რეგლამენტი არ გვაძლევს საშუალებას, პარლამენტის ნდობის ჯგუფის მეხუთე წევრად ირმა ინაშვილი დაფიქსირდეს, - აღნიშნული განმარტება ბიუროს სხდომაზე პარლამენტის თავმჯდომარემ ირაკლი კობახიძემ გააკეთა.
პარლამენტს ბიუროს დღეს წარედგინა ფრაქცია “საქართველოს პატრიოტების“ მიმართვა, პარლამენტმა ცნობად მიიღოს ნდობის ჯგუფის შექმნა, მის შემადგენლობაში ირმა ინაშვილის ჩათვლით.
“ნდობის ჯგუფში ხუთი წევრი უნდა შედიოდეს. იყო პრობლემა მეხუთე წევრის წარდგენასთან დაკავშირებით. ფრაქცია გვთავაზობს, ცნობად მივიღოთ ნდობის ჯგუფის ჩამოყალიბება მეხუთე წევრის ჩათვლით. ამის საშუალება ბიუროს არ აქვს. რეგლამენტის გათვალისწინებით, ნდობის ჯგუფში ერთ წევრს უმრავლესობისა და უმცირესობის გარეთ დარჩენილი დეპუტატები წარადგენენ - უმრავლესობის წესით. გამომდინარე იქიდან, რომ უმრავლესობა არც ერთ ფრაქციას არ აქვს - არც ფრაქცია “საქართველოს პატრიოტებს“ და არც “ნაციონალურ მოძრაობას“, ვერც ერთი ვერ ახერხებს ნდობის ჯგუფში წევრის წარდგენას. ეს არის არსებული მდგომარეობა“, - განაცხადა კობახიძემ.
“ნდობის ჯგუფის შესახებ“ კანონის გათვალისწინებით, ნდობის 5-კაციანი ჯგუფის ერთი წევრი უმრავლესობისა და უმცირესობის გარეთ დარჩენილ პარლამენტის წევრთაგან მეტის მხარდაჭერით წარდგენილი პირი უნდა იყოს.
აღნიშნული კვოტით ფრაქცია “საქართველოს პატრიოტებმა“, რომელიც ექვსი დეპუტატისგან შედგება, ნდობის ჯგუფში ირმა ინაშვილი წარადგინა. ეს წარდგენა დეკემბრის ბოლოს მოხდა, როცა უმრავლესობისა და უმცირესობის გარეთ სულ შვიდი დეპუტატი: - ფრაქცია “საქართველოს პატრიოტების“ წევრები და მთაწმინდის მაჟორიტარი სალომე ზურაბიშვილი იყვნენ.
“ერთიანი ნაციონალური მოძრაობის“ გაყოფის შემდეგ, უმრავლესობისა და უმცირესობის გარეთ აღმოჩნდა ფრაქცია “ნაციონალური მოძრაობა“, რომელიც ასევე ექვსი წევრისაგან შედგება და რომელმაც აღნიშნული კვოტით ნდობის ჯგუფში სალომე სამადაშვილის კანდიდატურა წარადგინა.
ხმები თანაბრად - ექვსი-ექვსზე გაიყო. ე.წ. დამოუკიდებელი დეპუტატი სალომე ზურაბიშვილი კი, არც ერთი ფრაქციის კანდიდატურისთვის მხარდაჭერას არ აპირებს.