ექსპერტი გია ხუხაშვილი საგარეო პოლიტიკურ საკითხებზე პრეზიდენტ მარგველაშვილის მიერ გუშინ გაკეთებულ შეფასებებს ეთანხმება და მიიჩნევს, რომ ქვეყნის პირველი პირი ფაქტების ზუსტს კონსტანტაციას ახდენს.
როგორც გია ხუხაშვილმა "ინტერპრესნიუსს" გიორგი მარგველაშვილის მიერ გადაცემა "არჩევანში" გამოთქმული მოსაზრებების კომენტირებისას განუცხადა, საქართველოს საგარეო ფრონტზე პრობლემები ნამდვილად აქვს და მასზე "ღიად უნდა ვილაპარაკოთ".
"ის, რომ ჩვენ პრობლემები გვაქვს საგარეო დიპლომატიურ ურთიერთობებში, ფაქტია. ეს მარტო გაერო-ს ტრიბუნიდან ობამას გამოსვლაში არ გამოიხატება. ეს ჩანს ბოლო პერიოდში მიღებულ არაერთ რეზოლუციაშიც და კიდევ რომელი ერთი ჩამოვთვალო. ასე რომ, საგარეო ფრონტზე მართლაც კონკრეტული პრობლემების წინაშე ვართ და პრეზიდნეტმა სწორედ ამას გაუსვა ხაზი, მეტი არაფერი. მოდით, გავაანალიზოთ აშშ-ში პრემიერის ვიზიტი, პირდაპირ გეტყვით, რომ ძალიან მწირი ვიზიტი იყო, რადგან მეტ-ნაკლებად მნიშვნელოვანი შეხვედრები ფაქტობრივად არ გამართულა. ერთადერთი, რაც ვნახეთ, სადღაც ღობესთან ღარიბაშვილის შეხვედრა ერთ-ერთ ევროპელ ლიდერთან, რომელზეც, რატომღაც ლამის, როგორც ოფიციალური შეხვედრის შესახებ გავრცელდა ინფორმაცია. არასერიოზულია ეს ყველაფერი და ძალიან ცუდად გამოიყურება", - განაცხადა გია ხუხაშვილმა.
მისივე შეფასებით, შეხვედრების მნიშვნელობის თვალსაზრისით, პრემიერ-მინისტრის ვიზიტს ბევრად აღემატებოდა პრეზიდენტის ვიზიტი.
"პრემიერ-მინისტრის ვიზიტის ფარგლებში პრაქტიკულად არც ერთი მნიშვნელოვანი შეხვედრა არ ყოფილა, თუ არ ჩავთვლით პროტოკოლურ გამოსვლას გაერო-ს ტრიბუნიდან. რაც შეეხება პრეზიდენტს, თუკი ავიღებთ მისი შეხვედრების ინტენსივობას და მნიშვნელობას, დავინახავთ, რომ ელჩის მიერ გიორგი მარგველაშვილისთვის ფაქტობრივი ობსტრუქციის მოწყობის მიუხედავად, მისი ვიზიტი ბევრად უფრო დატვირთული და მნიშვნელოვანი იყო. აი, ეს არის რეალობა და უმჯობესია, მშრალი ფაქტებით ვილაპარაკოთ და არა ჩვენი განწყობებით და სიმპათიებით", - განმარტა ექსპერტმა.
ამასთან, გია ხუხაშვილი გიორგი მარგველაშვილს აშშ-ში საქართველოს ელჩის, არჩილ გეგეშიძისადმი გამოთქმულ კრიტიკასთან მიმართებაშიც ეთანხმება და ქართველ დიპლომატს შეახსენებს, რომ "იმავე კონსტიტუციით, რომელსაც ის ეყრდნობა, საგარეო მიმართულებით ქვეყანას საზღვარგარეთ სახელმწიფოს მეთაური წარმოადგენს".
"გასაგებია, რომ ელჩი პრემიერის დელეგაციას ახლდა თან, მაგრამ ელემენტარული საკითხი იყო, დრო გამოეძებნა, რომ სახელმწიფოს მეთაურს რაღაცნაირად დახვედროდა მაინც, ყველაფერს რომ თავი დავანებოთ და აეხსნა, რის გამო და რატომ ვერ მიიღებდა მის ვიზიტში მონაწილეოაბს. როდესაც გამოდის ელჩი და კონსტიტუციაზე ახდენს აპელირებას, თან იმ კონტექსტში, რომელიც თვითონ აწყობს, ანუ როგორი მესიჯიც გაუგზავნეს, ეს, პირდაპირ გეტყვით, ძალიან მძიმე შთაბეჭდილებას ახდენს, იმიტომ რომ, იგივე კონსიტუციის მიხედვით, საგარეო მიმართულებით სახელმწიფოს მეთაური წარმოადგენს ქვეყანას და მით უმეტეს ასეთი ტიპის ღონისძიებებზე", - აღნიშნა ექსპერტმა.
გია ხუხაშვილის აზრით, პრობლემების დამალვა, რომელზეც პრეზიდენტმა ისაუბრა, გამოსავალი არ არის.
"პრეზიდენტს არც მოუხდენია ვითარების დრამატიზება. ეს უბრალოდ ფაქტების კონსტანტაცია იყო. დამალვა არ არის გამოსავალი. უმჯობესია, რომ პრობელმებზე ღიად ვილაპარაკოთ", - განაცხადა გია ხუხაშვილმა.
