იური ვაზაგაშვილის გარდაცვალების საქმეზე მოწმის სახით 30-ზე მეტი პირია დაკითხული. მთავარ პროკურატურაში უკვე დადასტურებით ამბობენ, რომ როდესაც საუბარია ასაფეთქებელი მოწყობილობის საშუალებით ადამიანის მკვლელობაზე, ამას რიგითი ადამიანი და ჩვეულებრივი მოქალაქე ვერ შეასრულებდა. მთავარი პროკურორის მოადგილე, ირაკლი შოთაძე აცხადებს, რომ ეს იყო პროფესიონალურ დონეზე დაგეგმილი მკვლელობა. უმრავლესობის წევრი, ირაკლი სესიაშვილი არ გამორიცხავს, რომ მომავალში საქმის გამოძიება ტერორიზმის მუხლით გადაკვალიფიცირდეს.

ადვოკატი ირმა ჭკადუა აცხადებს, რომ ზურა ვაზაგაშვილის საქმეში ეჭვმიტანილთა შორის ყოფილი მაღალი თანამდებობის პირების გვარებიც არის. მისივე თქმით, იური ვაზაგაშვილი მოკლულია და ამას მისი შვილის საქმესთან აქვს კავშირი. 

„იური ვაზაგაშვილის მკვლელობა არ შეიძლება უკავშირდებოდეს მის ბიზნესს, როგორც ეს ითქვა, რადგან მას ისეთი ბიზნესი არ ჰქონდა, რომელიც ვიმეს ინტერესებს კვეთდა. მის მფლობელობაში მაღაზია იყო. ჩემი აზრით, ეს იყო მიზანმიმართული, წინასწარ დაგეგმილი და გათვლილი მკვლელობა. თავისუფლად შეიძლებოდა მასთან ერთად ოჯახის სხვა წევრებიც ყოფილიყვნენ. იცოდნენ, რომ მინიმუმ 2 კვირაში ერთხელ ოჯახის წევრები ზურა ვაზაგაშვილის საფლავზე მიდიოდნენ“, - აღნიშნა for.ge-სთან საუბრისას ირმა ჭკადუამ.

იური ვაზაგაშვილის მკვლელობის საქმეებთან დაკავშირებით დეპუტატები შსს-სა და მთავარი პროკურატურის წარმომადგენლებს პარლამენტში დახურულ სხდომაზე მოხსენებისთვის იბარებენ. ამ ინიციატივით საპარლამენტო უმრავლესობის წევრები ზაქარია ქუცნაშვილი და თამარ კორძაია გამოვიდნენ. დეპუტატებს აინტერესებთ, რატომ გაჭიანურდა ზურაბ ვაზაგაშვილის საქმის გამოძიების პროცესი. იურიდიულ საკითხთა კომიტეტის თავმჯდომარის ვახტანგ ხმალაძის განცხადებით, ის ძალოვანი უწყებების წარმომადგენლებს დაუკავშირდება და სავარაუდოდ, დახურული სხდომა დღეს უნდა გამართულიყო, თუმცა უმრავლესობა ამ საკითხზე ვერ თანხმდება.

ადამიანის უფლებათა დაცვის კომიტეტის თავმჯდომარე ეკა ბესელია ვაზაგაშვილის საქმეზე პარლამენტში ძალოვანი უწყებების წარმომადგენლების დაბარებას ამ ეტაპზე მიზანშეწონილად არ მიიჩნევს. ბესელია ამბობს, რომ მას მთავარი პროკურორისა და შსს-ს ხელმძღვანელებთან კომუნიკაციის პრობლემა არ აქვს და მათგან ამა თუ იმ საკითხზე ინფორმაციას მაშინვე იღებს, როგორც კი, ამის აუცილებლობა არის.
„მათთან შეხვედრა იმდენჯერმე მაქვს, რამდენჯერაც ამის აუცილებლობა არის. არც პროკურორის და არც მინისტრის დაბარების განსაკუთრებული პროცედურები არ მჭირდება, რადგან ნებისმიერ დროს მათთან მუდმივი საქმიანი შეხვედრა მაქვს და კონკრეტულ საკითებზე ვმსჯელობთ. მთავარ პროკურორთან ბოლო საუბარი ვაზაგაშვილის საქმესთან დაკავშირებით მქონდა. 

გარკვეული ინფორმაცია საჯარო ვერ იქნება იქედან გამომდინარე, რომ საქმე ეხება დამნაშავეების დასჯას და დანაშაულის გახსნას. არის გარკვეული ჩარჩო რა ფარგლებშიც ჩვენ შეგვიძლია ინფორმაციის მიღება და რა ეტაპზე არ არის მიზანშეწონილი ინფორმაციის გახსნა. ეს ფარგლები ზუსტად დასანახია პარლამენტის წევრების მხრიდან“, - განუცხადა ჟურნალისტებს ეკა ბესელიამ. 

ბესელიას მსგავსად, შსს-სა და მთავარი პროკურატურის წარმომადგენლების პარლამენტში დახურულ სხდომაზე დაბარების აუცილებლობას ვერ ხედავს საპარლამენტო უმრავლესობის წევრი გია ვოლსკი.

„მე არ ვეთანხმები იმას, რომ პარლამენტმა უნდა ჩაანაცვლოს შს სამინისტრო, სასამართლო, პროკურატურა, კომისები შეიქმნას. ხშირ შემთხვევაში, ეს არაჯანსაღი პოლიტიკური გამოვლინენების საფუძველზე ხდება. პროკურატურა რაზეც საუბრობს, იმის უკან თუ რამე თემა დევს, რომელიც შეიძლება გია ვოლსკის ან სხვას ვინმეს აინტერესებს არ არის მართალი და სწორი“, - აცხადებს გია ვოლსკი.

მთავარ საგამოძიებო უწყებაში ამბობენ, რომ ვაზაგაშვილის მკვლელობის საქმეზე გამოძიება საწყის ეტაპზეა და დასაბუთებულად განცხადებას ვერ გააკეთებენ, გამოძიება არც სავარაუდო ეჭვმიტანილთა წრეზე საუბრობს. პარლამენტის თავმჯდომარე, დავით უსუფაშვილი ამბობს, რომ ამ საზარელი მკვლელობის სამიზნე მხოლოდ ბატონი იური ვაზაგაშვილი არ იყო.

„ბატონმა იურიმ უკვე მოასწრო ყველაფრის თქმა, რისი თქმაც მისგან იყო საჭირო. როგორც ჩანს, აქ სხვა მიზნებია და ამიტომ, მინდა, ყველას მივმართო - ჩვენი სწორი რეაქცია ამ საშინელებაზე იქნება ის, რომ თუ ვინმეს ჰგონია, ამის გამო ვინმე გაჩუმდება - არ უნდა გაჩუმდეს, სათქმელი უნდა ითქვას და მეორე, თუ ამის მიზანია ქართული სახელმწიფოს გამოცდა, ხელისუფლების გამოცდა, შეგვიძლია თუ არა, დავიცვათ ჩვენი მოქალაქეები, გამოვიძიოთ დანაშაული, თუ რამე შეცდომა იყო დაშვებული, ამ შეცდომას გავუმკლავდეთ, შევხედოთ რეალურად თვალებში და ნაბიჯები გადავდგათ. ზუსტად ეს უნდა გავაკეთოთ, ეს იქნება ჩვენი სწორი რეაქცია ამ ყველაფერზე“, - განაცხადა ბიუროს სხდომაზე დავით უსუფაშვილმა. 

პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი ვარაუდობს, რომ იური ვაზაგაშვილის მკვლელი საოკუპაციო ზოლიდან მოქმედებდა. ამ ვარაუდამდე დეპუტატი იმ ფაქტმა მიიყვანა, რომ მკვლელობის ადგილი საოკუპაციო ზოლთან მდებარეობს. აქვე სესიაშვილი აანონსებს, რომ საქმე რთულად იქნება გამოსაძიებელი.

„გეოგრაფიულად, სადაც მოხდა აღნიშნული ფაქტი, ახლოს არის საოკუპაციო ზოლთან და ერთ-ერთი ვერსიით, შესაძლოა, მკვლელი მოქმედებდა საოკუპაციო ზოლიდან. ეს კიდევ უფრო ართულებს ვითარებას. მაქსიმალურად მოკლე ვადებში უნდა მოხდეს გამოძიება, თუმცა ეს ძალიან რთული იქნება“, - აცხადებს სესიაშვილი.

დეპუტატი იური ვაზაგაშვილის მკვლელობას ტერორისტულ აქტს უწოდებს და არ გამორიცხავს, რომ მომავალში საქმის გამოძიება ტერორიზმის მუხლით გადაკვალიფიცირდეს. მისივე თქმით, იური ვაზაგაშვილის მკვლელობა მიზანმიმართული იყო არა ზურაბ ვაზაგაშვილის მკვლელობის საქმის ხელის შეშლისკენ, არამედ საზოგადოების დაშინებისკენ და სახელმწიფო სტაბილურობის მოშლისკენ.

„მიმაჩნია, რომ ჩადენილი აქტი თავისი ხასიათით, უფრო გავს ტერორისტულ ქმედებას. ტერორიზმის მიზანია საზოგადოების ფართო მასების შოკირება, მათზე ზემოქმედების მოხდენა და გარკვეულწილად, დაუცველობის განცდის გაჩენა საზოგადოებაში. ეს აქტი უფრო მეტად მიმართულია საზოგადოების ტერორისკენ, დაშინებისკენ, რასაც, უნდა ვივარაუდოთ, რომ შესაძლოა, ჰქონდეს პოლიტიკური მოტივები - საზოგადოების დაშინება და სახელმწიფო სტაბილურობის მოშლა. მუხლი რითაც აღიძრა საქმე, ამ ეტაპზე სწორია, თუმცა შემდგომ შესაძლებელია შეცვლა და ტერორიზმის მუხლით გადაკვალიფიცირება“, - აცხადებს ირაკლი სესიაშვილი. 

ექსპერტი, ხათუნა ლაგაზიძე აცხადებს, რომ ქვეყანაში დესტაბილიზაციის საფრთხე რეალურია, მკვლელობის „რეჟისორი“ კი ქვეყნის ფარგლებს გარეთ არის მოსაძებნი. მისივე თქმით, იური ვაზაგაშვილის მკვლელობა, პოლიტიკური მკვლელობაა და ეს ხელისუფლებამ დროულად უნდა გამოიძიოს.

„თუ ეს არის რეალურად პოლიტიკური მკვლელობა უნდა დაველოდოთ იმგვარი ტიპის აქციებს, რომლებიც ქვეყანას დესტაბილიზაციამდე მიიყვანს. ამიტომაც არის აუცილებელი, რომ ხელისუფლებამ, რადაც არ უნდა დაუჯდეს, გამოიძიოს ეს საქმე. წინააღმდეგ შემთხვევაში, ეს ხელისუფლების უსუსურობის მაგალითი იქნება. ნიშანი იმისა, რომ არაერთი ნაღმი ააფეთქეს სხვადასხვა ფორმით, რაც  საზოგადოებაში შექმნის ქაოსს და საქართველოს დამოუკიდებლობას შეუქმნის რეალურ საფრთხეს. თუ ხელისუფლებამ არ მიიღო გადამჭრელი ზომები, ეს სცენარი რეალურია“, - განაცხადა ხათუნა ლაგაზიძემ.