პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილის თქმით, მოქმედი ეროვნული უშიშროების საბჭო, უბრალოდ სათათბირო ორგანოა და მეტი არაფერი.
როგორც სესიაშვილმა ჟურნალისტებს საკითხის კომეტირებისას განუცხადა, უშიშროების საბჭო იღებს ერთადერთ გადაწყვეტილებას და ეს არის შეიარაღებული ძალების რიცხოვნობის განსაზღვრა. დეპუტატი მიიჩნევს, რომ ყველა პოლიტიკური ძალა თანმხდება, რომ ქვეყნის თავდაცვა არის ყველას ინტერესი, ამიტომ სესიაშვილი გამორიცხავს საკითხზე რაიმე ვიწრო პოლიტიკურ ინტერესს რომელიმე პოლიტიკური ძალის მხრიდან.
ირაკლი სესიაშვილი იმედოვნებს, რომ შეთანხმებას მიაღწევს იმ ადამიანებთან, რომლებიც კონსტიტუციური ცვლილებების თავდაცვის მონაკვეთზე მსჯელობენ და შეიქმნება ისეთი კონსტიტუციური სისტემა, რომელიც პირველ რიგში ქვეყნის ადეკვატურ თავდაცვისუნარიანობას უზრუნველყოფს.
”რაც შეეხება ეროვნულ უშიშროების საბჭოს, ამ თემაზე მთელი რიგი პოლიტიკური სპეკულაციები სცილდება რეალობას. დღევანდელი უშიშროების საბჭო არის მხოლოდ და მხოლოდ სათათბირო ორგანო და მეტი არაფერი, რომელიც იღებს ერთადერთ გადაწყვეტილებას, ეს არის შეიაღარებული ძალების რიცხოვნობის განსაზღვრა, რაც არ შეცვლილა მას შემდეგ რაც საქართველოს შეიარაღებული ძალები არსებობს. პრეზიდენტთან რჩება ყველა ის უფლებამოსილება, რაც აქამდე ჰქონდა და თავისთავად მთავრობას აქვს თავისი წილი პასუხისმგებლობა. საუბარი იმაზე, რომ უშიშროების საბჭო წყვეტს ქვეყნის თავდაცვისუნარიანობას, სცილდება ყველანაირ ჯანსაღ და საღ აზროვნებას. პირიქით, საერთაშორისო ორგანიზაციები, ვენეციის კომისია გვაძლევს რეკომენდაციას, რომ უნდა შევქმნათ ეფექტური ორგანო. შარშან ორჯერ შეიკრიბა ეროვნული უშიშროების საბჭო და თქვენ გინდათ დამაჯეროთ, რომ პრეზიდენტმა, ვინც არ უნდა იყოს იქ, მიიღო იმდენი რჩევა, იმდენი განათლება და ინფორმაცია, რომ მის მიერ მიღებულ გადაწყვეტილებაზე რაიმე ზეგავლენა მოახდინა? რა თქმა უნდა, არა. მე თავად ვარ უშიშროების საბჭოს წევრი და ვიცი რაზე ვმსჯელობთ იქ. ჩვენ ვსაუბრობთ, რომ თავდასხმის შემთხვევაში საჭიროა პოლიტიკური კონსოლიდაცია, სწორედ ამიტომ არის შემოთავაზებული თავდაცვის საბჭოც”, - განაცხადა ირაკლი სესიაშვილმა.
პარლამენტის თავდაცვისა და უშიშროების კომიტეტის სხდომაზე საკონსტიტუციო ცვლილებების თავდაცვის და უსაფრთხოების მიმართულებაზე მსჯელობენ.
