ვერსია, რომ თავად სახელმწიფო უსაფრთხოების სამსახურმა შემოიყვანა ახმედ ჩატაევი საქართველოში, თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, უბრალოდ, ღირსების შემლახავია. სანამ ხელისუფლება 22 ნოემბრის სპეცოპერაციის დეტალებზე დუმს, ოპოზიცია ვერსიებზე საუბრობს და ხელისუფლებას ქვეყანის ტერიტორიაზე ტერორისტების შემოყვანაში ადანაშაულებს.

„ევროპული საქართველოს“ წევრის ირმა ნადირაშვილის განცხადებით, ვიდრე ხელისუფლება დუმილის უფლებას იყენებს, აბსოლუტურად ყველა ვერსიას აქვს არსებობის უფლება, მათ შორის იმ ვერსიასაც, რომ საერთაშორისო ტერორისტი, ახმედ ჩატაევი ხელისუფლებამ თავად შემოიყვანა საქართველოში. დეპუტატმა პარლამენტის პლენარულ სხდომაზე აღნიშნა, რომ ამ ეჭვის საფუძველს იძლევა ის, რომ „ქართული ოცნების“ ხელისუფლებამ ერთხელ უკვე ითანამშრომლა ჩატაევთან.

„თუ ბრალდება სუსტად მოგეჩვენათ, იმის ნაცვლად, რომ გაგეძლიერებინათ ეს ბრალდება და გეძებათ გზები, ჩატაევი გირაოთი გაუშვით სასამართლოდან. შემდეგ გამოაცხადეთ, რომ ხელებიც დაგიბანიათ და ამ ხელების დაბანის შემდეგ, ამ ადამიანმა, თურქეთის მთავრობის მტკიცებით, 45 ადამიანი შეიწირა მაშინ, როდესაც სტამბოლის აეროპორტში ტერაქტი განხორციელდა. ამიტომ, ამ ვერსიას აქვს არსებობის უფლება, მით უმეტეს, თუ გავითვალისწინებთ თქვენს განვლილ გზას“, - მიმართა ირმა ინადირაშვილმა უმრავლესობას.

მისი თქმით, ხელისუფლებისთვის სასარგებლო არ არის არც დეპუტატ ეკა ბესელიას მიერ გაჟღერებული ვერსია, რომ შესაძლოა, ჩატაევი ოფიციალური საზღვრის გადაკვეთის გარეშე შემოვიდა საქართველოში.

„გაერო-ს ტერორისტების „შავ სიაში“ შეყვანილი ადამიანი თუ ისე კვეთს საზღვარს, რომ თქვენ ვერაფერს იგებთ, თუ გვეუბნებით, რომ მეთვალყურეობდით იმ ბინას და შემდეგ მთელი არსენალი შეიტანეს, საინჟინრო სამუშაოები ჩაატარეს და 3 ადამიანი, თუ რამდენი იყო, მაგასაც არ ამბობთ, მთელ ქართულ შეიარაღებას, ძალოვანებს უწევდა წინააღმდეგობას, ეს თქვენზე სასიკეთოდ ნამდვილად არ მეტყველებს.

ეს მეტყველებს იმაზე, რომ ქვეყანას პატრონი არ ჰყავს. სუსი არის უბრალოდ პოლიტიკური პოლიცია, რომელიც დაკავებულია პოლიტიკური ოპონენტების დევნით, ამიტომ გირჩევთ, რაც უფრო მალე შეძლებთ, რომ ამ საკითხზე მკითხაობა დამთავრდეს, ეს უკეთესი იქნება თქვენთვისაც, სახელმწიფოსთვისაც. იმედი, რომ ჩვენ ამ საკითხზე საუბარი მოგვწყინდება, ნამდვილად არ გქონდეთ“, - განაცხადა ირმა ნადირაშვილმა.

უმცირესობის წევრს პარლამენტის პლენარულ სხდომაზე მიმართა ირაკლი სესიაშვილმა და აღნიშნა, რომ განცხადებები, თითქოს სუს-ის ხელმძღვანელობამ მტერი შემოიყვანა და სპეცრაზმელებს თანამებრძოლი და ოჯახს წევრი მოუკლა, არის დიდი შეურაცხყოფა.

„თქვენ საუბრობთ ვერსიებზე და კითხვებზე. კი ბატონო, მე ვთქვი, რომ ამის უფლება გაქვთ, მაგრამ ვერსია ვერსიაა და პოლიტიკური თავდასხმა და შეურაცხყოფა მეორეა. ის ვერსია, თითქოს თავად სახელმწიფო უსაფრთხოების სამსახურმა შემოიყვანა, უბრალოდ ღირსების შემლახავია. რას ეუბნებით გარდაცვილი გმირი სპეცრაზმელის ოჯახის წევრებს, ან მის თანამებრძოლებს, რომ მისმა ხელმძღვანელობამ მტერი შემოიყვანა და თანამებრძოლი და ოჯახის წევრი მოუკლა? ეს ხომ ძალიან დიდი შეურაცხყოფაა? ეს ხომ არ გჯერათ თქვენ? ეს სირცხვილია თქვენი მხრიდან. კიდევ ერთხელ უნდა შევძლოთ, თუნდაც, იშვიათად ჩვენი კონსოლიდირება და საერთო ინტერესების დაცვა“, - აღნიშნა ირაკლი სესიაშვილმა.

როგორც ირაკლი სესიაშვილმა აღნიშნა, თუკი სახელმწიფო უსაფრთხოების სამსახური რაიმე თემაზე დღეს ღიად არ საუბრობს, ამას აქვს რეალური მიზეზი და ეს უკავშირდება ქვეყნის უსაფრთხოებას. მისი თქმით, უახლოეს დღეებში ვახტანგ გომელაური პირველ რიგში, ნდობის ჯგუფის ფარგლებში პირველად ინფორმაციას მიაწვდის შესაბამის წევრებს.

„კარგად უნდა გვესმოდეს, რომ სწორედ სახელმწიფო უსაფრთხოების სამსახური და ჩვენი ხელისუფლება არის დაინტერესებული, მაქსიმალურად დროულად და აბსოლუტურად ამომწურავად მოხდეს საზოგადოების ინფორმირებულობა, თუ რა მოხდა. რამდენადაც ჩვენ ერთი მხრივ ყველა კითხვაზე პასუხი გვაქვს გასაცემი და მეორე მხრივ, ჩვენ უნდა ვიზრუნოთ, რომ ქვეყანამ შეინარჩუნოს ძლიერი უსაფრთხოების გარემო, იყოს სტაბილური, რაზეც არის დამოკიდებული ჩვენი ქვეყნის განვითარება.

ამიტომ, აქ თითის გამოშვერა, თითქოს საზოგადოებას რაღაცას ვუმალავთ, ეს ასე არ არის. ვინც გონიერად მიუდგება ამ საკითხს, კარგად გაიგებს, რომ თუკი სახელმწიფო უსაფრთხოების სამსახური რაიმე თემაზე დღეს ღიად არ საუბრობს, ამას აქვს რეალური მიზეზი, სპეციფიკა და ეს ისევ და ისევ უკავშირდება იმას, რომ ჩვენ მაქსიმალურად დავიცვათ უსაფრთხოება ჩვენს ქვეყანაში“, - აღნიშნა ირაკლი სესიაშვილმა.

რა მოხდა 22 ნოემბერს ბერი გაბრიელ სალოსის გამზირზე? არიან თუ არა სპეცოპერაციის შედეგად ლიკვიდირებულთა შორის საერთაშორისო ტერორისტები - ახმედ ჩატაევი და ადამ, იგივე გურამ გუმაშვილი, რომელიც „ისლამური სახელმწიფოში“ ცნობილია, როგორც „იუსტიციის მინისტრი“? ამ კითხვების საპასუხოდ,  for.ge-ს ინფორმაციით, ჩატაევთან ერთად ლიკვიდირებული პირი, სწორედ ადამ გუმაშვილია. რაც შეეხება კიდევ 2 ლიკვიდირებულ პირს, ეს გახლავთ მამა-შვილი, რომლებიც დაღესტნიდან არიან და „ისლამურ სახელმწიფოს“ მებრძოლთა დაჯგუფებას წარმოადგენდნენ.

ბუნებრივია, ეს არის ვერსიები. ვიდრე ხელისუფლება საზოგადოებას დროულად და ამომწურავ ინფორმაციას არ მიაწვდის, ანალიტიკოსების შეფასებით, ეს ვერსიები შეიძლება ლეგიტიმურად მივიღოთ. მათივე შეფასებით, 22 ნოემბრის მოვლებთან დაკავშირებით, საკმაოდ საინტერესოდ გამოიყურება რუსეთის ხელისუფლების დუმილი, მაშინ, როდესაც რუსეთის საგარეო საქმეთა მინისტრის მოადგილე, გრიგორი კარასინი სპეცოპერაციამდე რამდენიმე დღით ადრე ამტკიცებდა, რომ საქართველოს არ შეუმსუბუქრდება სავიზო რეჟიმი, რადგან აქ ტერორისტების აქტივობა შეინიშნება.

საგარეო საქმეთა ყოფილი მინისტრი, ირაკლი მენაღარიშვილი ამბობს, რომ იმ პროცესებიდან გამომდინარე, რაც ახლო აღმოსავლეთში ვითარდება, საქართველო ის ქვეყნაა, რომელიც რეგიონში განსაკუთრებით მაღალი რისკის ზონას მიეკუთვნება. მისი თქმით, „ისლმაური სახელმწიფოს“ დამარცხების შემდეგ, „მებრძოლები“ არსად არ გაქრებიან და გააგრძელებენ საკუთარ ქმედებას. როგორც მენაღარიშვილი ამბობს, ამგვარმა გამოვლინებებმა შესაძლოა თავი იჩინოს სამხრეთ კავკასიაშიც, კერძოდ, საქართველოში.

„მით უმეტეს, რომ ჩვენს ჩრდილოეთით ბევრად უფრო სერიოზული რისკის ზონაა ჩრდილოეთ კავკასია, სამხრეთით - თურქეთი, რომელიც პირდაპირ არის ჩაბმული „ისლამურ სახელმწიფოსთან“ ბრძოლაში. რა თქმა უნდა, რისკი არსებობს. ეს რეალობაა, რომლესაც თვალის გასწორება და მუშაობა სჭირდება რისკების შესამცირებლად.

მაგრამ, რაც შეეხება ბატონი კარასინის განცხადებას, აქ მე უფრო სხვა რამეს მივაქცევდი ყურადღებას. მინდა შეგახსენოთ 1999 წელი, როდესაც რუსეთმა საქართველოსთან სავიზო რეჟიმის შემოღებასთან დაკავშირებით გააკეთა განცხადება. მაშინ საქართველო დსთ-ს წევრი და ფორმალურად რუსეთის მოკავშირე იყო. მიზეზი, რაც მაშინ ამ გადაწყვეტილების მისაღებად დასახელდა, იყო იგივე, რომ საქართველოდან ტერორისტების შემოდინებას უნდა შევუშალოთ ხელი. ეს ის პერიოდიოა, როცა ჯერ არც პანკისი არსებობს თავისი პრობლემბით, არც ტერორისტების მითიური ბუდეები და საწვრთნელი ბანაკები“, - აცხადებს for.ge-სთან საუბრისას ირაკლი მენაღარიშვილი.

მისი თქმით, კარასინის მიერ ამჯერად გაცხადებული მიზეზი, ისევე როგორც მაშინ, არის სრულიად უსაფუძვლო და ჩამოყალიბებული იმისათვის, რომ გაამართლოს რუსეთის ეს დესტრუქციული ქმედება.

„რუსეთს არ აქვს არავითარი საფუძველი უარი უთხრას საქართველოს მოქალაქეებს უვიზო მიმოსვლაზე, მას შემდეგ, რაც ევროპამ გახსნა კარები საქართველოსათვის. ამიტომ, ამ გადაწყვეტილების გამართლების მიზნით აკეთებს ბატონი კარასინი იმავე მოძრაობას, რაც 1999 და შემდეგ 2000 წელს, როდესაც მოლაპარაკება მიდიოდა სავიზო რეჟიმზე, მაშინაც რუსეთი იგივეს აკეთებდა.

რუსეთში არაფერი არ შეცვლილა. მათი ხედვა, ტაქტიკა და მეზობლებთან ურთოერთობის პოლიტიკა, სამწუხაროდ იგივე დარჩა. გამოსავალი მხოლოდ ერთია - ადრე თუ გვიან, რუსეთში გაიგებენ, რომ ეს ყველაფერი მათივე ინტერესების წინააღმდეგ მუშაობს“, - განაცხადა ირაკლი მენაღარიშვილმა.

რუსულ ინტერესებზე ამახვილებს ყურადღებას პოლიტოლოგი რამაზ საყვარელიძე, რომლის განცხადებით, უახლოესი წარსულის მაგალითიდან თუ ვისაუბრებთ, რუსეთი ის ქვეყანაა, რომლის ხელშეწყობით პანკისის ხეობაში ტერორისტები შემოდიოდნენ. მისი თქმით, ამის მაგალითია შამილ ბასაევი, რომელიც რუსეთის ხელშეწყობით აღმოჩნდა პანკისის ხეობაში.

„ბასევი ისეთი ფიგურაა, რომელსაც ტერორისტული აქტები არ დაუკლია არა მარტო გარეთ, არამედ თვითონ რუსეთში. ასე რომ, ამ პროცესებში ვინ ვისი ზურგით მოქმედებს, მარტივი გასაშიფრი არ არის. თუ ეს ჯგუფი რაღაცა ოპერაციისთვის ემზადებოდა, ასეთ შემთხვევაში არც ის ვარიანტია გამოსარიცხი, რომ ამ ოპერაციით დაინტერესებულმა ქვეყნებმა შეუწყვეს ხელი მათ საქართველოში შემოსვლას, რათა მერე სხვა წერტილში გადასულიყვნენ.

ასეთი დაინტერესებულ ქვეყნებს შორის შეიძლება ვიგულისხმოთ რუსეთი. მიუხედავად იმისა, რომ ჩეჩნეთს ებრძვის, ტერორიზმს ებრძვის, რუსეთი უფრო რთული მოთამაშეა პოლიტიკაში, მას შეუძლია საკუთარი მოსახლეობაც გაწიროს. ითანამშრომლოს იმასთან, ვისაც მტერს ეძახის და ამბობს, რომ უნდა მოვსპოო. ამიტომ, პოლიტიკური თვალსაზრისით, ამ ვარიანტის გამორიცხვა პრაქტიკულად შეუძლებელია“, - აცხადებს რამაზ საყვარელიძე.

რაც შეეხება ახმედ ჩატაევის საქართველოში შემოსავლას და მასთან დაკავშირებულ პასუხისმგებლობას, როგორც პოლიტოლოგი აცხადებს, გაცილებით ტრადიციულ დემოკრატიულ ქვეყნებში, სადაც კარგად არის აწყობილი სასაზღვრო სისტემა, ტერორისტები ახერხებენ საზღვრების გადალახვას, რომ შემდეგში მოაწყონ ტერორისტული აქტი, რომელიც ამ ქვეყნების წინააღმდეგ არის მიმართული.

„ჩვენს შემთხვევაში საეჭვოა, რომ ტერორისტული პროცესების ადრესატი საქართველო ყოფილიყო. ამას რატომ ვამბობ - თუ სხვა ქვეყნებმა ვერ მოახერხეს პასუხისმგებლობაზე ლაპარაკი, საქართველოს შემთხვევაში ცოტა გადაჭარბებული მეჩვენება ვინმეს პასუხისმგებლობაზე საუბარი. საქართველოს საზღვრების საკითხი მოუგვარებელი აქვს. ლაპარაკი იმაზე, რომ საქართველოში შემოგზავნეს, რომ აქ ადვილი ყოფილიყო ამ ჯგუფის ლიკვიდაცია, ეს ვერსია საეჭვოდ მეჩვენება.

ასე შორიდან გამიზნული რომ ყოფილი იყო ეს ოპერაცია, უკეთესად იქნებოდა გათვლილი, ასევე კარგად იქნებოდა ორგანიზებული თვალთვალი და დასრულდებოდა ისე, რომ მსხვერპლი არ იქნებოდა. ვფიქრობ, რომ საქართველოს სამართალდაცავები წააწყდნენ ამ ჯგუფს და მერე უკვე შეუპოვრად გაუწიეს წინააღმდეგობა“, - აღნიშნა for.ge-სთან საუბრისას რამაზ საყვარელიძემ.

პოლიტოლოგი, საერთაშორისო ურთიერთობათა მკვლევარი, თამარ კიკნაძე არ გამოვრიცხავს, რომ 22 ნოემბრის სპეცოპერაცია რაღაცა ქმედების საფუძველი გახდეს რუსეთის მხრიდან. როგორც პოლიტოლოგი ამბობს, მიუხედავად იმისა, რომ ძალიან მწირია ინფორმაცია სპეცოპერაციის შესახებ, უნდა ითქვას, რომ ჩატაევი და მისი ტერორისტული ჯგუფი სწორედ მიხეილ სააკაშვილის დავალებით იყვნენ შემოყვანილი საქართველოში.

„იგივე ჩატაევი და მისი დაჯგუფება გარკვეული მიზნისთვის შემოყვანილი იქნენ სააკაშვილის დროს. მაშინ სააკაშვილის ხელისუფლება ცდილობდა, რომ ამ ჯგუფის დახმარევით რუსეთისთვის შეექმნათ რაღაცა დისკომფორტი. ამიტომ, როგორ განვითარდება მოვლენები, ეს ძალიან ძნელი სათქმელია. ამ მწირი ინფორმაციის პირობებშიც კი, ადვილად დასანახია, რომ ეს არ იყო მარტო ქართული სპეცსამსახურების მიერ ჩატარებული სპეცოპერაცია. ვნახეთ, რომ გამოძიებაში ჩაერთო ამერიკული მხარე. ეს სპეცოპერაცია ძალიან დიდ ინტერესს იჩენს და რა მოჰყვება ამას, ეს არავინ არ იცის“, - აცხადებს for.ge-სთან საუბრისას თამარ კიკნაძე.