მილანის „ინტერს“ ჩემპიონთა ლიგის მერვედფინალში გასასვლელად ჯგუფური ეტაპის ბოლო ტურში „ბარსელონას“ დამარცხება სჭირდება. ანტონიო კონტე კი, იმედიანადაა განწყობილი და „სლავიასთან“ (3:1) გამარჯვების შემდეგ კომენტარიც გააკეთა.
იტალიელი სპეციალისტის განცხადებით, „ბარსასთან“ „ინტერს“ 80 ათასი ადამიანი დაეხმარება:
„ბარსელონასთან“ მატჩს სწორი რწმენით უნდა შევხვდეთ? ჯერ „სპალთან“ მატჩზე გვჭირდება ეს, რადგან გვინდა ჩემპიონატში შესანიშნავი ასპარეზობა გავაგრძელოთ. შემდეგ „რომასთან“ და მხოლოდ ამის შემდეგ „ბარსელონასთან“. თუმცა, ვიცით, რომ „ბარსასთან“ აუცილებლად გამარჯვება გვჭირდება და ისიც ვიცით, რომ ჩვენს მხარდასაჭერად 80 ათასი ადამიანი იქნება. კმაყოფილები ვართ იმით, რაც უკვე გავაკეთეთ“, - აღნიშნა კონტემ.
შეგახსენებთ, F ჯგუფიდან 11 ქულით „ბარსელონა“ უკვე გავიდა (პირველი ადგილით), ხოლო მეორე საფეხურისთვის „ინტერი“ იბრძვის, რომელიც „ჯუზეპე მეაცაზე“ კატალონურ გრანდს თუ დაამარცხებს, პლეი-ოფში გავა. თუ არადა, მილანელებს პრაღის „სლავიის“ იმედად ყოფნა მოუწევთ „დორტმუნდთან“ გერმანულ დაპირისპირებაში.
