პოლიტიზირებული პროცესები საქართველოში შეწყვეტილია, ჩვენ შევუერთდით მემორანდუმს, სადაც ამაზე ხაზგასმა იყო, - ამის შესახებ საპარლამენტო უმრავლესობის ლიდერმა, მამუკა მდინარაძემ „ქართული ოცნების“ ოფისში გამართული ბრიფინგის შემდეგ ჟურნალისტებს განუცხადა.

„არც წარსულში, არც მომავალში საქართველოში არ იქნება, რომ პოლიტიკა მართლმსაჯულებაში ჩაერევა და ამის „დაჯერება“ ჩვენს ოპონენტებს უჭირთ, რადგან მათ ეს აწყობთ“, - აღნიშნა მდინარაძემ.

მან ასევე განაცხადა, რომ 48 მილიონი ლარის გამფლანგველი ადამიანს პოლიტპატიმარი ვერ დაერქმევა.

უზენაესმა სასამართლომ გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 3 წლითა და 2 თვით თავისუფლების აღკვეთა შეუფარდა.

პროკურატურა გიგი უგულავას მერობის პერიოდში თბილისის განვითარების ფონდიდან 48 მილიონი ლარის მითვისება-გაფლაგვას ედავებოდა. 2018 წელს საქალაქო სასამართლომ ყოფილ მერს აღნიშნულ საქმეზე 1 წლითა და 3 თვით თავისუფლების აღკვეთა შეუფარდა, თუმცა სხვა საქმეზე გამოტანილმა განაჩენმა ახალი განაჩენი შთანთქა და სასამართლომ სასჯელი მოხდილად ჩაუთვალა.