“სააკაშვილი ქართული სასამართლოს მიერ გასამართლდება და ეს მაშინ მოხდება, როცა ხელისუფლებაში მკაცრად ფორმირებული პატრიოტული ძალა მოვა. მჯერა, რომ პრემიერი ნამდვილი პატრიოტია, რომელსაც საქართველოზე გული შესტკივა. საერთოდ, ივანიშვილი პროქართველია, მაგრამ თუკი პარლამენტს გადავხედავთ, იქ არიან ძალები, რომლებისთვისაც, ვერ ვიტყვი, რომ მთავარი საქართველოა,” _ ამბობს ვიზენტალის ქართული ფონდის ერთ-ერთი ხელმძღვანელი მირიან ყარაულაშვილი, რომელიც “ქართულ სიტყვასთან” ექსკლუზიურ ინტერვიუში “ვარდების რევოლუციასთან” დაკავშირებულ დღემდე უცნობ ინფორმაციებს ასაჯაროებს. ცნობისთვის: სიმონ ვიზენტალმა, რომელმაც მეორე მსოფლიო ომის საკონცენტრაციო ბანაკის ჯოჯოხეთი გამოიარა, სპეციალური ფონდი დააარსა, რომელიც მთელ მსოფლიოში ნაცისტ ჯალათებს ამხელდა... ქართველი “ვიზენტალისტები” მხოლოდ “ვარდოსანთა” დანაშაულობებს კი არა, 1988 წლიდან მოყოლებული, ყველა ბურუსით მოცული საქმის გამოძიებას და ამ მასალების შესაბამისი უწყებებისთვის გადაცემას აპირებენ. ერთ-ერთი საქმე, რომელსაც ჩვენებური “ვიზენტალის ფონდი” იძიებს, სწორედ “ვარდების რევოლუციაა”. მაშ ასე, როგორ, სად და როდის “დაავერბოვკა” “კა-გე-ბე”-მ და რა გარიგება დადო მიხეილ სააკაშვილმა “ვარდების რევოლუციის” წინ ქართველ “კანონიერ ქურდებთან”? _ ამ და სხვა საინტერესო თემებზე ვიზენტალის ქართული ფონდის ერთ-ერთი ხელმძღვანელი მირიან ყარაულაშვილი საუბრობს:

 _ “ვარდების რევოლუცია”, როგორც ამბობენ, სპონტანური კი არა, წლების განმავლობაში დაგეგმილი მცოცავი პროცესი იყო, რომელიც მიზნად ხელისუფლების ხელში ჩაგდებას ითვალისწინებდა. ამაში მხოლოდ ჟვანია-სააკაშვილის გუნდები კი არა, სხვა ძალებიც მონაწილეობდნენ, რომლებიც იმ მიზნით იყვნენ გაერთიანებულნი, რომ ხელისუფლებაში ანტიეროვნული და ანტისახელმწიფოებრივი ძალები მოეყვანათ.

_ “სხვა ძალებში” ვის გულისხმობთ?
_ მათ, ვინც იმდროინდელი საქართველოს პოლიტიკურ, ეკონომიკურ თუ საყოფაცხოვრებო ურთიერთობებში თავს კომფორტულად ვერ გრძნობდნენ... სხვათა შორის, “ვარდების რევოლუციაში” “შავი სამყაროც” მინაწილეობდა. შს სამინისტროს სტრუქტურებზე ვერაფერს ვიტყვი, მაგრამ აღმასრულებელი ხელისუფლებიდან, მით უმეტეს, იმ შენობიდან, სადაც კანცელარია იყო, “შავ სამყაროს” არავინ მფარველობდა... უკმაყოფილებას ის ადამიანებიც გამოთქვამდნენ, რომლებსაც ფული სხვადასხვა მაქინაციით ჰქონდათ დაგროვილი. მაგალითად, ავიღოთ თემურ ჭყონია, რომელმაც თავის დროზე ქალაქის მერთან ახლობლობის გამო, აბსოლუტურად დაუმსახურებლად და ყოველგვარი კონკურსის გარეშე, სახელმწიფოსგან დიდი თანხა მიიღო. 1992 წელს, ედუარდ შევარდნაძე, როგორც სახელმწიფო მეთაური, თურქეთში ოფიციალური ვიზიტით ჩავიდა _ შევარდნაძე და თურქეთის იმჟამინდელი პრეზიდენტი მეგობრობდნენ. ამ ვიზიტის შემდეგ, თურქეთმა საქართველოს რამდენიმე ათეული მილიონი გამოუყო, რომელიც ეკონომიკის განვითარებას უნდა მოხმარებოდა. ეს თანხა ე.წ. ბიზნესმენებმა გაინაწილეს და ზოგმა ხუთი მილიონი აიღო, ზოგმა _ ათი. ამ ბიზნესმენებიდან ერთ-ერთი თემურ ჭყონია გახლდათ, რომელმაც ამ ფულით ცუდი საქმე გააკეთა _ ქართულ ბაზარზე “კოკა-კოლა” შემოიყვანა და ამით “ლაღიძის წყლები” დაასამარა.

_ როგორც ვიცი, ლაღიძის შვილიშვილი თემურ ჭყონიასთან, ანუ “კოკა-კოლაში” მუშაობს...
_ როგორც ჩანს, “კოკა-კოლას” ჰქონდა პირობა, რომ ბაზარზე სხვა გამაგრილებელი სასმელი არ უნდა ყოფილიყო. ამიტომ, ჭყონიამ ლაღიძის შვილიშვილი თავისთან მიიყვანა და, მგონი, აქციებიც მისცა. სხვათა შორის, “ვიზენტალის ფონდი” აპირებს, არასამთავრობო ორგანიზაცია შექმნას, რომელიც საქართველოს “ლაღიძის წყალს” დაუბრუნებს!

ე.წ. ახალგაზრდა რეფორმატორებს ბადრი პატარკაციშვილიც აფინანსებდა და, როგორც თვითონ თქვა, _ ბიძინა ივანიშვილიც.

_ ბატონო მირიან, მიხეილ სააკაშვილის, როგორც პრეზიდენტის ერთ-ერთი მთავარი, ასე ვთქვათ, პრიორიტეტი “შავ სამყაროსთან” ბრძოლა იყო. თქვენ კი, ამბობთ, რომ “ვარდების რევოლუცია” ე.წ. კანონიერი ქურდების მხარდაჭერით მოხდაო. თუკი, მართლაც, ასეა, საინტერესოა, “შავებმა” “სტავკა” სააკაშვილზე რატომ გააკეთეს და, საერთოდ, მიხეილ სააკაშვილი, როგორც პოლიტიკოსი ვინ და რა მიზნით შექმნა?

_ დიდი ეჭვი მაქვს, რომ ეს ე.წ. რეფორმატორთა ჯგუფი საბჭოთა და რუსეთის სპეცსამსახურისგანაა შექმნილი. ყოველ შემთხვევაში, თუკი თითოეული მათგანის ბიოგრაფიას გადავხედავთ, ასეთი ეჭვი გაჩნდება...

რაც შეეხება მიხეილ სააკაშვილის ქართულ პოლიტიკაში გამოჩენას, ოფიციალური ვერსიით, 1995 წელს, აშშ-ში ვიზიტის დროს, ედუარდ შევარდნაძეს ზურაბ ჟვანიამ სთხოვა, საადვოკატო კომპანია “პეტერსონ ბენქლაფში” მისულიყო, რომელთანაც ჟვანიას გარკვეული კავშირები, ალბათ, ჰქონდა და ამ შეხვედრაზე შევარდნაძეს სააკაშვილი წარუდგინეს, აი, ახალგაზრდა ქართველი, რომელიც ამ კომპანიაში მუშაობსო. ამ ვერსიის არ მჯერა, რადგან სააკაშვილს, ჯერ ერთი, გასაგიჟებელი განათლება არ აქვს _ აშშ-ში კვალიფიკაციის ამაღლების რაღაც კურსები გაიარა. მეორეც, საინტერესოა, თუ როგორ მოხვდა სააკაშვილი კიევის უნივერსიტეტში, რომელიც საბჭოთა კავშირში არაფრით გამორჩეული უმაღლესი სასწავლებელი იყო და, ძირითადად, თარჯიმნებსა და ტექნიკურ მუშაკებს ამზადებდა. ამ სასწავლებელს საერთაშორისო უნივერსიტეტი საბჭოთა კავშირის დაშლის შემდეგ დაერქვა. იქიდან გამომდინარე, რომ თარჯიმნებს ამზადებდა, ეს სასწავლებელი უშიშროების სამსახურის მხრიდან განსაკუთრებული კონტროლის ქვეშ იმყოფებოდა. როგორც ვიცი, ამ სასწავლებელში ჩარიცხვა უგამოცდოდ ხდებოდა.

_ რატომ?

_ იმიტომ, რომ ჩარიცხვის მსურველები არ იყვნენ. ისე, ჩემი ასაკის ნებისმიერ ადამიანს ახსოვს, რომ მაშინ საქართველოში მისაღები გამოცდები პირველად თეატრალურ ინსტიტუტში ტარდებოდა, მერე _ უნივერსიტეტსა და “გე-პე-ი”-ში და თუკი აბიტურიენტი ვერც ერთგან ჩააბარებდა, შეეძლო, საბუთები კიევის თარჯიმანთა ინსტიტუტში, ოდესის ხორცისა და რძის პროდუქტების გადამამუშავებელ, ან მოსკოვის საარქივო ისტორიის ინსტიტუტში შეეტანა. მახსოვს, “გე-პე-ი”-ს მესამე კორპუსთან ქალბატონი ჯდებოდა ხოლმე, რომელსაც საბუთებს მიუტანდი და ზემოხსენებულ სასწავლებლებში ავტომატურად გრიცხავდა. დარწმუნებული ვარ, რომ სააკაშვილმა კიევის თარჯიმანთა ინსტიტუტში სწორედ ასე ჩააბარა და თუ ეს სიმართლე არაა, მაშინ გამოვიდეს და თქვას, თუ რამდენი საგანი ჩააბარა და გამოცდებში რა ნიშნები მიიღო. ისე, როგორც ამბობენ, ამ სასწავლებლიდან უწესობის გამო გარიცხეს...

_ ბატონო მირიან, ეჭვობთ, რომ სააკაშვილს რუსულ სპეცსამსახურებთან აქვს კავშირი. თქვენი ვარაუდით, “კა-გე-ბე” მისით როდის და რატომ დაინტერესდა?

_ სააკაშვილი ისეთი ტიპაჟია და ისეთი სოციალური მდგომარეობა ჰქონდა, რომ მისი პიროვნებით “კა-გე-ბე” აუცილებლად დაინტერესდებოდა. საერთოდ, “კა-გე-ბე” ყველა წარმატებული ოჯახის შვილით ინტერესდებოდა. “გე-პე-ი”-ში ე.წ. მეორე განყოფილება არსებობდა, რომელიც მესამე-მეოთხე კურსის სტუდენტებს, რომლებიც რაღაცით გამორჩეულები იყვნენ, თანამშრომლობას სთავაზობდა.

_ ანუ, “ავერბოვკებდა”?

_ არა, ეს “ვერბოვკა” არ იყო, წადი და მეგობრებზე ინფრომაციები მოგვიტანეო. ეს ოფიციალური თანამშრომლობა იყო. საბჭოთა კავშირში უშიშროების სამი თუ ოთხი სასწავლებელი არსებობდა და ვინც ამ თანამშრომლობაზე თანხმდებოდა, სწორედ ამ სასწავლებლებში უშვებდნენ... 80-იან წლებში ეს სისტემა აღარ მუშაობდა, ამიტომ, სააკაშვილს, ალბათ, “ვერბოვკა” გაუკეთეს და გავლენის აგენტად აქციეს.

_ ყველაფერი ეს გასაგებია, მაგრამ მიხეილ სააკაშვილის ბიძა, თემურ ალასანია, როგორც ამბობენ, საბჭოთა უშიშროების თანამშრომელი იყო და დისშვილი “კა-გე-ბე”-სგან რატომ არ დაიცვა?

_ თუ არ ვცდები, 1984 წელს, ცხონებულმა ნოდარ დუმბაძემ, სხვა მწერლებთან ერთად, აშშ-ში იმოგზაურა და მერე, პატარა წიგნი დაწერა, რომელსაც, მგონი, “ოდისევსის დაბრუნება” ჰქვია. ნოდარ დუმბაძე სხვადასხვა, მათ შორის, გაერო-ში, საბჭოთა წარმომადგენლობაში გამართულ შეხვედრას აღწერს, ამ მიღებაზე ძალიან სიმპათიური ახალგაზრდა ქართველი კაცი, თემურ ალასანია გავიცანი, რომელიც ისეთი ზრდილობიანი და მოსიყვარულე აღმოჩნდა, რომ რაც აშშ-ში ვიყავით, გვერდიდან არ მოგვშორებიაო. ეს გვარი და სახელი 1992 წლის ბოლოს თუ 1993 წლის დასაწყისში გამახსენდა, როცა “საქართველოს რესპუბლიკაში” პატარა ინფორმაცია გამოქვეყნდა, ედუადრ შევარდნაძე გაერო-ს თანამშრომელ თემურ ალასანიას შეხვდაო. როგორც ირკვევა, სწორედ ამ შეხვედრაზე გადაწყდა სააკაშვილის აშშ-ში გამგზავრება _ არ ვიცი, როგორ მოუხერხეს, მაგრამ ედმუნდ მასკის სტიპენდია მიიღო.

_ თუკი სააკაშვილი რუსეთის სპეცსამსახურების გავლენის აგენტია, მაშინ გაუგებარია, კრემლს რაში აწყობდა, რომ მას “ვარდების რევოლუცია” დასავლური ეგიდით მოეხდინა?

_ მგონია, რომ 2003 წლის რევოლუციის ორგანიზატორი აშშ კი არა, რუსული სპეცსამსახური იყო! დარწმუნებული ვარ, რომ პუტინი და, საერთოდ, რუსეთის დიდი სამხედრო კორპუსი ედუარდ შევარდნაძეს ვერ იტანს, რადგან საბჭოთა კავშირის დაშლის შემდეგ, სამხედრო უშიშროების უამრავი თანამშრომელი სამსახურის კი არა, პრაქტიკულად, სახლ-კარის გარეშე დარჩა. აქედან გამომდინარე, რუს სამხედროებსა და უშიშროების თანამშრომლებს შევარდნაძის მიმართ ანტაგონიზმი აქვთ. ერთ-ერთი, ვინც საბჭოთა კავშირის დაშლით დაზარალდა, სწორედ პუტინია, რომელიც გერმანიის დემოკრატიულ რესპუბლიკაში საბჭოთა რეზიდენტურას ხელმძღვანელობდა.

ამ ფაქტორის გარდა, პუტინს მეზობელ, ანუ როგორც კრემლში თვლიან, რუსეთის გავლენის ქვეყნებში ახალი პარტნიორები სჭირდებოდა. აღსანიშნავია, რომ “ვარდების რევოლუციის” პარალელურად, ხელისუფლება სომხეთში, აზერბაიჯანსა და უკრაინაშიც შეიცვალა, ანუ როგორც კი ცოტა მომძლავრდა, პუტინმა ჩათვალა, რომ სხვადასხვა ოპერაციის განხორციელება შეეძლო...

ყურადღების მიღმა არც ისაა დასატოვებელი, რომ ამ ე.წ. რეფორმატორ ბიჭებთან, რუსულის გარდა, რა თქმა უნდა, დასავლეთის სპეცსამსახურებიც მუშაობდნენ, მათ შორის, ამერიკული ფონდებიც...

_ დასავლურმა სპეცსამსახურებმა არ იცოდნენ, რომ რეფორმატორები “კა-გე-ბე”-ს გავლენის ქვეშ იმყოფებოდნენ?

_ არ ვიცი, ეს შეიძლება, სპეცსამსახურების შეთანხმებაც იყო...

_ იმის თქმა გინდათ, რომ სააკაშვილი და სხვა რეფორმატორები ე.წ. ორმაგი აგენტები იყვნენ?

_ აგენტი, ალბათ, უფრო რუსული სპეცსამსახურის იყო და, ამასთან, იმ დავალებებსაც ასრულებდა, რომლებიც ამერიკულ სამსახურებსაც აწყობდათ. სხვათა შორის, რატომ უნდა გამოვრიცხოთ, რომ ჯორჯ სოროსი, რომელიც არ მალავს, რომ რამდენიმე სპეცსამსახურთან მუშაობს, “კა-გე-ბე”-სთანაც თანამშრომლობდა? შესაბამისად, დასაშვებია, რომ სოროსი რეფორმატორებს ამერიკული ფონდების სახელით სწორედ რუსული სპეცსამსახურის დავალებით ეხმარებოდა. ამ ვერსიას არსებობის უფლება აქვს...

_ ბატონო მირიან, თუკი თქვენს ვერსიას ვირწმუნებთ, რომ “ვარდების რევოლუცია” რუსული სპეცსამსახურის მოწყობილია, მაშინ ლოგიკურია, თუ რატომ ეხმარებოდნენ “შავები” “ვარდოსნებს” საარქივო მასალებით, ე.წ. “კანონიერი ქურდების” ინსტიტუტი თავის დროზე სწორედ “კა-გე-ბე”-მ შექმნა...

_ “კანონიერი ქურდებით” საბჭოთა სპეცსამსახური სიტუაციას მხოლოდ ციხის შიგნით კი არა, გარეთაც მართავდა... დანამდვილებით ვამბობ, რომ მიხეილ სააკაშვილს ტარიელ ონიანთან ჰქონდა ურთიერთობა და ამას, მგონი, არც ერთი უარყოფს...

_ ტარიელ ონიანი სააკაშვილზე როგორ “გავიდა”?

_ ვეჭვობ, პირიქით იყო და ონიანზე სააკაშვილი “გავიდა”...

_ თუკი საერთო ინტერესები ჰქონდათ, ხელისუფლებაში მოსვლის შემდეგ, სააკაშვილმა “კანონიერ ქურდებს” ბრძოლა კვალის დაფარვის მიზნით დაუწყო?

_ დიახ, თანაც სააკაშვილი “გადამგდებია” _ ერთი კვირის წინ განაცხადა, დათა ახალაიას არ ვიცნობო და ამის შემდეგ, მისი რა უნდა დაიჯერო?

_ სააკაშვილმა “კანონიერი ქურდები” რაში “გადააგდო”?

_ სხვათა შორის, სააკაშვილმა თვითონ თქვა, გადაზიდვების კონტროლი უნდოდა და ტარიელ ონიანმა მომთხოვა, რომ მისი წარმომადგენელი რკინიგზის უფროსად დამენიშნაო. შეთანხმება, ალბათ, ეკონომიკის სხვა სფეროებზეც ჰქონდათ და ამ მოლაპარაკებებში აუცილებლად იქნებოდა ჩართული სააკაშვილის ბიძა თემურ ალასანია.

_ თემურ ალასანიას ტარიელ ონიანთან რა კავშირი ჰქონდა?

_ ყველა “კაგებეშნიკსა” და “კანონიერ ქურდს” სამსახურეობრივი კავშირი აქვს.

_ “ვარდების რევოლუციაში” მხოლოდ ტარიელ ონიანი მონაწილეობდა თუ სხვა “კანონიერი ქურდებიც”?

_ ალბათ, სხვებიც, მაგრამ არ მგონია, რომ ეს ონიანისგან დამოუკიდებლად მომხდარიყო, თუმცა მერე გამოჩნდა, რომ გივი თარგამაძეს კავშირი სხვა “კანონიერ ქურდებთანაც” ჰქონდა...

_ “კანონიერი ქურდები” გასაგებია, მაგრამ სააკაშვილმა “კა-გე-ბე”-ს “გადაგდება” როგორღა მოახერხა?

_ ვინ გითხრათ, რომ “კა-გე-ბე” გადააგდო? ყველამ, ვისაც ძალიან სჯერა, რომ სააკაშვილი საქართველოში დასავლეთის მიერ მოვლენილი ლიდერია, ერთი ფაქტი გაიხსენოს: 2003 წლის ზაფხულამდე საქართველოში აქტივებს ერთი რუსული კომპანიაც კი არ ფლობდა. “იტერას” წარმომადგენლობაც მხოლოდ იმიტომ არსებობდა, რომ საქართველოში რუსეთიდან შემოსული გაზის ტარიფს არეგულირებდა, ანუ “იტერა” საქართველოში ქონებას არ ფლობდა. 2003 წლის აგვისტოში “თელასი” ამერიკელმა მფლობელმა რუსულ “რაოესს” მიჰყიდა და ეს ფაქტი ვაირეფორმატორებმა კარგად გამოიყენეს, აი, შევარდნაძე ეკონომიკას რუსებს აძლევსო, მაგრამ შევარდნაძე ამაში არ ჩარეულა... “ვარდების რევოლუციის” შემდეგ კი, აბსოლუტურად ყველა სექტორში რუსული ფული და ინტერესი ჩაიდო: ენერგეტიკას რომ თავი დავანებოთ, საბანკო სექტორშიც რუსული ფულია _ “ვი თი ბი”-ს გარდა, ეჭვი მაქვს, რომ რუსული ფული “თი ბი სი”-სა და “საქართველოს ბანკშიცაა”.

აბა, დააკვირდით: საქართველოს რუსეთთან დიპლომატიური და ეკონომიკური კავშირები გაწყვეტილი აქვს. წესით, ექსპორტ-იმპორტი არ უნდა ხდებოდეს, მაგრამ ნებისმიერ სასურსათო მაღაზიაში შედით და ნახავთ, დაახლოებით, 70 პროცენტი რუსეთში დამზადებული და რუსული დასახელების საქონელია. ე.წ. რევოლუციამდე საქართველოში რუსული საქონელი ერგნეთის ბაზრობის გავლით შემოდიოდა, მაგრამ ეს მთლიანი იმპორტის ძალიან მცირე პროცენტი იყო. დღეს კი, ვიმეორებ, საქართველოში იმპორტის 70 პროცენტზე მეტი რუსეთზე მოდის. გადამამუშავებელ და მომპოვებელ მრეწველობაშიც რუსული ინტერესია და ეს ჩუბაისის ცნობილი მცოცავი ეკონომიკური ექსპანსიის თეორიის განხორციელებაა. ჩუბაისმა ეს გეგმა პუტინს ხელისუფლებაში მოსვლის პირველსავე წელს დაუდო. ამ გეგმის მიხედვით, არც ომია საჭირო და არც _ სისხლი, ქვეყნების ექსპანსია მათ ეკონომიკაში ნელ-ნელა შეჭრით უნდა მოხდეს...

_ მოკლედ, ბატონო მირიან, დავუშვათ, დავიჯერეთ, რომ სააკაშვილი კრემლის “გავლენის აგენტია”, მაშინ, უბრალოდ, გაუგებარია, რუსეთთან ომის რიტორიკა რისთვის სჭირდებოდა და სჭირდება?

_ ეს ფარსი იყო...

_ უკაცრავად, გაწყვეტინებთ, მაგრამ ამ ფარსისთვის სისხლი, ანუ 2008 წლის აგვისტოს ომი აუცილებელი იყო?

_ ომით ის უნდა გადაეფარათ, რასაც ხალხს უკეთებდნენ...

_ ანუ, ხალხის დაშინება და ტერორიც რუსული გეგმის ნაწილი იყო?

_ ეს რუსული კი არა, ალბათ, მათ ავადმყოფურ ტვინებში მოხარშული გეგმა იყო, თუმცა შეიძლება, რუსი მრჩევლები ჰყავდათ...

2003 წლის აგვისტოს ბოლოს, ან სექტემბრის დასაწყისში გადაწყდა, რომ ხელისუფლებაში მიშა უნდა მოსულიყო და ის რუსებს შეპირდა, რომ ჩვენს ძირძველ ტერიტორიებს _ სამაჩაბლოსა და აფხაზეთს დაუკანონებდა. ეს დაკანონება კი, ომის გარეშე შეუძლებელი იყო.
_ თუ ასეთი გეგმა არსებობდა, აბა, 2008 წლამდე რატომ იცდიდნენ?

_ იმიტომ, რომ აშშ აცდევინებდა... სხვათა შორის, ომის დაწყების მცდელობა ირაკლი ოქრუაშვილს 2004 წელსაც ჰქონდა, მაგრამ როგორც ამბობენ, ეს მცდელობა მაშინ ზურაბ ჟვანიამ აღკვეთა...

_ რუსები სააკაშვილს აღარ ენდობიან?

_ სულაც არ მგონია, რომ სააკაშვილი რუსებთან აღარ თანამშრომლობს...

_ რატომ წააგო “ნაცმოძრაობამ” 2012 წლის პირველი ოქტომბრის არჩევნები, ანუ რუსებმა ამერიკელებს საქართველოს ხელისუფლება რის სანაცვლოდ დაუთმეს?

_ ჯერ კიდევ გარდამავალი პროცესია... აშშ-ს საქართველო მხოლოდ ერთადერთი მიზნით სჭირდება და ეს ნახშირბად მატარებლების ტრანზიტია. სხვათა შორის, როგორც კი ხელისუფლებაში მოვიდა, ანუ 2004 წელს სააკაშვილმა ამერიკელებს ამ ნავთობსადენით სარგებლობის უფლება შეუჩერა...

_ ბატონო მირიან, რა ამის პასუხია და, ზურაბ ჟვანიას მოცილებაც რუსული სპეცსამსახურის დავალებით მოხდა, ან ჟვანიას მოკვლას რა მოტივი ჰქონდა?

_ ეს არ ვიცი, მაგრამ მგონია, რომ ეს მკვლელობა დიდ ეკონომიკურ პროექტს უკავშირდება, რომელსაც საქართველოს ხელისუფლებაში მაშინ განიხილავდნენ.

_ მაინც, რა პროექტზეა საუბარი?

_ გაზსადენის რუსეთისთვის მიყიდვაზე, ანუ ეს ის გაზსადენია, რომლითაც რუსეთიდან გაზი საქართველოში შემოდის და, საქართველოს გავლით, სომხეთს მიეწოდება. ეს რუსული ინტერესი იყო, რასაც, როგორც ვიცი, ჟვანია ეწინააღმდეგებოდა. ჟვანიას სიკვდილის შემდეგ, ამ საქმეში ამერიკელები ჩაერივნენ _ თუ გახსოვთ, ამერიკელებმა გამონაკლისის სახით დაუშვეს და “მილენიუმის” პროგრამიდან საქართველოს ხელისუფლებას 40 თუ 50 მილიონი ამ გაზსადენის რეაბილიტაციისთვის მისცეს. როგორც აღვნიშნე, ამ მილით გაზი სომხეთში შედის, ამასთან, სომხეთი გაზს ირანიდანაც იღებს. სომხეთის ტერიტორიაზე რუსული და ირანული გაზსადენების ბოლო წერტილი ერთმანეთისგან 30-35 კილომეტრითაა დაშორებული. საკმარისია, ეს ორი წერტილი ერთმანეთს გადაებას, რომ ირანულ გაზს ევროპაში გატანის გზა გაეხსნება, ანუ თუკი დღეს გაზის ნაკადი ჩრდილოეთიდან სამხრეთისკენ მოდის, მერე, ირანული გაზი, რუსეთის ხელშეწყობით, ევროპულ ბაზარზე გავა, რაც ირანს ძალიან უნდა. მილსადენის რუსეთისთვის მიყიდვაც სწორედ ამას ემსახურებოდა...

_ ესე იგი, ჟვანია იმიტომ მოკლეს, რომ გაზსადენის რუსებისთვის მიყიდვის წინააღმდეგი იყო?

_ ფაქტია, რომ მოკლეს... სხვათა შორის, ჟვანიას მკვლელობამდე 7-8 თვით ადრე სერბეთშიც მოვლენები ასე განვითარდა: იქაც ხელისუფლების სათავეში რევოლუციური ტრიუმვირატი იყო, რომლიდანაც მთავარი პრემიერ-მინისტრი გახდა. მოგვიანებით კი, ბელგრადის ცენტრში სნაიპერმა მოკლა...

_ საერთოდ, “ვარდების რევოლუციაში” სერბული ელემენტები ჭარბობდა და ამას “კმარას” შექმნაც მოწმობს...

_ სერბეთის მოვლენები ქართული ე.წ. რევოლუციის რაღაცნაირი რეპეტიცია იყო...

_ რა ამის პასუხია და, ახლა გამახსენდა, რომ სააკაშვილმა ირანთან უვიზო რეჟიმი შემოიღო. აშშ ირანს მტრულ სახელმწიფოდ აღიარებს და ამ ფონზე სააკაშვილის გადაწყვეტილება თეთრი სახლისთვის ღია მესიჯი იყო, რომ რუსულ თამაშს თამაშობდა?

_ დიახ, ეს მესიჯი იყო...

_ და ყველაფერ ამის მიუხედავად, მაკკეინი სააკაშვილს რატომ იცავს?

_ მაკკეინი ფულით მოსყიდული ლობისტური ფირმის წარმომადგენელია.

_ ბატონო მირიან, წეღან უნდა მეკითხა და დამავიწყდა: ედუარდ შევარდნაძემ არ იცოდა, ე.წ. რეფორმატორების უკან ვინ იდგნენ?

_ ხანდახან მგონია, რომ იცოდა, მაგრამ კულუარებიდან გამოჟონილი ხმა ამის თქმის საშუალებას არ მაძლევს.

_ რას გულისხმობთ?

_ მაგალითად, ვიცი, რომ 2003 წლის 22 ნოემბერს, პარლამენტიდან წასვლის შემდეგ, ბეიკერმა სამჯერ დაურეკა, მაგრამ შევარდნაძე ტელეფონთან არ მივიდა.

_ რატომ?

_ ალბათ, გაბრაზებული იყო და თვლიდა, რომ ყველაფერი ამერიკელებმა გააკეთეს, მაგრამ მგონია, ბეიკერს შევარდნაძისთვის უნდა ეთქვა, რომ პოზიციები არ დაეთმო...