რუსეთისგან მომავალი ეკონომიკური ექსპანსიის საფრთხე ჩვენს  ხელისუფლებას არ აშინებს. ეკონომიკის მინისტრი ნათია თურნავა აცხადებს, რომ, საბედნიეროდ, რუსეთზე ელექტროენერგიით არ ვართ დამოკიდებულნი, არც ბუნებრივი აირით ვართ მიბმულნი ჩვენს ჩრდილოელ მეზობელზე. რაც შეეხება ხორბალს, ნათია თურნავა გამოსავალს გვთავაზობს და არ გამორიცხავს, რუსული ხორბალი ყაზახურმა ჩაანაცვლოს.

არსებობს თუ არა რუსეთისგან ეკონომიკური ექსპანსიის საფრთხე?!

ანალიტიკოსი დავით ზარდიაშვილი ჩვენთან საუბრისას აცხადებს, რომ რუსეთი ჩვენი უზარმაზარი მეზობელია და, თუ საქართველოს შევადარებთ რესურსებით, მათ შორის, ეკონომიკური რესურსებითაც, ჩვენს შორის უდიდესი დისბალანსია. რუკას რომ შევხედოთ, მარტო ამითაც მივხვდებით, რა ქვეყანაა რუსეთი. ამიტომ, არავითარ შემთხვევაში, არ გვაწყობს მასთან კონფრონტაცია. თუმცა არსებობს წითელი ხაზები და ეს ხაზები უკავშირდება საქართველოს ტერიტორიულ მთლიანობას, რომელზეც უკან დახევა არ შეიძლება.

„დელიკატური ვითარებაა. აშკარაა, რამხელა დარტყმა მიიღო ქართულმა ეკონომიკამ, რაც რუსი ტურისტებით დაიწყო, შემდეგ რუსებმა უკვე ღვინოზე გააგრძელეს საუბარი, რაც ქართული ეკონომიკისთვის უდიდესი ზარალი და დარტყმა იქნება. მიუხედავად იმისა, რომ რუსეთი არ არის მოწინავე ეკონომიკის ქვეყანა, ის მასშტაბით უზარმაზარია და ქართული ძალიან პატარა ეკონომიკა დიდწილად სწორედ რუსეთზეა დამოკიდებული. სხვათა შორის, ნათია თურნავამ ადრეც თქვა, ჩვენ ყაზახურ ხორბალს ვყიდულობთ, რაც უფრო იაფი და ხარისხიანიაო. ეს ტყუილია, ყაზახური ხორბალი უფრო ძვირია და უფრო უხარისხოცაა, რუსული ხორბალი კი ერთ-ერთი საუკეთესოა მსოფლიოში და ფასითაც უფრო მისაღებია. უკრაინას აქვს უზარმაზარი რესურსი ამ თვალსაზრისით, მაგრამ რუსულ ხორბალთან ვერ მივა. რა თქმა უნდა, სხვა გზა თუ არ გვექნება, ან ყაზახურ ხორბალს ვიყიდით, ან კანადურს, მაგრამ რუსული ხორბალი ხელსაყრელი იყო“, - აცხადებს დავით ზარდიაშვილი და მიიჩნევს, პური ამდენ ხანს რომ არ გაძვირდა, ამის ერთ-ერთი მიზეზი სწორედ რუსეთში ნაყიდი ხორბალი იყო.

ამდენად, ანალიტიკოსის პროგნოზით, სხვა წარმომავლობის ხორბლის ყიდვა ცხოვრებას გაგვიძვირებს. თუმცა კარგია, რომ გაზით და ელექტროენერგიით არ ვართ დამოკიდებულნი რუსეთზე, დივერსიფიცირებულნი ვართ ამ მხრივ და ძირითადად აზერბაიჯანია ჩვენი მთავარი პარტნიორი.

პოლიტოლოგი სოსო ცინცაძე ჩვენთან საუბრისას ადასტურებს, რომ რუსეთის ფაქტორის გამო ეკონომიკური სიძნელეები მოსალოდნელია. თუმცა რუსეთისგან ეკონომიკურ ექსპანსიას პოლიტიკური ექსპანსიაც ემატება, რადგან რუსები საქართველოში მკვიდრდებიან, ბიზნესს ავითარებენ, ქონებას ყიდულობენ და სულ რაღაც 10-15 წელიწადში რუსული მეხუთე კოლონის ამოქმედება ემუქრება საქართველოს. 

„რუსულ საიტებზე შიგადაშიგ უკვე ჩნდება და გამრავლდა ობიექტური სტატიები. გუშინ ვკითხულობდი რუსი ეკონომისტების მოსაზრებებს იმის თაობაზე, რომ საქართველოში ბოლო 2-3 წელიწადში 1100 ობიექტი შეიძინეს რუსებმა, ისინი აქ აწარმოებენ პროდუქციას და აქედან გააქვთ ევროპაში, რადგან სანქციები არ მოქმედებს მათზე, ვინაიდან საქართველოს სანქციები არ აქვს დაწესებული რუსეთის წინააღმდეგ. გარდა ამისა, საქართველოს ევროპასთან აქვს თავისუფალი ვაჭრობა, რაც რუსებისთვის სასარგებლოა, ამიტომაც ჩამოდიან საქართველოში, ხსნიან საწარმოებს, სულ რაღაც 10-15 ქართველ მუშახელს ქირაობენ, რაც ზღვაში წვეთია... რუსები ახლა წუხან, რომ საქართველოსთან ურთიერთობის დაძაბვის გამო მათი ბიზნესსაქმიანობა შეწყდება. რეალურად, თუ შეწყდება, ეს კარგიცაა, რადგან ძალიან ფრთხილად უნდა მოვეკიდოთ რუსულ კაპიტალს. ჩვენი ბედნიერება ის იყო და იმიტომ არ აღმოჩნდა ჩვენთან მეხუთე კოლონა, რომ აქ იმდენი რუსი არ ჩამოდიოდა. ნახეთ, ბალტიისპირეთი რა დღეშია. რიგის ყოფილი მერი რუსაკოვი რუსი იყო, ახლა გაუვიდა ვადა და ევროპარლამენტარად აირჩიეს, ანუ რუსაკოვი გახდა რიგის წარმომადგენელი ევროპარლამენტში. ჩვენთან იმდენი რუსი არ არის, ამიტომ მეხუთე კოლონა არ გვაქვს, მაგრამ, თუ საქართველოში რუსებმა საწარმოები გახსნეს, აქ ჩამოვიდნენ, პროდუქცია აწარმოეს, ევროპაში გაყიდეს ეს პროდუქცია, ფული მაგათია და ესენი 10-15 წლის შემდეგ იქნებიან უკვე ძალიან ძლიერი მეხუთე კოლონა“, - აცხადებს სოსო ცინცაძე.

მისივე განმატებით, რუსები ბინებსაც ყიდულობენ საქართველოში და 1100 ობიექტი რომ აქვთ, იქ სავაჭრო ცენტრიც შედის, ბინაც და მიწაც, თანაც ორმაგ მოქალაქეობას, ათას პრივილეგიას მიიღებენ და 15-20 წლის შემდეგ უკვე მეხუთე კოლონად მოგვევლინებიან.

პოლიტოლოგს აინტერესებს, ნუთუ არ გვყოფნის, რომ ბათუმში უკვე გვყავს თურქული მეხუთე კოლონა. თბილისშიც, ალბათ, სულ მალე გვეყოლება ისლამური რელიგიური მეხუთე კოლონა, მაგრამ ეს ნაკლებად საშიშია, რადგან ისლამური რელიგიური მეხუთე კოლონა არ მოითხოვს საქართველოში პოლიტიკურ უფლებას, არც იმას მოითხოვს, თბილისი მიუერთონ ირანს. მაგრამ რუსული მეხუთე კოლონა ძალზე საშიშია, ეს არა მარტო ჩვენი ქვეყნის ეკონომიკური, არამედ პოლიტიკური ექსპანსიაა.

„მეორე მხარეც დამაფიქრებელია. ჩემთან კახელი ნათესავი იყო ჩამოსული, მეღვინე, ფერმერი და მითხრა, ბოლო ხუთი წელია, საერთოდ ნაგავი მიდის რუსეთშიო, ანუ უხარისხო ღვინო. უწამლი ყურძენი, რომელიც 30 თეთრი ღირდა, ახლა ღირს ლარი, რადგან მისგან დაწურული ღვინოც მიდის რუსეთში, როგორც საფერავი. აქამდე პუტინი ამაზე თვალს ხუჭავდა, რადგან ჩვენი ღვინო იაფი იყო ევროპულთან შედარებით, მაგრამ ახლა პუტინს დასჭირდა და „როსპოტრებნადზორმაც“ საჯაროდ განაცხადა, უკვე ყველაფერი შემოდის საქართველოდან ღვინის სახითო. იქაური მეღვინეების იმპორტიორთა ასოციაციის წარმომადგენელმა, ეროვნებით სომეხმა პირდაპირ ახსენა სიტყვა  „პამოიკა“. კაცმა რომ თქვას, ჩვენთანაც ასე არ ხდება? ვთქვათ, გაიხსნება რესტორანი საქართველოში, რამდენიმე თვე მისაღები ფასებია, კარგი პროდუქცია, გემრიელი საჭმელია, მიიზიდავენ კლიენტებს და მერე იქ შესვლა უკვე აღარ შეიძლება, აფუჭებენ ხარისხს. ამიტომ არაფერი არ უნდა გაგვიკვირდეს“.