საფრანგეთის საგარეო საქმეთა მინისტრი ლორან ფაბიუსი ოფიციალური ვიზიტით მოსკოვს ეწვია, რათა დაარწმუნოს რუსეთი, მხარი დაუჭიროს სირიის საკითხზე მიღებულ გაერო-ს უშიშროების საბჭოს რეზოლუციას. ამის შესახებ "ბიბისი" იუწყება.
საფრანგეთის საგარეო საქმეთა მინისტრი მოსკოვში თავის რუს კოლეგას სერგეი ლავროვს შეხვდება.
ამასთან, საფრანგეთი, დიდ ბრიტანეთთან და აშშ-სთან ერთად, მოითხოვს გაერო-მ რეზოლუციაში მკაცრი შედეგები გაითვალისწინოს ქიმიური იარაღის გამოყენებასთან მიმართებაში. თუმცა, სირიის პრეზიდენტ ბაშარ ალ-ასადის მთავარი მოკავშირეები რუსეთი და ჩინეთი აცხადებენ, რომ პირველ რიგში, ასადს ქიმიური იარაღის ჩაბარების შანსი უნდა მიეცეს.
ორშაბათს გაერო-მ სირიაში ქიმიური იარაღის გამოყენების დამადასტურებელი ანგარიში წარმოადგინა. როგორც გაერო-ს ინსპექტორთა ანგარიშში იყო ნათქვამი, გასულ თვეს, დამასკოში, კერძოდ გუტას რაიონში თავდასხმისას ზარინის გაზი იქნა გამოყენებული. თუმცა, გაერო-ს ინპსექტორთა ანგარიშში არ არის ახსნილი, ვინ გამოიყენა ქიმიური იარაღი.