თხილის მოსავალი თითქმის დაბინავებლუია. შეიძლება ითქვას, რომ წელს აზიური ფაროსანას განეტრალება მოხერხდა. შარშანდელთან შედარებით ხარისხი 3-4-ჯერ გაუმჯობესებულია, ხოლო ფასი უკვე გაორმაგებული.

გარემოს დაცვისა და სოფლის მეურნეობის მინისტრის მოადგილის გელა ხანიშვილის შეფასებით, საქართველოს მთავრობამ დონორებისა და მეთხილე ფერმერების დახმარებით, აზიური ფაროსანას წინააღმდეგ ბრძოლაში გარდატეხის შეტანა შეძლო. ასეთ სწრაფ შედეგს თავად სამინისტროშიც არ ელოდნენ.

„სახელმწიფო პროგრამით გათვალისწინებული იყო, რომ პროგრამა წარმატებული იქნებოდა, თუ ზარალი არ გადააჭარბებდა 15%-ს, რომელიც მონიჭებული იქნება აზიური ფაროსანასგან. ზარალი ფაროსანასაგან 2-3%-ის ფარგლებში შეიძლება გვქონდეს, მეტი არ არის.

თხილის მწარმოებელთა ასოციაციასთან ერთად ჩვენ შევძელთ და ის ღონისძიებები, რაც აზიური ფაროსანას ფარგლებში იყო, გარდავსახეთ მოსავლის მიღების ღონისძიებებში. ანუ ერთის მხრივ, გავანეიტრალეთ აზიური ფაროსანას ზემოქმედება, მეორეს მხრივ კი თხილის სექტორში წარმოება 45 ათას ტონიან ნიშნულს მივუახლოვეთ. ეს იმას ნიშნავს, რომ ექსპორტმა, რაც გასულ წელს განხორციელდა, დაახლოებით 25-30 მლნ აშშ დოლარი შეადგინა, წელს ალბათ 100-110 მლნ დოლარის ფარგლებში იქნება, ანუ თითქმის გაოთხმაგდება“, - განაცხადა გელა ხანიშვილმა.

თხილის მწარმოებელთა ასოციაციის მონაცემებით, გასულ წელთან შედარებით თხილის ფასი და მოსავალი დაახლოებით სამჯერ გაიზარდა. ასეთი მონაცემები ასოციაციამ თხილის მოსავლის გადარჩენის პროექტის ფარგლებში გამოაქვეყნა, რომელიც სოფლის მეურნეობის სამინისტროსა და პარტნიორი ორგანიზაციების მხარდაჭერით განახორციელა. ამ ასოციაციაში 15 ათასი ფერმერია გაწევრიანებული, რომლებიც საერთო ჯამში, 17 ათას ჰექტარ ფართობს ფარავენ.

„როგორც გაირკვა, ყველაზე რთული ფერმერის ბაღის შეწამლასა და მოვლაზე დათანხმება აღმოჩნდა. ბოლო დროს გავრცელებულმა დაავადებებმა და აზიურმა ფაროსანამ ათასობით ოჯახი შემოსავლის გარეშე დატოვა და უიმედო სიტუაციაში ჩააგდო, თუმცა ქმედითმა და თანმიმდევრულმა ღონისძიებებმა, კონსულტაციებმა და ასოციაციის თანამშრომლების მუდმივმა მონიტორინგმა ფერმერებს თხილზე ზრუნვა დააწყებინა.

მართალია, გეგმა 10 000 ფერმერის გაერთიანება იყო და პროგრამაში სულ 15000-მდე ფერმერი ჩაერთო, მაგრამ საქართველოში სულ რეგისტრირებული მეთხილეების რიცხვი 65000-ს აჭარბებს. შესაბამისად, ასოციაცია სოფლის მეურნეობის სამინისტროსა და პარტნიორ ორგანიზაციებთან ერთად მომავალი წლის მიზნად - ინდუსტრიის სრულად დაფარვას ისახავს.

სამომავლო გეგმებში თხილის ჯამური შემოსავლის ერთ მილიარდ ლარამდე გაზრდა და საშუალოდ 100 ათასი ტონა მაღალი ხარისხის თხილის მიღებაა“, - განმარტავენ ასოციაციაში.

წელს საქართველოში 45 ათას ტონამდე მოსავლის მიღებას ელოდებიან. ფასი შარშანდელთან შედარებით გაორმაგებულია, თუმცა ფერმერები ზამთრის მოახლოებასთან ერთად, თხილის კიდევ უფრო გაძვირებას ვარაუდობენ. ამჟამად 1 კგ თხილი ხარისხის შესაბამისად 5-6 ლარად იყიდება.