რონალდოს "იუვენტუსში" გადასვლის შემდეგ "რეალს" პრობლემები დაეწყო და ესპანელი ჟურნალისტები მარჩიელობენ, ვინ შეიძლება შეცვალოს კრიშტიანო. As-ის მიმომხილველმა ალეკს დე ლიანომ შორტ-ლისტი გამოაქვეყნა და მასში ოლივიე ჟირუსთან (ჩელსი), რადამელ ფალკაოსთან (მონაკო), ბას დოსტთან (სპორტინგი) და ემილიანო სალასთან (ნანტი) ერთად მოსკოვის "ლოკომოტივის" 28 წლის თავდამსხმელი ფედორ სმოლოვიც შეიყვანა.

"ფედორი ჩემს მიერ დასახელებულთა შორის ყველაზე უნივერსალურია, ორჯერ იყო რუსეთის ჩემპიონატის ბომბარდირი. რუსეთის ეკონომიკა დაზარალდა სანქციების გამო, დაეცა რუბლის კურსი, ნავთობზე ფასი და შესაძლოა, კლუბს ვარსკვლავების გაყიდვა მოუწიოს.

სმოლოვი ადვილად შეერწყმება სოლარის სწორხაზოვან შემტევ ფილოსოფიას, "რეალში" რამდენიმე თვის თამაშმა კი შეიძლება ის რუსეთის ნაკრებში დააბრუნოს, რომელიც იმიტომ დატოვა, რომ ძიუბასთან კონკურენციას ვერ გაუძლო", - წერს დე ლიანო.