საქართველოს შინაგან საქმეთა მინისტრ გიორგი გახარიას დღეს პარლამენტში მოუსმენენ. მინისტრი პლენარულ სხდომაზე კანონმდებლებს საკუთარი საქმიანობის შედეგებს გააცნობს, რის შემდეგაც შეხვედრა კითხვა-პასუხის რეჟიმში გაგრძელდება.
ერთ-ერთი მთავარი განსახილველი საკითხი – ხორავას ქუჩის ტრაგედია იქნება. მმართველი გუნდის წარმომადგენელთა ინფორმაციით,შინაგან საქმეთა მინისტრს ხორავას ქუჩის საქმეზე შექმნილი საგამოძიებო კომისიის რეკომენდაციებთან დაკავშირებით დაუსვამენ კითხვებს.
ამასთან, როგორც პირველ არხს ხორავას ქუჩაზე მოკლული ერთ-ერთი არასრულწლოვნის მამამ, ზაზა სარალიძემ განუცხადა, ის დღეს პარლამენტში მისვლას გეგმავს.
საპარლამენტო უმცირესობის წარმომადგენლებს გიორგი გახარიასთან კითხვები ექნებათ ზუგდიდის მე-6 საჯარო სკოლის ყოფილი დირექტორის გარდაცვალებაზე. უმცირესობას შს მინისტრთან კითხვები არჩევნების მეორე ტურთან დაკავშირებითაც აქვთ.
