საკრებულოს თავმჯდომარე გიორგი ალიბეგაშვილი ვარაუდობს, რომ ფრაქცია "თავისუფალი დემოკრატების" საკრებულოს წევრები ახალ ფრაქციას შექმნიან.
როგორც ტელეკომპანია "იმედს" საკრებულოს თავმჯდომარემ განუცხადა, ფრაქციის მუშაობის შეწყვეტა შიდაპარტიული პროცესია. "ისინი არიან ძალინ ღირსეული პიროვნებები, მათთან ერთად ჩვენ ძალიან დიდი ბრძოლის გზა გამოვიარეთ, ძალიან მნიშვნელოვანი გადაწყვეტილებები მიიღეს მათ საკრებულოში. იყო არაერთგზის ოპონირება. ეს ოპონირება იყო ყოველთვის კონსტრუქციული. იმედია, მათთან კვლავ ჯანსაღი ურთიერთობა გაგრძელდება", - აღნიშნა გიორგი ალიბეგაშვილმა.
ფრაქცია "თავისუფალმა დემოკრატებმა" თბილისის საკრებულოში საქმიანობა შეწყვიტა. "პარტია "თავისუფალი დემოკრატების" ოპოზიციაში გადასვლის შემდეგ თანდათან გამოიკვეთა აშკარა შეუსაბამობა პარტიის სტრატეგიასა და თბილისის საკრებულოში ფრაქცია "თავისუფალი დმეოკრატების" საქმიანობას შორის. ფრაქციის წევრებს პარტიაში არაერთხელ მკაფიოდ განემარტათ წარმოქმნილი განსხვავებების პრინციპული მნიშვნელობა. მათ უნდა გადაეწყვიტათ, შეძლებდნენ თუ არა პარტიასთან ერთად მკაფიო და თანმიმდევრული ოპოზიციური პოლიტიკის გატარებას ხელისუფლებაში მყოფი კოალიციის მიმართ. სამწუხაროდ, ისინი მზად არ აღმოჩდნენ ხელისუფლების რეალური ოპონირებისათვის. ამგვარად, მათი არჩევანის შესაბამისად, ისინი დღეიდან აღარ არიან პარტია "თავისუფალი დემოკრატების" წევრები და ფრაქცია "თავისუფალი დემოკრატები" თბილისის საკრებულოში წყვეტს საქმიანობას", - აღნიშნულია პარტია "თავისუფალი დემოკრატების" განცხადებაში.
