პარლამენტის ევროპასთან ინტეგრაციის კომიტეტის თავმჯდომარის, ლევან ბერძენიშვილის შეფასებით, გამორიცხულია, აშშ-ში საქართველოს ელჩი პრემიერ-მინისტრთან ერთან არ ყოფილიყო.
ბერძენიშვილი იმასაც ამბობს, რომ მისთვის პრეზიდენტის გულის ტკივილიც გასაგებია და თავად რომ საქართველოს პრეზიდენტი ყოფილიყო, ასეთ ელჩს არ წარადგენდა. ამასთან, ლევან ბერძენიშვილის განცხადებით, პრაქტიკული თვალსაზრისით ელჩის ინტერესებში არ შედიოდა, გული ეტკინა პრეზიდენტისთვის.
"უპირველეს ყოვლისა მინდა ვთქვა, რომ საქართველოს პარლამენტი ოდესღაც ელჩებს ნიშნავდა და პასუხისმგებელი იყო. სამწუხაროდ, ეს პრაქტიკა შეიცვლა. ჩვენ ახლა ელჩებს არ ვნიშნავთ და არ განვსაზღვრავთ მათ მოქმედებას. ელჩი ჩვენი დანიშნული რომ იყოს და მასზე ასეთი გავლენა გვქონდეს, ჩვენ მას მოვიწვევდით და კითხვებს დავუსვამდით. კითხვების დასმის გარეშე ის შემიძლია ვთქვა, რომ გულსატკენია, რომ ასეთი ამბავი მოხდა, ხოლო ის თუ ვინ არის მართალი და ვინ – მტყუანი, ამის გარკვევას მეტი დრო და ინფორმაცია სჭირდება"-აღნიშნა ბერძენიშვილმა.
დეპუტატის თქმით, პრემიერ-მინისტრი იყო გაერო-ში და საქართველოს გაერო-ში ჰყავს ელჩი, მაგრამ ეს აშშ-ში საქართველოს ელჩს არ ათავისუფლებს, რომ ქვეყნის მთავრობის ხელმძღვანელს, ფაქტობრივად ქვეყნის მმართველს თან არ ახლდეს იმ ქვეყანაში, სადაც ის ელჩია.
"ეს მართლა განსაკუთრებული შემთხვევა იქნებოდა. მაშინ გენახათ თქვენ კრიზისი და უბედურება, ელჩი რომ პრემიერ-მინისტრს სადმე არ ახლდეს. საქართველოს კონსტიტუციით, პრემიერ-მინისტრი არის საქართველოს დირექტორი და ის, რომ პრეზიდენტი არის პირველი პირი იმას არ ნიშნავს, რომ ქვეყანას პრეზიდენტი მართავს. ვინც კონსტიტუციას სერიოზულად წაიკითხვას, მიხვდება, რომ ქვეყნის მართვაში თუ 99% აქვს პრემიერს, 1% აქვს პარლამენტს და პრეზიდენტს პროცენტი არა აქვს. გამორიცხულია, აშშ-ში საქართველოს ელჩი პრემიერ-მინისტრთან ერთან არ ყოფილიყო. იდეალური იქნებოდა, მოეხერხებინა და ყოფილიყო პრემიერ-მინისტრთანაც და პრეზიდენტთანაც. პრეზიდენტის გულის ტკივილიც სრულიად გასაგებია - მე რომ საქართველოს პრეზიდენტი ვყოფილიყავი, ასეთ ელჩს არ წარვადგენდი, რადგან პრეზიდენტი სწორედ არის ელჩის წარმდგენი. გასაგებია, რომ ესა თუ ის ელჩი, როცა ასე თუ ისე იქცევა, პრეზიდენტის თვალში რაღაც ქულებს იწერს და რაღაც ქულებს ვერ იწერს. ამიტომ პრაქტიკული თვალსაზრისით ჩვენი ელჩის ინტერესებში არ შედიოდა, გული ეტკინა პრეზიდენტისათვის. მეტის თქმა არ შემიძლია, რადგან ელჩს ჰყავს უშუალო უფროსი - დირექტორი და მან რა უბრძანა, ჩვენ არ ვიცით. ჩვენ ელჩს კითხვას ვერ ვუსვამთ. შესაძლოა, ელჩმა საგარეო საქმეთა სამინისტროდან მიიღო ინსტრუქცია, თუ როგორ უნდა ემოქმედა და შესაძლოა, ის არ იყო თავისუფალი თავის მოქმედებაში. ცუდია, რომ საქართველოს პრეზიდენტს საქართველოს ელჩი არ ახლდა. მე არ მჯერა, რომ საქართველოს ელჩმა მიიღო გადაწყვეტილება, არ შეხვედროდა საქართველოს პრეზიდენტს, რადგან წაიკითხა კონსტიტუცია და ასე გაიგო ეს. ამიტომ რეალურად არ ვიცით, რა მოხდა – ვინ, ვის, რა უთხრა და რა უბრძანა. შესაბამისად, ძალიან ძნელია ვინმეს გამართლება ან გამტყუნება", - განუცხადა "ინტერპრესნიუსს" ლევან ბერძენიშვილმა.
აქვე ბერძენიშვილმა აღნიშნა ისიც, რომ არ ახსოვს, საქართველოს პარლამენტის წევრის სტატუსით რომელიმე ქვეყანაში ჩასულიყო და იქ მას ელჩი არ შეხვედროდეს.
