პარლამენტში, ჩემს მოხსენებაზე მთავრობის გამოუცხადებლობiთ პრეზიდენტის ინსტიტუტს არ უზარალია, იზარალა სახელმწიფომ, - ასე აფასებს საქართველოს პრეზიდენტი გიორგი მარგველაშვილი იმ ფაქტს, რომ საკანონმდებლო ორგანოში მისი წლიური ანგარიშით გამოსვლას მინისტრთა კაბინეტის წევრები არ დასწრებიან.
როგორც პრეზიდენტმა გადაცემა "არჩევანში" განაცხადა, გუშინ იყო შესაძლებლობა ხელისუფლებას ეჩვენებინა ერთიანობის მესიჯი და მთავრობის გადაწყვეტილება პიარული თვალსაზრისით მინისტრთა კაბინეტისთვის მომგებიანი არ იყო.
"ვფიქრობ, მთავრობის დღევანდელი არგამოცხადება ჩემთვის წამგებიანი არ იყო. ეს წამგებიანი იყო სახელმწიფო ინსტიტუტებისთვის. ამან პოზიტივი არ შესძინა ხელისუფლებას, რადგან ვფიქრობ, რომ პიარულად ეს პრობლემაა. დღეს სახელმწიფო შეგვეძლო გაგვეძლიერებინა. დღეს იყო ძალიან საინტერესო შესაძლებლობა, ყველასთვის გვეჩვენებინა ქვეყანაში ხელისუფლების ერთიანობა - ეს არის მესიჯი ქვეყნის შიგნითაც, ქვეყნის გარეთაც, ეს არის მესიჯი ბიზნესისთვის. როდესაც ინსტიტუტი ძლიერია, იქნება ეს პრეზიდენის, მინისტრის თუ პარლამენტის, საქმეც უფრო იოლად ხორციელდება. შესაბამისად, პრზიდენტის ინსტიტუტს დღეს არ უზარალია, დღეს იზარალა სახელმწიფომ და ვფიქრობ, რომ დღეს პიარულად არ არის მთლად მომგებიანი დღე მთავრობისთვის, რასაც გულწრფელად ვდარდობ", - აღნიშნა პრეზიდენტმა.
რაც შეეხება შეკითხვას, აქვს თუ არა ადგილი პრეზიდენტის ინსტიტუტის დაკნინებას, გიორგი მარგველაშვილის თქმით, "სამწუხაროდ, ასეთია გამოკვლევის შედეგი".
"მე ამაზე ვდარდობ. დღეს სწორედ იმას გავუსვი ხაზი, რომ თუ ჩვენ არ შევინარჩუნებთ სახელმწიფო ინსტიტუტებს და არ გავაძლიერებთ მას, მოგებული ნამდვილად არ დარჩება არავინ. სახელმწიფო ინსტიტუტების ჩამოშლას მივყავართ ხელისუფლების ეროზიისკენ. ჩვენ ძალიან ფრთხილად უნდა ვიყოთ ამ საკითხებთან დაკავშირებით", - აღნიშნა პრეზიდენტმა.
