ხელისუფლებამ ყველაფერი გააკეთა, რათა რუსეთს თავისი მიზნისთვის მიეღწია, - ამის შესახებ ”ერთიანი ნაციონალური მოძრაობის“ ერთ-ერთმა ლიდერმა გიგი წერეთელმა განაცხადა, რომელმაც დღეს გამართულ პრესკონფერენციაზე ეუთო-ს საპარლამენტო ასამბლეის თბილისში გამართული სესია შეაფასა.
”უპირველეს ყოვლისა, უნდა აღინიშნოს, რომ ეუთო-ს საპარლამენტო ასამბლეა საქართველოში საკმაოდ მაღალ დონეზე ჩატარდა. ჩვენ მივიღეთ თბილისის დეკლარაცია, სადაც საქართველოში კონფლიქტის შესახებ მნიშვენლოვანი ჩანაწერებია. საქართველოს ამ ასამბლეაზე შანსი ჰქონდა კიდევ უფრო მყარი პოზიციები ჰქონოდა და აქტიურად ეწარმოებინა თავისი პოლიტიკა, როგორც ევროინტეგრაციის, ასევე საქართველოს ტერიტორიების დეოკუპაციის კუთხით, დევნილთა დაბრუნებისა და საქართველოში ეუთოს მისიის აღდგენის; შანსები იმის, რომ საქართველოს წარმომადგენელი ეუთო-ს პრეზიდენტი გამხდარიყო, ძალიან მაღალი იყო, ამაზე ის რეაქციები და გააფთრებული ბრძოლა მეტყველებს, რომლებიც საქართველოს ხელისუფლების მიერ ჩემს წინააღმდეგ წარიმართა. ეს საკმაოდ დასანანი ფაქტია. ისე გამოვიდა, რომ ხელისუფლებამ ყველაფერი გააკეთა, რათა რუსეთს თავისი მიზნისთვის მიეღწია”, - განაცხადა გიგი წერეთელმა.
მისივე თქმით, ეს ძალიან დასანანი ფაქტია და მიუთითებს იმაზე, რომ საქართველოს ხელისუფლება არა საქართველოს ინტერესებიდან, არამედ ვიწროპარტიული ინტერესებიდან გამომდინარე მოქმედებდა.
”დაიკარგება შესაძლებლობები, რომლითაც ჩვენს ქვეყანას უფრო მეტი გავლენა ექნებოდა საერთაშორისო პოლიტიკურ პროცესებზე. მინდა მადლობა ვუთხრა ყველა იმ ადამიანს, ვინც ამ დღეების განმავლობაში საქართველოს მხარდაჭერას გამოხატავდა და არა კონკრეტულად გიგი წერეთლის. არ შემიძლია არ აღვნიშნო საქართველოს პრეზიდენტის პოზიცია, რომელმაც ნამდვილად სახელმწიფოებრივი არჩევანი გააკეთა. მე ვრჩები ამ ასამბლეის ვიცე- პრეზიდენტად და ”ევროპის სახალხო პარტიის” ფრაქციის თავმჯდომარედ”, - აღნიშნა გიგი წერეთელმა.
აღნიშნულ ინფორმაციას „ერთიანი ნაციონალური მოძრაობა“ ავრცელებს.
