ახლად აღმოჩენილ გარემოებათა საფუძველზე, იმ პირთა განაჩენების გადახედვა მოხდება, რომლებსაც პოლიტპატიმართა და პოლიტდევნილთა სტატუსი აქვთ მინიჭებული. საქმე პარლამენტის 2012 წლის 5 დეკემბრის დადგენილებაში შეყვანილ პირებს ეხება.

სისხლის სამართლის საპროცესო კანონმდებლობაში დაგეგმილი ცვლილებები პარლამენტმა დღეს 80 ხმით ერთხმად - მესამე მოსმენით დაამტკიცა.

”სისხლის სამართლის საპროცესო კოდექსს” დაემატა მუხლი, რომლის მიხედვით, ახლად გამოვლენილ გარემოებათა გამო გადაისინჯება განაჩენი საქართველოს პარლამენტის 2012 წლის 5 დეკემბრის დადგენილებით პოლიტიკური ნიშნით დაპატიმრებულ ან პოლიტიკური ნიშნით დევნილ პირად მიჩნეული მსჯავრდებულების მიმართ, თუ ეს განაჩენი გამოტანილია აღნიშნული დადგენილების მიღებამდე და შესაბამისი შუამდგომლობა სასამართლოში წარდგენილი იქნება 2017 წლის 1-ელ ივნისამდე.

პარლამენტის 2012 წლის 5 დეკემბრის დადგენილებით, 190 მსჯავრდებული მიჩნეულია პოლიტიკური ნიშნით დაპატიმრებულ პირად, ხოლო 25 პირს პოლიტიკური ნიშნით დევნილის სტატუსი მიენიჭა.

აღნიშნული პირები 2012 წლის 28 დეკემბრის ამნისტიის საფუძველზე გათავისუფლდნენ.