სოხუმში მოკლული რუსი დიპლომატის მეუღლე გარდაიცვალა. როგორც აფხაზური მედია წერს, თავდასხმის შედეგად დაჭრილი ოლგა ვიშერნევა სოხუმის რესპუბლიკურ საავადმყოფოში მკურნალობდა, თუმცა მისი გადარჩენა ექიმებმა ვერ შეძლეს.
სოხუმში რუსი დიპლომატი დიმიტრი ვიშერნევი 9 სექტემბერს მოკლეს. აფხაზეთში რუსეთის ე.წ. საელჩოს საკონსულო დეპარტამენტის პირველ მდივანს საცხოვრებელი სახლის ავტოფარეხთან ესროლეს. ავტომობილში იმყოფებოდა მისი მეუღლე, რომელიც ხერხემლის არეში დაიჭრა.
მკვლელობას აფხაზეთის დე-ფაქტო რესპუბლიკის პროკურატურა იძიებს. რა გახდა თავდასხმის მიზეზი, ჯერჯერობით უცნობია.
