.

რა პერსპექტივა აქვს ამერიკულ არჩევნებს?

პოლიტოლოგი თამარ კიკნაძე for.ge-სთან საუბრისას აცხადებს, რომ ამერიკაში რთული მდგომარეობაა. ტრამპი რადიკალურ ცვლილებებს ახორციელებს, მთელ ეკონომიკურ სისტემას ცვლის, რაც არ არის მისგან გამომდინარე, ეს არის იძულებითი ზომა, რადგან აშშ ვეღარ იქნება ლიდერი იმ ფინანსური ბუშტის პირობებში, რომელსაც მას სთავაზობენ გლობალური ფინანსისტები და, ამ შემთხვევაში, მათი წამყვანი ძალა დემოკრატები.

„თვითონ ჯორჯ ფლოიდის ქეისია საინტერესო. ვინ იყო ფლოიდი? ნარკოტიკებთან დაკავშირებით რამდენჯერმე ნასამართლევი პირი, ასევე, ცნობილია, რომ მან ორსულ ქალს პისტოლეტი მიუშვირა, მაგრამ, რაც ამერიკაში ხდება, კარგად აგორებული სპექტაკლია, რომელშიც რასიზმის თემა გამოიყენეს. საინტერესოა, რომ დემოკრატები უფრო ცუდ სურათს გვთავაზობენ, რადგან სოციალურ და ეკონომიკურ ნიადაგზე წარმოქმნილი დისკრიმინაცია მსოფლიოსთვის გაცილებით უფრო დიდი საშიშროებაა, ვიდრე რასობრივი დისკრიმინაცია. წარმოიდგინეთ, მთელი მსოფლიოს სიმდიდრის 80%-ს ფლობს რამდენიმე ასეული ოჯახი. ეს უფრო დიდი დისკრიმინაციაა და, თუ არსებული ეკონომიკური მოდელი შეიცვლება, ძალიან კარგი იქნება. ჩემი აზრით, ტრამპი სწორედ ამას აკეთებს და მან უკვე ზეგავლენა იქონია ფედერალურ სარეზერვო სისტემაზე, მაგრამ, როგორც ვხედავთ, მის წინააღმდეგ რეზისტენცია ძალიან დიდია. ახლა ფინანსისტების მთავარი ამოცანაა, რაც შეიძლება მეტი არეულობა იყოს ამერიკაში. ამიტომ ამერიკაშიც უნდა ველოდოთ დაძაბულობას“,-აცხადებს თამარ კიკნაძე.

მისივე განმარტებით, რეიტინგის მიხედვით, ტრამპი, სავარაუდოდ, არჩევნებში გაიმარჯვებს, რადგან ბაიდენი სრულიად არაკონკურენტუნარიანი ადამიანია. თანაც, მას ალცჰეიმერის ნიშნები აქვს.

„ამერიკაში გახლდით და ამის მომსწრე ვარ, თუ როგორი განწყობა იყო თვითონ დემოკრატებშიც კი, მათ შორის, საუნივერსიტეტო წრეებში. ისინი უფრო ბარნი სანდერსს უჭერენ მხარს. ყველამ იცის, რომ სანდერსს უფრო მეტი რეიტინგი ჰქონდა, მაგრამ რაღაც პოლიტიკური მოსაზრებებით გაიყვანეს ბაიდენი, ასე რომ, თვითონ დემოკრატებშიცაა განხეთქილება. ამიტომ ძალიან ცხელ არჩევნებს უნდა ველოდოთ ამერიკაში. ამერიკელი პოლიტიკური ექსპერტი ჯორჯ ფრიდმანი, ეს ძალიან ჭკვიანი ადამიანი წერს, რომ ეს იქნება უპრეცედენტო არჩევნები, რადგან სახეზეა ელიტების განხეთქილება. მაგალითად, წინა საუკუნის დასაწყისში ორტეგა ი გასეტი წერდა მასების აჯანყებაზე, ახლა კი ამერიკელი მოაზროვნე ქრისტოფერ ლეში წერს ელიტების აჯანყებაზე. რამდენიმე წლის წინაც იყო ასეთი სცენარი, მეც წამიკითხავს ბევრ ექსპერტთან ასეთი მოსაზრება, მაგრამ ვთვლიდი, რომ ეს ფანტასტიკის სფეროდან იყო. თუმცა ახლა გამართლდა, განხეთქილება ნამდვილად არის ელიტებს შორის. ამიტომაც წერს ფრიდმანი, რომ უკვე მესამედ არის განხეთქილება ელიტებს შორის, რომელიც ძალიან ცუდად მთავრდებოდა ხოლმე, პირველი დამთავრდა სამოქალაქო ომით, მეორე ეს იყო მეორე მსოფლიო ომი, მაკარტიზმი და ა.შ. ახლა მესამე ეტაპია, როდესაც დიდი განხეთქილებაა ელიტებს შორის. ამიტომ ამერიკელები რთულ ფაზაში გადადიან“, - აცხადებს თამარ კიკნაძე.

ანალიტიკოსი ვახტანგ მაისაია მიიჩნევს, რომ ტრამპის მდგომარეობა საკმაოდ რთულია. ტრამპმა გააკეთა რამდენიმე ხისტი განცხადება, არა ისეთი, რომლითაც კონსენსუსს მიაღწევდა საზოგადოებაში და ამან გამოიწვია პროტესტის მთელი ტალღა. ამის მიუხედავად, ვახტანგ მაისაია ეჭვობს, ჯორჯ ფლოიდის საზარელი მკვლელობისა და მისგან გამოწვეული პროცესების გამო ტრამპს პრობლემა შეექმნას. მისი აზრით, ტრამპს შეიძლება უფრო მეტი დისკომფორტი შეუქმნას კორონავირუსმა და, შესაბამისად, იმ ეკონომიკურმა სიდუხჭირემ, რომელიც ამერიკაში უკვე დაფიქსირდა, რადგან 22 მილიონი ადამიანი უმუშევარია.

„ამერიკის პოლიტიკურ სისტემაში ისეთი კადრების ნაკლებობაა, რომლებიც ტრამპს შეებრძოლებიან. ანუ ორი ფაქტორია, რაც პოზიტიურად მოქმედებს ტრამპზე - მას არ ჰყავს კონკურენტი, ჯო ბაიდენი იმდენად დისკრედიტირებულია, ვეჭვობ, ბაიდენმა რაიმე სერიოზული წინააღმდეგობა გაუწიოს ტრამპს. ამდენად, უნდა აირჩიონ ან ტრამპი, ან ანტიტრამპი. არც რესპუბლიკელებთან არსებობენ ტრამპის საპირწონე ძალები, არც დემოკრატებთან. ამერიკაში კადრების დეფიციტია“,-აღნიშნა ვახტანგ მაისაიამ ჩვენთან საუბრისას.

რაც შეეხება რასისტულ განცხადებებს, ანალიტიკოსის აზრით, ამერიკაში რასისტული განცხადებები ყოველთვის კეთდებოდა და ამით ამერიკაში არავინ არავის გააკვირვებს. სამწუხაროდ, ამერიკაში რასიზმის რეალური პრობლემა 80 წელს არ აღმოიფხვრა, რასიზმს თავისი ადგილი აქვს და ანტირასიზმს-თავისი. ასე რომ, ეს დაპირისპირება არჩევნებსა და ტრამპზე სერიოზულ ზეგავლენას არ მოახდენს, თუკი დონალდ ტრამპმა უკიდურესი შეცდომა არ დაუშვა, არმია არ გამოიყვანა, კონსტიტუციური საფუძველი არ შელახა, მას ალტერნატივა არ ჰყავს.