არჩილ ტატუნაშვილის საქმესთან დაკავშირებულ რეზოლუციაზე პარლამენტში დაანონსებული კონსულტაციები არ შედგა - ფრაქცია „ქართული ოცნების“ თავმჯდომარის, მამუკა მდინარაძის განცხადებით, კონსულტაციების პროცესი კვირის ბოლომდე გაგრძელდება.
როგორც საპარლამენტო უმრავლესობის წევრმა, გედევან ფოფხაძემ აღნიშნა, ტატუნაშვილის საქმეზე პარლამენტის რეზოლუციის ტექსტთან დაკავშირებით დრო ჯერ კიდევ არის. დეპუტატმა თავი შეიკავა დაკონკრეტებისგან, თუ როგორია უშუალოდ პრემიერ-მინისტრის პოზიცია რეზოლუციის ტექსტში „ოთხოზორია-ტატუნაშვილის სიის“ ასახვასთან დაკავშირებით.
„პირველ რიგში, მნიშვნელოვანია, რომ ჭირისუფალს ცხედარი დაუბრუნდეს და დატირების შესაძლებლობა მიეცეს. როდესაც ოჯახი დაღუპულის ცხედარს ელოდება, პოლიტიკური რევერანსების დრო არ არის“, - განუცხადა ჟურნალისტებს გედევან ფოფხაძემ.
საგარეო საქმეთა მინისტრი დეპუტატებისგან განსხვავებით უფრო რადიკალურია - როგორც მიხეილ ჯანელიძემ აღნიშნა, ბოლო დღეების განმავლობაში ოპოზიციის ქმედებები სრულიად უპასუხისმგებლო იყო, რადგან რეზოლუციის ტექსტი არის ძალიან პრინციპული, კონკრეტული და ბევრს ასპექტს მოიცავს.
„რა თქმა უნდა, მნიშვნელოვანია, რომ პარლამენტი იყოს ერთიანი. მნიშვნელოვანია, რომ მათ შორის, ოპოზიციისა და საერთო მიდგომა იყოს ცალსახა, როდესაც საკითხი ეხება კონფლიქტის დარეგულირებას, ჩვენი ტერიტორიული მთლიანობის აღდგენას, სუვერენიტეტის განმტკიცებას, ისეთ მძიმე ფაქტებს, როგორიც არის ჩვენი მოქალაქეების მკვლელობა და ა.შ“, - აცხადებს მინისტრი.
თუმცა, მისივე აზრით უმჯობესია, დაველოდოთ, რა რესურსს გამოძებნის ოპოზიცია იმისათვის, რომ იყოს შესაბამისი იმ საჭიროებებთან, რომელიც დღეს უდგას ჩვენს ქვეყანას.
„ვფიქრობ, უმრავლესობა აწარმოებს მოლაპარაკებებს პრინციპების შესაბამისად და რეზოლუციაც, რაც ჩვენ ამ ეტაპზე გვაქვს ნანახი, არის ძალიან პრინციპული, ძალიან კონკრეტული და მოიცავს ძალიან ბევრს ასპექტს, რომელიც მნიშვნელოვანია, როგორც ქვეყნის შიგნით პოზიციის დასაფიქსირებლად, ასევე საერთაშორისო საზოგადოებისთვის პარლამენტის და პოლიტიკური სპექტრის ხმის მისაწვდენად. რეზოლუციაში ბევრი ასპექტია, რომელზეც საჭიროა მსჯელობა, მათ შორის სამართლებრივი და პოლიტიკურიც და ვნახოთ რა იქნება, დებატების საბოლოო შედეგი“, - განაცხადა მიხეილ ჯანელიძემ.
მთავრობის სკეპტიციზმის მიუხედავად, პარლამენტის თავდაცვისა და უშიშროების კომიტეტის თავმჯდომარე, ირაკლი სესიაშვილი აღნიშნავს, რომ საპარლამენტო უმრავლესობისა და უმცირესობის ერთობლივი რეზოლუციის ტექსტის 95% ფაქტობრივად, შეთანხმებულია.
„უდიდეს ნაწილზე, ფაქტობრივად, შეთანხმებული ვართ და სულისკვეთება არის ის, რაც ჩვენი ქვეყნის ინტერესების დაცვას სჭირდება. რაც შეეხება, ერთ დეტალს, აქაც შეგვიძლია ჩვენ ვიმსჯელოთ. თქვენ ხედავთ, რომ „ქართული ოცნება“, უმრავლესობა ჩაკეტილი არ არის. მე ვემხრობი თუ არა, ამისთვის მაქვს შესაბამისი არგუმენტები და არა იმიტომ, რომ ოპოზიციის მხრიდან არის შემოთავაზებული. მაქვს არგუმენტები, რომელზეც შეიძლება ვიმსჯელოთ უკვე სესიის ფარგლებში, დღეს არ მინდა, ამაზე დისკუსია გავხსნათ. კამერების გარეშე ჩემს არგუმენტს გეტყვით“, - კულუარებისთვის გადაინახა სესიაშვილმა პოზიცია.
შეგახსენებთ, რომ 5 მარტს „ევროპულმა საქართველომ“ უმრავლესობას ტატუნაშვილთან დაკავშირებით რეზოლუციის საერთო დოკუმენტის შექმნა შესთავაზა. ბიუროს სხდომაზე რეზოლუცია უმრავლესობამაც დაარეგისტრირა.
მთავარი კითხვაა, მოხვდება თუ არა რეზოლუციაში ოპოზიციის მიერ შეთავაზებული სანქციები და რა გახდა რეზოლუციის მიღების გადადების მთავარი მიზეზი, თუმცა როგორც უმრავლესობამ განგვიცხადა იმის გარდა, რა საჯარო განცხადებებიც გაკეთდა, უფრო დეტალურად ამ ეტაპზე არ ისაუბრებს.
როგორ მამუკა მდინარაძე ამბობს, ჟურნალისტებთან საუბრისას, „ოთხოზორია-ტატუნაშვილის სია“ რეზოლუციის მნიშვნელოვანი ნაწილია.
„როდესაც კონსულტაციები დასრულდება, გეცოდინებათ თითოეული დეტალის შესახებ რაზეც მიმდინარეობდა მსჯელობა. კორექტული არ იქნება დეტალებზე ახლა ვისაუბროთ. თქვენ იცით, რომ როგორც საპარლამენტო უმცირესობას, ასევე უმრავლესობას ჰქონდა რეზოლუციის თავისი ვარიანტი. ახლა ამ ვარიანტების შეჯერებაზე მიმდინარეობს კონსულტაციები, მათ შორის სიაზეც. ჩვენ შევთავაზეთ გამართული ვერსია, მათ შორის სამართლებრივი თვალსაზრისითაც. ყველა დეტალი მნიშვნელოვანია, აღსრულების მექანიზმი და ტექნიკური მხარე. ვცდილობთ, თითოეული დეტალი სამართლებრივი ინტერესებიდან გამომდინარეობდეს, ყველაფერს ერქვას თავისი სახელი. ვფიქრობთ, კვირის ბოლომდე კონსულტაციების შედეგად შევჯერდებით და რეზოლუცია პარლამენტის მიერ შემდეგ სასესიო კვირას მიიღება“, - განაცხადა მდინარაძემ.
როგორც ექსპერტი, ზაალ ანჯაფარიძე აღნიშნავს, მისი აზრით, „განხეთქილების ვაშლი“ არის მაინც „ოთხოზორია-ტატუნაშვილის სიის“ შეტანა რეზოლუციის ტექსტში და ამის გამო მოხდა გადადება, რადგან მისი ინფორმაციით, სწორედ ამ საკითხის ირგვლივ ვერ თანხმდებოდა უმრავლესობა და ოპოზიცია.
„სიმართლე გითხრათ, ცოტა სკეპტიკურად ვუყურებ ამ სიის შედგენის საკითხს. ჯერ ერთი, მხოლოდ სიის შედგენა არ არის საკმარისი. უნდა ჩატარდეს გარკვეული სამუშაოები იმისათვის, რომ დაადგინონ, თუ ვინ უნდა შევიდეს ამ სიაში. გარდა ამისა, უნდა დაამტკიცონ, რომ ეს ადამიანები უშუალოდ იყვნენ დაკავშირებული ტატუნაშვილის გარდაცვალებასთან ან მის მიმართ რაიმე უკანონო ქმედების ჩადენასთან - ამას სჭირდება ძალისხმევა და გამოძიება“,- აცხადებს ზაალ ანჯაფარიძე.
როგორც ექსპერტი განმარტავს, რაც მთავარია და არსებითი - ეს სიები უნდა მიიღოს დასავლეთმა.
„მხოლოდ „ოთხოზორია-ტატუნაშვილის სიით“ ჟონგლირება არ არის საკმარისი და მან, ვისაც სურს ამ სიის გატანა, უნდა თქვას, ჰყავს თუ არა იდენტიფიცირებული ის ხალხი, თუნდაც მიახლოებით, ვინ უნდა იყოს ამ სიაში, რამდენი ადამიანია ისეთი, ვისაც შეიძლება, ჰქონდეს საბანკო ანგარიშები ამერიკაში, ან ევროპაში. არ მგონია, ცხინვალში ბევრი მოიძებნება, ვინც ხშირად დადის ამერიკასა და ევროპაში და ამ სიის შედგენით დისკომფორტი შეექმნას. შესაძლოა ასეთი სულ ერთი, ან ორი მაღალჩინოსანი იყოს“,- აცხადებს ზაალ ანჯაფარიძე.
მისივე შეფასებით, ამის გათვალისწინებით, რჩება შთაბეჭდილება, რომ ქართველ პოლიტიკოსებს უფრო წამხედურობა ამოძრავებთ და რაკი ამერიკელებმა შექმნეს „მაგნიტსკის სია“, „ოთხოზორია-ტატუნაშვილის სია“ უნდა დავდოთ. თუმცა ეს სულ სხვა შემთხვევა იყო და ნაკლები საერთო აქვს ჩვენს კონკრეტულ შემთხვევასთან.
„მგონია, რომ სწორედ ამ სიის გამო ვერ ხერხდება შეთანხმება, რაც ჩვენს პარლამენტს საუკეთესო კუთხით არ წარმოაჩენს, არა იმიტომ რომ „ოთხოზორია-ტატუნაშვილის სიის“ მიღება ვერ ხერხდება, არამედ იმიტომ, რომ რეზოლუცია დღემდე მიღებული არ არის და შესაძლოა ისეც მოხდეს, რომ ტატუნაშვილის ცხედარი გადმოგვცენ, პარლამენტს კი რეზოლუცია ისევ არ ჰქონდეს მიღებული“, - აღნიშნავს ზაალ ანჯაფარიძე.
როგორც ექსპერტი განმარტავს, ოპოზიცია მუდმივად და ყველგან ამ თემაზე ლაპარაკობს და აცხადებს, რომ ხელისუფლება რუსეთის განაწყენებას ერიდება, ბუნებრივია, მისი დისკრედიტირება ხდება და მოსახლეობის ნაწილს ალბათ, სჯერა კიდეც ამისი, რადგან უმრავლესობა არ აკონკრეტებს არაფერს.
„უმრავლესობამ არგუმენტირებულად უნდა დაასაბუთოს, რაზეა ლაპარაკი, არაფერს რომ არ ამბობს, ამიტომაც ტოვებს სივრცეს ამგვარი კითხვების, ეჭვების და განწყობებისათვის. უმრავლესობამ რომ თქვას, რატომ ჭიანურდება რეზოლუციის მიღება, ნაცვლად იმისა, დეტალებს ვერ გავამხელთო, განმარტოს, რეალურად რა ხდება, მაშინ კითხვებიც ნაკლები იქნება“, - განმარტავს ანჯაფარიძე.
როგორც ექსპერტი, რამაზ საყვარელიძე აღნიშნავს, დეტალები მისთვისაც უცნობია იმისა, თუ რა პუნქტებშია აზრთა დამთხვევა და სხვადასხვაობა.
„თუმცა ვფიქრობ, ამჟამად უმრავლესობის მეტ-ნაკლები პასიურობა გამოწვეულია იმით, რომ სურთ, გაარკვიონ რა მოჰყვება პრემიერის განცხადებას და შემდეგ უკვე, ამ ფონზე მიიღონ შესაბამისი გადაწყვეტილება“, -აღნიშნავს ექსპერტი.
როგორც საყვარელიძე განმარტავს, არის ამაში ლოგიკა, რადგან რეზოლუცია თუ იქნება ძალიან მკაცრი, ეს წინააღმდეგობაში მოვა იმ სულისკვეთებასთან, რაც იყო პრემიერის განცხადების ძირითადი გზავნილი.
„ერთ დღეს იძახო, მოდით დავჯდეთ და მოვილაპარაკოთ და მეორე დღეს სანქციები დააწესო, არ იქნება თანამიმდევრული. მგონია, უმრავლესობა ელოდება რაიმე საბაბს, რომ ასეთი განცხადების შემდეგ მკაცრ რეზოლუციაზე ლოგიკურად გადასვლის საშუალება ჰქონდეს“, - მიიჩნევს რამაზ საყვარელიძე.
თუმცა საპასუხო განცხადება უკვე გაკეთდა რუსთის მხრიდან და რამდენადაც ცნობილია, ჩვენმა ჩრდილოელმა მეზობელმა დააფიქსირა, რომ ის არაფერ შუაშია. შესაძლებელია თუ არა, ასეთ მოცემულობაში პოლიტიკური თანმიმდევრულობის გამოვლენის შანსი მიეცეს ქართულ მხარეს, ჯერჯერობით უცნობია, თუმცა, რამაზ საყვარელიძე თვლის, რომ მართალია, არავინ ელოდება რუსეთისგან პოზიტიურ პოზიციას, მაგრამ მისი ვარაუდით, ქართული მხარე შესაძლოა, გარკვეული დროის გასვლასაც ელოდება, სათქმელი რომ ჰქონდეს, რუსეთისგან პასუხი ვერ მივიღეო, რადგან, როგორც რამაზ საყვარელიძე აღნიშნავს, ტვიტერზე გაცემული პასუხი ოფიციალური პასუხი არ არის და არც იმ დონის, რაც პრემიერის წერილს შეეფერება.
„გამორიცხული რაკი არ არის, რომ რუსეთს რაღაც რეაქცია ჰქონდეს, ამიტომაც შეიძლება, ღირდეს დალოდება, რა ნაბიჯები გადაიდგმება რუსეთის მხრიდან, რომ შემდგომში ქართული რეზოლუციის სიმკაცრე იყოს არგუმენტირებულად გამართლებული“,- მიიჩნევს რამაზ საყვარელიძე.
