საზოგადოებრივი მაუწყებლის ხელში ჩაგდება „ჯი-დი-ესის“ თანამშრომლების მიერ არის არანაკლები პრობლემა, ვიდრე „რუსთავი 2“-ის სასამართლო დავა, - ამის შესახებ „რესპუბლიკური პარტიის“ წევრმა დავით ბერძენიშვილმა „რუსთავი 2“-ის მხარდამჭერი აქციის დასრულების შემდეგ განაცხადა.

„მე ვიცავ ნებისმიერ მედიასაშაულებას, რომელიც არ არის კონტროლირებადი ხელისუფლებისგან, „იმედი“ და „მაესტრო“ ასევე იყო ჩვენი მხრიდან დაცული 2007 წელს. საზოგადოებრივ მაუწყებელს აქვს ძალიან დიდი პრობლემა. საზოგადოებრივი მაუწყებლის ხელში ჩაგდება „ჯი-დი-ესის“ თანამშრომლების მიერ, ივანიშვილის მიერ, არის არანაკლები პრობლემა, ვიდრე „რუსთავი 2“-ის სასამართლო დავა. ამიტომ მე დღეს აქედან საზოგადოებრივი მაუწყებლის თავისუფლებასაც ვიცავ. საქართველოში არის ელექტრონული მედიასაშუალებები, ტელევიზიები, სადაც ზოგს დიდი გამოცდილება აქვს ხელისუფლებასთან გამკლავების, როგორც „რუსთავი 2“-ს, ასევე, რუსთავი 2“-ს აქვს გამოცდილება ხელისუფლებასთან ლამის შეზრდის სააკაშვილის დროს - ეს ყველაფერი იყო, მაგრამ მთავარია ის, რომ ყველა მედიასაშუალება არის დასაცავი“, - განაცხადა ბერძენიშვილმა და დასძინა, რომ პირველი ეტაპი არის ხელისუფლებისგან თავისუფალი მედიის დაცვა და შემდეგ, ყველა სხვა მედიის. 

ბერძენიშვილის თქმით, მედიის დაცვა შეუძლია მხოლოდ საზოგადოებას.