საარჩევნო ადმინისტრაციას პატივი უნდა ვცეთ, თუმცა ყველაფერი იმაზე მიანიშნებს, რომ დამაჯერებელი გამარჯვება მოპოვებულია პირველ ტურში, რასაც ოფიცილაური მონაცემები დაადასტურებს - ამის შესახებ პირველი არხის ეთერში პარლამენტის თავმჯდომარემ, ირაკლი კობახიძემ განაცხადა. მან ადგილობრივი თვითმართველობის არჩევნების პირველადი შედეგები შეაფასა. კობახიძის თქმით, კახი კალაძემ ძალიან დამაჯერებელი და ღირსეული გამარჯვება მოიპოვა.

„კახი კალაძეს ძალიან დამაჯერებელ და ღირსეულ გამარჯვებას ვულოცავ. საარჩევნო ადმინისტრაციას პატივი უნდა ვცეთ და ოფიციალურ შედეგებს უნდა დაველოდოთ, თუმცა ყველაფერი მიუთითებს იმაზე, რომ კახიმ ძალიან დამაჯერებელი და ღირსეული გამარჯვება მოიპოვა. თითოეულ ამომრჩეველს მადლობას ვუხდი, რომელმაც თავისი სამოქალაქო პოზიცია გამოაცხადა, არჩევნებზე მივიდა და მხარი სიცოცხლით სავსე ქალაქს დაუჭირა. მსურს, კახის ამ საპასუხისმგებლო პოსტზე წარმატებები ვუსურვო. ჩვენ სოციოლოგიური კვლევის შედეგები გქვონდა და არაერთხელ გვისაუბრია ამაზე. ვიცოდით, რომ მხარდაჭერა ძალიან მაღალი იყო, თუმცა ყველაფერი დამოკიდებული ამომრჩეველზე იყო“, - აღნიშნა სპიკერმა. 

კობახიძე არჩევნების დღეს განვითარებულ პროცესებსაც გამოეხმაურა.

„ნებისმიერ არჩევნებს ასეთი მოვლენები თან სდევს, თუმცა ყველა დამეთანხმებით, რომ არჩევნების დღემ ძალიან მშვიდობიან და სამართლიან გარემოში ჩაიარა. სწორედ ამ ვითარებაში დადგა ის შედეგი, რაც „ქართული ოცნების“ გამარჯვებას გულისხმობს. „ქართულმა ოცნებამ“ ქვეყნის მასშტაბით ძალიან დამაჯერებელი გამარჯვება მოიპოვა“, - განაცხადა კობახიძემ. 

ეგზიტპოლის პირველადი შედეგების მიხედვით, 21 ოქტომბრის არჩევნებში „ქართული ოცნების“ თბილისის მერობის კანდიდატმა კახი კალაძემ ხმების 54 პროცენტი მიიღო, „ნაციონალური მოძრაობის“ წარმომადგენელმა ზაალ უდუმაშვილმა 15 პროცენტი, დამოუკიდებელმა კანდიდატმა ალეკო ელისაშვილმა 14 პროცენტი, „ევროპული საქართველოს“ კანდიდატმა ელენე ხოშტარიამ 7 პროცენტი.