საქართველოს პარლამენტმა მუშაობა განაახლა. საკანონმდებლო ორგანოში საშემოდგომო სესია ბიუროს სხდომით გაიხსნა. საშემოდგომო სესიის ფარგლებში დაგეგმილია საკონსტიტუციო პროექტის მესამე მოსმენით მიღება. პარლამენტის სხდომა, ტარდიციულად, უმრავლესობა-უმცირესობას შორის ურთიერთდაპირისპირების და ბრალდებების ფონზე წარიმართა.
საპარლამენტო ოპოზიციამ მმართველი გუნდი იმის გამო გააკრიტიკა, რომ ბოლო ერთი თვის განმავლობაში გაჩენილი ხანძრები დროულად ვერ ჩააქრო. ფრაქცია „ევროპული საქართველოს“ თავმჯდომარემ, ოთარ კახიძემ აღნიშნა, რომ კრიზისების მართვის საბჭო საკუთარ ფუნქციას ვერ ასრულებს და „ქართული ოცნების“ ყოფილი მაღალჩინოსანი ძალოვანების დასასაქმებლად არის გამოყენებული.
როგორც კახიძემ აღნიშნა, არსებული რელიეფიდან და კლიმატური პირობებიდან გამომდინარესამომავლოდაც არის მოსალოდნელი მსგავსი რამ, ამიტომ გათვალისწინებული უნდა იქნას ყველა ის ხარვეზი, რომელიც გამოვლინდა. მისი თქმით, ხარვეზი იყო მართვისა და კოორდინაციის დროს.
„ნამდვილად არ გვაქვს იმის თქმის საფუძველი, რომ ყველაფერი კარგად იყო კოორდინირებული. სახელმწიფოში არის კრიზისების მართვის არაეფექტური მექანიზმი, ბატონი ჯანელიძისა და ბატონი ჭიკაიძის ხელმძღვანელობით, რომლებმაც თქვეს, რომ მაშინ ჩაერთვნენ სამუშაოებში, როცა კანონმდებლობამ მოითხოვა. ანუ, ისინი კანონმდებლობას უყურებდნენ, როცა ხანძარი მწვავდებოდა. ეს ხანძარი, რომელიც გაჩნდა ბორჯომ-ხარაგაულის ტყე-პარკში, მალევე იყო აღმოჩენილი, თუმცა რეაგირება დაგვიანდა“, - განაცადა ოთარ კახიძემ.
გარდა ამისა, ოთარ კახიძემ ხელისუფლება რუსეთისთვის დახმარების თხოვნით მიმართვის ინფორმაციის დამალვაში დაადანაშაულა და აღნიშნა, რომ ხელისუფლებას დროულად უნდა მოეთხოვა დახმარება მეგობარი ქვეყნებისგან. შესაბამისად, „ევროპული საქართველო“ პარლამენტში მიხეილ ჯანელიძეს იბარებს.
„თურმე საგარეო საქმეთა სამინისტროს ნოტა გაუგზავნია რუსეთისთვის, რომელმაც 2008 წლის აგვისტოში აალებადი ჭურვები ხანძრის გასაჩენად ჩამოყარა სწორედ ბორჯომის ტყეში. არაადეკვატური ქმედებაა რუსეთისთვის მიმართვა და ამიტომაც მალავდა ხელისუფლება ამ ნაბიჯს. უმცირესობის ფორმატში ჩვენ დავიბარეთ ბატონი მიხეილ ჯანელიძე, რომლის წინაშეც უნდა დაისვას ყველა კითხვა თუ რა ნაბიჯებს დგამს საქართველოს ხელისუფლება ოკუპანტ ქვეყანასთან მიმართებაში“, - აღნიშნა ოთარ კახიძემ.
სხდომაზე, ოთარ კახიძეს პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა უაპასუხა, რომ მისი კრიტიკა უსაფუძვლოა. როგორც სესიაშვილმა აღნიშნა, კრიზისული სიტუაციების მართვის საბჭო უმნიშვნელოვანეს როლს ასრულებს ქვეყანაში. სესიაშვილი კახიძეს ურჩევს გაერკვიოთ კრიზისების მართვის საბჭოს ფუნქციებში.
„თქვენ უსაფუძვლო კრიტიკით ცდილობთ, რომ დააკნინოთ ის სახელმწიფო სტრუქტურები, ინსტრუმენტები, რომლებიც ოფიციალურად არიან ამ ქვეყანაში მსგავსი ტიპის კრიზისების მართვის დასაძლევლად. ჩემი რჩევაა ბატონო ოთარ, რომ გაერკვიოთ კრიზისების საბჭოს ფუნქციებში, მათ ინსტრუქციებში, იმ გეგმებში, რომელიც ამ უწყებას გააჩნია და მეტსაც გირჩევთ, იქნებ ერთხელ კეთილი ინებოთ და მიბრძანდეთ კრიზისების საბჭოში, დეპუტატი ხართ და გაქვთ ამის უფლება. გაერკვიეთ ფუნქციებში, ცოტა კვალიფიკაციაზეც იზრუნეთ და შემდეგ კრიტიკას სიამოვნებით მივიღებთ“, - მიმართა ირაკლი სესიაშვილმა.
სესიაშვილის კრიტიკას კახიძის კოლეგამ, „ევროპული საქართველოდან“ ირმა ნადირაშვილმა უპასუხა და ურჩია, რომ პრემიერ-მინისტრს ურჩიოს კრიზისების მართვის საბჭო გადაყენებული ჩინოვნიკების თავშესაფრიდან რეალურ ქმედით ორგანოდ აქციოს.
„ურჩიოს ბატონ ჭიკაიძეს, რომ არ წავიდეს შვებულებაში მაშინ, როცა ხანძარშია გახვეული საქართველო. მართალია, ის აქ ყოფნით ვერაფერს გააკეთებდა, მაგრამ ხალხს მაინც არ ალაპარაკებდა. ვურჩევ სესიაშვილს, ურჩიოს შინაგან საქმეთა მინისტრს, არ უპასუხოს ყველა სატელეფონო ზარს და არ მოუყვეს ყველა დეტალი რაც იცის, ეს ქვეყნის უსაფრთხოებისთვის არის ძალიან სახიფათო“, - განაცხადა ირმა ნადირაშვილმა.
კრიზისების მმართვის საბჭო არ იყო ერთ-ერთი საკითხი, რომელიც უმრავლესობასა და ოპოზიციას შორის სიტყვიერი დაპირისპირების მიზეზი გახდა. ოპოზიციამ მთავრობა და კერძოდ ფინანსთა მინისტრი ერვნული ვალუტის გაუფასურებაში დაადანაშაულა. „ნაციონალური მოძრაობის“ ლიდერის რომან გოცირიძის განცხადებით, ლარის გაუფასურების ძაღლის თავი დამარხულია ფინანსთა სამინისტროს ეზოში, თანაც ისე, რომ მთელი თავი ძალიან კარგად მოჩანს.
„ლარის გაუფასურების არავითარი ფუნდამენტური საფუძველი საქართველოში არ არსებობს. არც შიდა ფაქტორი, არც საგარეო. აბსოლუტურმა უმრავლესობამ არც კი იცის, თუ რა მავნე, ავანტიურისტული მექანიზმი დანერგა საქართველოს ფინანსთა სამინისტრომ 2 თვის წინ. ფინანსთა სამინისტრომ შემოიღო ახალი ინსტრუმენტი - 5 ივლისს დაიწყო ბიუჯეტში წლობით ნაგროვი ნაშთების გასესხება კომერციულ ბანკებზე და თქვენ იცით, რა რაოდენობის ფული მისცა სესხად ბოლო 2 თვის განმავლობაში ხაზინამ ე.წ. ახლად შემოღებული სახაზინო აუქციონების მეშვეობით?! - ნახევარი მილიარდი ლარი.
ორი თვის განმავლობაში საქართველოს ფინანსთა სამინისტრომ კომერციულ ბანკებს მიაწოდა სამთვიანი საკრედიტო რესურსი, რომელიც წარმოადგენს ქვეყანაში მიმოქცევაში არსებული ლარის მთელი მასის 9%-ს. ვინ მოიგონა ეს უგუნური წესი? თქვენ ყველამ იცით, რომ ფინანსთა სამინისტრო კომერციული ბანკებიდან აქეთ იღებს სესხს ბიუჯეტის დეფიციტის დასაფინანსებლად. ვის მოუვიდა აზრად, რომ ბიუჯეტის ნაშთებით დაიწყოს მევახშეობა, ფულის გაპროცენტება? ფინანსთა სამინისტრომ, მთავრობამ უნდა აგოს ამაზე პასუხი და თქვას, ვის თავში დაიბადა ეს მავნე მექანიზმი“, - განაცხადა რომან გოცირიძემ.
გოცირიძისგან განსხვავებით, ლარის გაუფასურებას ფსიქოლოგიური ფაქტორით ხსნის პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძე, რომლის განცხადებით, დევალვაციის ფუნდამენტური მაკროეკონომიკური საფუძვლები ქვეყანაში არ არსებობს. კოვზანაძის განმარტებით, აგვისტოს ბოლოს, სავალუტო ბაზრის მონაწილეებმა დაბალი კურსის პირობებში დამატებითი შესყიდვები განახორციელეს, რამაც ლარის კურსზე ზედმეტი გავლენა მოახდინა.
„ამ მოვლენას აქვს დროებითი და მოკლევადიანი ხასიათი. საქართველოში მოქმედებს თავისუფალი გაცვლითი კურსი. ამიტომ მოძრაობა შეიძლება იყოს ორმხრივი - როგორც ლარის გამყარების, ასევე დევალვაციის კუთხით. მთელი ზაფხულის განმავლობაში საქართველოს მოსახლეობა ხედავდა, რომ გვქონდა ლარის გამყარება.
საქართველოს ეროვნულმა ბანკმა პრაქტიკულად არ დაუშვა ლარის მკვეთრი გამყარება. შეძენილი იქნა თითქმის 110 მილიონი დოლარი. ამით შევსებულ იქნა ეროვნული ბანკის რეზერვები, რითაც მხარი დაეჭირა ქვეყანაში ფინანსური და მონეტარული სტაბილურობის შენარჩუნებას. ამ თვალსაზრისით გადაიდგა ეს ნაბიჯი“, - განაცხადა ირაკლი კოვზანაძემ პარლამენტის პლენარულ სხდომაზე.
