უფალმა ინებოს, რომ მომავალი წელიც მშვიდობიანი იყოს, - ამის შესახებ სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა ილია მეორემ სამების საკათედრო ტაძარში საკვირაო ქადაგებისას განაცხადა.
„ეს წელიწადი ილევა და ჩვენ ვმადლობთ უფალს მისი დიდი წყალობისთვის, მშვიდობისთვის და ინებოს უფალმა, რომ მომავალი წელიც მშვიდობიანი იყოს“, - აღნიშნა პატრიარქმა.
დღესვე, საკვირაო ქადაგების დასრულების შემდეგ მისმა უწმინდესობამ რამდენიმე მღვდელმსახური დააჯილდოვა, ასევე ომის ვეტერანები და მათი ოჯახები დალოცა. პატრიარქის თქმით, სწორედ ეს ადამიანები არიან, ვის მხრებზეც გადაიარა საშინელმა ომებმა.
