ეგვიპტეში, სინის ნახევარკუნძულზე ისლამისტი მებრძოლების მიერ განხორციელებულ თავდასხმებს 26 ადამიანი შეეწირა, ათობით კი დაშავდა. მათ შორის უმრავლესობა სამხედროები არიან. შემთხვევა ჩრდილოეთ სინის პროვინციის ადმინისტრაციულ ცენტრ ელ-არიშში მოხდა.
ისლამისტებმა ასევე იერიში მიიტანეს ქალაქებში – რაფაჰსა და შეიკ ზუვაიდშიც. ისინი რამდენიმე სამხედრო ობიექტს დაესხნენ თავს. პასუხისმგებლობა სამხედრო დაჯგუფება "ანსარ ბეიტ ალ-მაქდის"-მა აიღო, რომელიც ე.წ ისლამურ სახელმწიფოსთან დაკავშირებული მოძრაობაა.
მომხდარი უკვე დაგმო აშშ-მა. როგორც ვაშინგტონში განაცხადეს, შტატები ეგვიპტის მთავრობას კვლავ მხარდაჭერას უცხადებს ტერორიზმის წინააღმდეგ ბრძოლაში.
ეგვიპტეში ისლამისტი მებრძოლების თავდასხმები განსაკუთრებით მას შემდეგ გახშირდა, რაც 2013 წელს პრეზიდენტი მუჰამედ მურსი გადააყენეს.
