ექსპერტი კავკასიის საკითხებში მამუკა არეშიძე გაზეთ "იზვესტიაში" გამოქვეყნებულ სტატიასთან დაკავშირებით, სადაც ბოსტონის აფეთქებაში ბრალდებული ერთ ერთი ძმის, ტაიმურაზ ცარნაევის საქართველოში შესაძლო მომზადებაზეა საუბარი, სააგენტო "ჯი-ეიჩ-ენისათვის" მიცემულ ინტერვიუში აცხადებს, რომ სტატიაში დაშვებული რამდენიმე შეცდომა, მისი აზრით მეტყველებს იმაზე, რომ ეს არის შეთხზული ორ ფაქტორის დისკრედიკაციისათვის. ეს ორი ფაქტორი კი, არეშიძის აზრით - საქართველო და "კავკასიური ფონდია".

- რა იცით "კავკასიური ფონდის" შესახებ?

- "კავკასიური ფონდი" შეიქმნა 2008 წელს. მისი ხელმძღვანელია უაღრესად ცნობილი და სახელოვანი ქართველი მეცნიერი ბატონი გივი ღამბაშიძე. ის არის კავკასიის საუკეთესო მცოდნე, არქეოლოგია პროფესიით და დიდხანს მუშაობდა კავკასიის მთიანეთში ქრისტიანული ძეგლების დაცვაზე. ამ ფონდის მთავარი ამოცანა იყო, როგორც ჰუმანიტარული, ისე კულტურული ღონისძიებების ჩატარება, ფონდი გამოსცემდა წიგნებს, აწყობდა ღონისძიებებს, კონფერენციებს, ჩამოჰყავდა მეცნიერები, პოეტები, ლიტერატორები და ა.შ.

მოკლედ, ეს იყო მართლა ძალიან მნიშვნელოვანი ფორმატის კონტაქტები ჩვენს ჩრდილოკავკასიელ მეზობლებთან. გარდა ამისა, ეს ფონდი მონაწილეობას იღებდა "ჯეიმსთაუნის" ფონდის მიერ ორგანიზებულ საქმიანობაში, ჩერქეზულ თემასთან დაკავშირებით.

მე რამდენიმე ღონისძიებას დასწრებული ვარ, როგორც კონფერენციული სახით, ისე კულტურულ ღონისძიებას და მივიჩნევ, რომ ძალიან მნიშვნელოვანი საქმე კეთდებოდა.

არ გამოვრიცხავ, რომ ამ ფონდის სახელით ისარგებლა ვიღაცამ ხელისუფლებიდან, ვგულისხმობ სპეცსამსახურებს, იმიტომ რომ ეს იყო ხელისუფლების ინიციტივით შექმნილი ფონდი, ამიტომ მერე მოინდომეს გამოყენება. დარწმუნებული ვარ, რომ ფონდის ხელმძღვანელობა საქმის კურსში არ იყო რა ხდებოდა და არ გამოვრიცხავ, რომ ფონდის სახელით, მისი ბლანკის მეშვეობით მოხდა ( და თუ მოხდა კიდევ ესეც კითხვის ნიშნის ქვეშ არის ჯერ) ისეთი ადამიანების აქ მოწვევა, რომლებმაც 2012 წლის ზაფხულში შემდეგში ლაფანყურში დაამთავრეს თავისი სიცოცხლე.

- წინა ხელისუფლებაზე ვსაუბრობთ ხომ?

- რასაკვირველია, მაგრამ ერთი რამე უნდა ვთქვა, ამ საგაზეთო სტატიაში რამდენიმე ადგილი ჩემთვის გაუგებარია. მე არ ვიცი ასეთი პიროვნება გვარად ჭანტურია მუშაობს თუ არა კონტრდაზვერვაში, მაგრამ ეჭვი მეპარება. ხელმძღვანელ თანამდებობაზე ასეთი გვარისათვის ყური არ მომიკრავს.

- გიორგი ჭანტურია "იზვესტიის" სტატიაში კონტრდაზვერვის მთავარი სამმართველოს პოლკოვნიკად არის მოხსენიებული

- დიახ, და იქ არ არის ნათქვამი რომელ თანამდებობაზეა ეს ჭანტურია. საერთოდ, ქართული სპეცსამსახურების იერარქიის მიხედვით, ასე მინისტრთან კონტაქტის უფლება ყველას არ აქვს, ამიტომ მგონია, რომ ეს ეპიზოდი სიმართლეს არ უნდა შეესაბამებოდეს.

მეორე, რასაც ვთვლი, რომ მთლად ვერ იქნება სიმართლესთან ახლოს, ეს არის ის, რომ შარშან ამ ფონდს კონფერენციული სახის არცერთი ღონისძიება არ ჩაუტარებია. ამის დრო და თანხები, როგორც ჩანს, არ იყო. ასე რომ, ცარნაევი კონფერენციაზე ჩამოსული ვერ იქნებოდა და თუ იქნებოდა ჩამოსული აქ ცარნაევი, უფროს ძმას ტამერლანდს ვგულისხმობ, იმ შემთხვევაში მხოლოდ, თუ ვიღაცამ ისარგებლა ამ ფონდი სახელით და ჩამოიყვანა ჩეჩნების შეკრებაზე.

-ვის სჭირდებოდა ეს?

- ამ დოკუმენტით ხდება დისკრედიტაცია წინა ხელისუფლების - ერთი შეხედვით ეს ასეა, მაგრამ მეორეს მხრივ საქართველოს დისკრედიტაციაც ხდება. ის რომ აქ ჩეჩნები ჩამოდიოდნენ და ლაფანყურის ოპერაცისთან დაკავშირებული რაც არის, ყველა ეს თემა ჩვენ ვიცით და მსოფლიო საზოგადოებამაც იცის, მაგრამ როგორც ჩანს, ვიღაცას პლიუს ამას დასჭირდა ისეთი ავტორიტეტული ფონდის დისკრედიტაცია, როგორიც არის "კავკასიური ფონდი", თან, მისი დისკრედიტაცია დასჭირდა კავკასიელების თვალში.

არ გამოვრიცხავ, რომ ეს ასე მოხდეს იმისთვის, რომ თუ დღევანდელი ხელისუფლება მოინდომებს ამ ფონდის მეშვეობით კონტაქტების გაგრძელებას ჩრდილოეკავკასიელებთან, ეს ფონდი უკვე დისკრედიტირებული იყოს.

- საინტერესოა, რომ სტატიაში მინისტრად ირაკლი ღარიბაშვილია მოხსენიებული და ნათქვამია, რომ მისთვის აკეთებდა ეს ადამიანი ამ მოხსენებას...

- ამ სტატიიდან ჩანს, რომ კონტრდაზვერვის დღევანდელმა თანამშრომლებმა დაიწყეს გამოძიება წინა ხელისუფლების შეცდომებისა და ვითომ ეს მოპოვებული მასალები მიაწოდეს მინისტრს. იკვეთება, რომ აი დღევანდელი ხელისუფლება კარგია, ხომ ხედავთ მუშაობს ეს ხალხი და წინა ხელისუფლების დანაშაულზე აკეთებს მოკვლევებს. მაგრამ ამას ხომ ყურადღებას არავინ მიაქცევს, არამედ ყურადღებას მიაქცევენ იმას, რომ ყოველივე ამაში გარეულია ჩვენი ქვეყანა და ძალიან ავტორიტეტული ორგანიზაცია მთელს კავკასიაში - "კავკასიური ფონდი".

-ძმებ ცარნაევებზე თუ არის რამე ცნობილი თქვენთვის?

- ცარნაევებთან დაკავშირებით დამატებით ვერაფერს გეტყვით გარდა იმისა, რაც მაქვს ამერიკული წყარობიდან ინფორმაცია და რაც მათივე ნათესავების მონაყოლია. თორემ მე მათი აქ ყოფნა არ შემიმჩნევია.

უბრალოდ, მე ერთი რამ შემიძლია გითხრათ, რომ ყური მოვკარი სრულიად შემთხვევით ვითომ ქართული პასპორტი უნდა ჰქონოდა უფროს ძმას. თუმცა მე ვიცი ცალსახად, რომ უფროსი ძმა აშშ-ს მოქალაქე იყო, უმცროსი - არა. ჰოდა აი უფროს ძმას, თითქოს, მეორე პასპორტიც ჰქონდა, საქართველოს მოქალაქეობის. მაგრამ ეს არის ასე ვთქვათ ირიბი ინფორმაცია, საზოგადოებისგან მოსული და მას ვერც დავამტკიცებ და ვერც ვუარყოფ.

- იზვესტია წერს, რომ კონტრდაზვერვის ანგარიშები ჩაგვივარდა ხელშიო. როგორ ფიქრობთ, ვის შეეძლო და ზოგადად, შესაძლებელი თუ არა მედიას ხელი მიუწვდეს კონტრდაზვერვის საიდუმლო ანგარიშებზე?

- საქმე იმაშია, რომ მე ყოველთვის ვამბობდი და დღესაც ვამბობ, რომ ძალოვან სტრუქტურებში მეხუთე კოლონა არსებობს და ასეთია ფაქტი სამწუხაროდ. ერთი შეხედვით, შეეძლოთ მიეწოდებინათ, მაგრამ რამდენიმე შეცდომა იქ დაშვებული მე მაფიქრებინებს, რომ ეს არის შეთხზული და შეთხზული ზუსტად იმიტომ, რომ მომხდარიყო დისკრედიტაცია იმ ორი ფაქტორისა რაც მე გითხარით - ერთი მხრივ საქართველოსი და მეორეს მხრივ ფონდის, განსაკუთრებით კი ფონდის.

- დისკრედიტაცია რუსეთის მიერ ...

- რუსულ პრესაში დაიბეჭდა .. აბა ვინ არის გარეული. ზოგადად, მიდის სპეცსამსახურებს შორის ბრძოლა ქვეყნის ინტერესებიდან გამომდინარე. ამ შემთხვევაში რუსეთი დაინტერესებულია, რომ საქართველოს ახალმა ხელისუფლებამ არანაირი ტიპის კონტაქტები არ შექმნას ჩრდილო კავკასიიაში.

აქედან გამომდინარე ის არ მოერიდება ასეთი ტიპის დეზინფორმაციას. მართალია, დეზინფორმაცია არც ქართულ სპეცსამსახურებს არ აკლდათ წლების განმავლობაში და ეს ასე იქნება. არა მხოლოდ საქართველო რუსეთის ურთოერთობაში არამედ ისტორიამ ასე იცის საერთოდ.

ამიტომ ნუ გაგვიკვირდება ასეთი ქმედება რუსეთის მხრიდან უბრალოდ, ჩვენ შესაბამისი ღონისძიებები უნდა მოვიფიქროთ და გავატაროთ იმიტომ, რომ ჩვენთვის ჩრდილოკავკასიის ქვეყნებთან და ზოგადად რეგიონთან კონტაქტი არის ძალიან მნიშვნელოვანი და ამ შემთხვევაში პოლიტიკანობის თამაში კი არ არის საჭირო, არამედ კლასიკური, კულტურული და ჰუმანიტარული ურთერთობების სივრცე ჩვენთვის, რომელიც აუცილებლად უნდა გავააქტიუროთ.