”ნაციონალური მოძრაობის” წევრი თინა ბოკუჩავა ე.წ. უგულავა-ბოკერიას გუნდის წევრების პარტიიდან გასვლის შემთხვევაში, მათ მიერ სხვა პარტიის შექმნასა და პარლამენტში ახალი ფრაქციის ჩამოყალიბებას პროგნოზირებს. როგორც ბოკუჩავამ ”ინტერპრესნიუსს” განუცხადა, სამწუხარო იქნება მათი მხრიდან პარტიის დატოვება, თუმცა ეს მათი გადაწყვეტილება იქნება.

”ყველა ზრდასრული პოლიტიკოსია და თავის გადაწყვეტილებას თავად იღებს. ისინი ალბათ შექმნიან სხვა პარტიას, სხვა ფრაქციას პარლამენტის შიგნით”, - აღნიშნა ბოკუჩავამ.

პარლამენტში ფრაქციის შექმნისთვის 6 დეპუტატია საჭირო. კითხვაზე, დარჩება თუ არა სააკაშვილის ფლანგს დეპუტატების ის რაოდენობა, რაც ახალი ფრაქციის შექმნისთვის იქნება აუცილებელი, ბოკუჩავას თქმით, მისი, ნიკა მელიასა და კობა ნაყოფიას გარდა, იქნებიან სხვა დეპუტატებიც, რომლებიც მათ გვერდში დადგებიან.

”ის დეპუტატები, რომლებიც არ გავყვებით ვინც პარტიიდან წავა, დავრჩებით „ნაციონალურ მოძრაობაში“, მათ შორის პარლამენტში. მე დარწმუნებული ვარ, რომ ყოველთვის აღმოჩნდებიან ადამიანები, რომლებიც ერთგული რჩებიან იმ ღირებულებების, რაზეც ”ნაციონალური მოძრაობა” დგას და დარჩებიან ივანიშვილთან ბრძოლის წინა ხაზზე. ასეთი ადამიანები უკვე იცით, რომ ვართ მე, ნიკა მელია, კობა ნაყოფია და იქნებიან სხვებიც, რომლებსაც საჯაროდ არ უსაუბრიათ ამ ეტაპზე. დარწმუნებული ვარ, რომ უახლოეს დღეებში სხვა დეპუტატების პოზიციაც გახდება ცნობილი”, - განაცხადა ბოკუჩავამ.

”ნაციონალური მოძრაობა” პარლამენტში 27 დეპუტატით არის წარმოდგენილი. აქედან ნაწილი ე.წ. უგულავა-ბოკერიას ფლანგშია, რომლებიც 7 000-იანი ყრილობის ჩატარებას ეწინააღმდეგებიან, ნაწილი კი ე.წ. სააკაშვილის გუნდში, რომლებიც ყრილობის ჩატარებას უჭერენ მხარს. აღნიშნული ჯგუფები ერთმანეთს სწორედ ყრილობის გამო დაუპირისპირდნენ.

პარტია " ნაციონალური მოძრაობიდან" ბაქრაძე- ბოკერიას ფლანგის გასვლის შემთხვევაში, გარდაუვალი იქნება გადაჯგუფება საპარლამენტო უმცირესობის შემადგენლობაში, რომელიც პარლამენტის 27 წევრით არის წარმოდგენილი. ამასთან, არსებული სურათის გათვალისწინებით, საპარლამენტო უმცირესობის სტატუსს, სავარაუდოდ, ბაქრაძე-ბოკერიას ფლანგი შეინარჩუნებს.