ძნელი იყო აშშ-ს რადარებიდან საქართველოს გაქრობის თაობაზე არ დათანხმებოდი ამერიკული მხარის მოსაზრებას, როდესაც გაეროს ტრიბუნიდან რუსეთის პოლიტიკაზე საუბრისას ბარაკ ობამამ მოიყვანა მხოლოდ უკრაინის მაგალითი, - ამის შესახებ საქართველოს პრეზიდენტმა გიორგი მარგველაშვილმა გადაცემა "არჩევანში" განაცხადა, რითაც აშშ-ში ვიზიტის ფარგლებში მის მიერ გაჟღერებულ შესაბამის მოსაზრებაზე დასმულ შეკითხვას უპასუხა.
ქვეყნის პირველი პირის თქმით, მისთვის მძიმე იყო სურათის დანახვა, როდესაც არ ესმოდა საჭირო რიტორიკა. "ეს განცხადება ნიუ იორკში გაკეთდა. ეს იყო ამერიკული მხარის მოსაზრება, რომელსაც ძნელი იყო არ დათანხმდებოდი იმ ფონზე, როცა გაეროს ტრიბუნასთან იდგა შეერთებული შტატების პრეზიდენტი და ის საუბრობდა მეზობლების მიმართ რუსეთის პოლიტიკის შესახებ მხოლოდ უკრაინის მაგალითზე - ერთადერთი მაგალითი, რომელიც მოიყვანა პრეზიდენტმა ობამამ იყო უკრაინის მაგალითი. ეს იმ ფონზე, როდესაც საქართველო იყო პირველი ქვეყანა, რომელმაც თავის თავზე იწვნია რუსეთის აგრესია. საქართველო იყო და არის ის ქვეყანა, რომლის ტერიტორიებიც ოკუპირებულია. საქართველოს ხსენება აბსოლუტურად ბუნებრივი იყო, რადგან ეს აჩვენებდა იმ დინამიკას, რომელიც არსებობს – ჯერ საქართველო, მერე უკრაინა. წარმოგიდგენიათ რამდენად მძიმეა, როცა საუბრობენ შენთვის, როგორც ქართველისთვის ყველაზე მტკივნეულ საკითხზე და არ გესმის ის რიტორიკა, რომელიც უნდა გაიგო? არ გესმის ის სიტყვები, რომლებიც იყო მარტივად წარმოსათქმელი? - შეიძლება მე ამ ნაწილში ობამას კრიტიკოსი ვიყო? - ბუნებრივია არა. სამწუხაროდ, საქართველოს იმ ნაწილში, სადაც კითხვის ნიშანი არ არსებობს და სადაც ვართ თავიდან ბოლომდე დაჩაგრული და დაპყრობილი მხარე, აქვს ასეთი ვითარება. ბუნებრივია მე გული მტკივა, როდესაც საჭირო რიტორიკა არ მესმის. მეტიც, როცა ამის მტკიცება მოდის ამერიკული მხრიდან", - განაცხადა საქართველოს პრეზიდენტმა.
მისივე განმარტებით, აშშ-ს რადარებზე საქართველოს საკითხის გააქტიურებისთვის საჭიროა აქტიური და აგრესიული პოლიტიკა.
"ის 30 შეხვედრა, რომელიც მქონდა ვაშინგტონში კონგრესმენებთან, სენატორებთან, ასევე პოლიტიკურ ჯგუფებთან, რომლებიც აყალიბებენ პოლიტიკურ აზრს აშშ-ში, სწორედ ამ საკითხს შეეხებოდა. ამ მიმართულებით გაჩერება არ შეიძლება. მთელი მსოფლიოს ქვეყნების პოლიტიკური სპექტრი იქ ეძებს პოლიტიკურ დისკურსებს, იქ ეძებს პოლიტიკურ პასუხებს და საქართველოს ამ კონკურენციაში სჭირდება ძალიან აგრესიული პოლიტიკა, რათა ჩვენი საკითხის ეროზია და ქვევით ჩამოწევა არ მოხდეს", - განაცხადა გიორგი მარგველაშვილმა.
